༄༅། །བོད་ཀྱི་སྲིད་བྱུས་ཉམས་ཞིབ་ཁང་གིས་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་བརྒྱད་པ་དེ་ཕྱི་ལོ་ ༢༠༢༢ ཕྱི་ཟླ་ ༨ ཚེས་ ༢༣ ནས་ ༢༥ བར་ཉིན་གསུམ་རིང་ས་རཱ་བོད་ཀྱི་མཐོ་རིམ་སློབ་གཉེར་ཁང་ལ་འཚོག་རྒྱུར་གཏན་ཁེལ་བ་ཡིན་ན། འདི་ལོའི་ཉམས་ཞིབ་ཚོགས་འདུའི་ནང་རྒྱ་གར་གཙོས་པའི་རྒྱལ་སྤྱིའི་གཙུག་ལག་སློབ་ཆེན་ནང་བོད་རིགས་སློབ་མ་འབུམ་རམས་པ་དང་། ཉེ་བའི་འབུམ་རམས་པ། གཙུག་ལག་རབ་འབྱམས་པ། དེ་བཞིན་ཉམས་ཞིབ་ལྟེ་གནས་ཁང་འདྲ་མིན་ནང་ཉམས་ཞིབ་གནང་བཞིན་པ་རྣམས་ནས་སོ་སོའི་སློབ་ཚན་དང་འབྲེལ་བརྗོད་གཞིའི་ཐོག བོད་ཀྱི་ཆབ་སྲིད་དང་། རིག་གཞུང་། མི་རིགས། ཆོས་འབྱུང་དང་རྒྱལ་རབས། ཁོར་ཡུག་སོགས་དང་འབྲེལ་བའི་གཏམ་བཤད་དང་དཔྱད་རྩོམ་གནང་དགོས། དཔྱད་རྩོམ་འབུལ་ཕྱོགས་སོགས་ཞིབ་ཕྲའི་གནས་ཚུལ་གཤམ་གསལ་ལྟར་ཏེ།
ཚོགས་བཅར་དེབ་སྐྱེལ་དང་རྩོམ་ཡིག་སྙིང་དོན་འབུལ་ཕྱོགས་ཀྱི་ལམ་སྟོན།
༡༽ ཚོགས་བཅར་གནང་འདོད་ཡོད་པ་རྣམས་ནས་ཕྱི་ལོ་ ༢༠༢༢ ཟླ་ ༥ ཚེས་ ༢༠ འགྱངས་མེད་དྲྭ་ཐོག་དེབ་སྐྱེལ་གནང་དགོས་པ།
༢༽ དྲྭ་ཐོག་དེབ་སྐྱེལ་སྐབས་རྩོམ་ཡིག་སྙིང་དོན་ཚིག་འབྲུ་ ༢༥༠ ལས་མི་ཉུང་བ་དང། ༣༠༠ ལས་མི་མང་བ་འབུལ་དགོས།
༣༽ སོ་སོའི་ལོ་རྒྱུས་ཚིག་འབྲུ་ ༢༠༠ ཙམ་འཁོད་པ་སྙན་ཞུའི་ལྟན་དུ་འབུལ་དགོས།
༤༽ རྩོམ་ཡིག་སྙིང་བསྡུས་རྣམས་ལ་ཞིབ་འཇུག་ཟིན་རྗེས། ༢༠༢༢ ཟླ་ ༦ ཚེས་ ༡༠ ཉིན་གཏམ་བཤད་གནང་མཁན་གཏན་འཁེལ་བ་དོ་བདག་སོ་སོར་འབྲེལ་བ་ཞུ་རྒྱུ།
རྩོམ་བསྡུ་དང་འབྲེལ་བའི་གནད་དོན།
༡༽ གཏམ་བཤད་གནང་མཁན་གཏན་འཁེལ་བ་དོ་བདག་སོ་སོ་ནས་དཔྱད་རྩོམ་རྒྱས་པ་ ༢༠༢༢ ཟླ་ ༧ ཚེས་ ༢༠ གོང་འདི་ལས་སུ་ཕུལ་ཟིན་པ་དགོས་རྒྱུ།
༢༽ རྩོམ་ཡིག་རྒྱས་པའི་ཡིག་གཟུགས་ཆེ་ཆུང་ ༡༢ ཐོག་ཚིག་འབྲུ་ ༥༠༠༠ ལས་མི་ཉུང་བ་དང་། ༦༠༠༠ ལས་མི་མང་བ་འབྲི་གནང་དགོས།
༣༽ རྩོམ་ཡིག་དང་གཏམ་བཤད་གཉིས་ཀ་བོད་ཨིན་སྐད་ཡིག་གང་རུང་ཐོག་གནང་ཆོག།
ཚོགས་འདུའི་སྐོར་དོགས་འདྲི་ཡོད་ཚེ། བོད་ཀྱི་སྲིད་བྱུས་ཉམས་ཞིབ་ཁང་གི་འབྲེལ་མཐུད་པ་འབུམ་རམས་པ་ཚེ་རིང་སྒྲོལ་མ་ལགས་ལ་ཐད་ཀར་འབྲེལ་བ་གནང་དགོས་པ་དགོངས་འཇགས་ཞུ།
འབྲེལ་གཏུག་གློག་འཕྲིན་ཁ་བྱང་ [email protected]
ལག་ཐོགས་ཁ་པར་ཨང་གྲངས། +༩༡ ༨༦༢༩༨༨༩༣༦༥
བོད་ཀྱི་སྲིད་བྱུས་ཉམས་ཞིབ་ཁང་ནས། ཕྱི་ལོ་ ༢༠༢༢ ཟླ་ ༤ ཚེས་ ༢༡ ཉིན།
