༄༅། །ཕྱི་ལོ་༢༠༢༢ ཟླ་བ་ ༠༤ ཚེས་ ༠༩ ཉིན་བེལ་ཇམ་གྱི་བུ་རུ་གྷེ་རུ་ས་གནས་དབུས་གཙང་ཆོལ་ཁ་དབུ་བརྙེས་ནས་ལོ་ལྔ་འཁོར་བའི་དུས་ཆེན་གོ་སྒྲིག་གནང་འདུག  

དེ་ཡང་མཛད་སྒོའི་སྐུ་མགྲོན་གཙོ་བོ་བེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་མི་ལོ་ ༤༠ ལྷག་སྤྱི་ཚོགས་སྲི་ཞུ་བསྒྲུབས་རྗེས་ད་ཐེངས་ཀྱི་གསུང་བཤད་དེ་མཐའ་མ་ཆགས་ཀྱི་ཡོད་སྐོར་དང་། འདས་པའི་ལོ་བཅུ་ཕྲག་ནང་ང་ཚོས་ལས་འགུལ་རིགས་དང་། རིག་གཞུང་དུས་ཆེན་སོགས་གོ་སྒྲིག་ཞུ་ཕྱོགས་ཐད་ཡར་རྒྱས་ཕྱིན་ཡོད་ནའང་། གཙོ་བོ་ལས་འགུལ་གྱི་གྲངས་ལས་སྤུས་ཚད་གལ་ཆེ་བ་བརྩི་དགོས་ཞེས་དང་།མུ་མཐུད་ཁོང་གིས་མ་འོངས་པར་ལས་འགུལ་རིགས་སྤེལ་སྐབས་ཚད་ལྡན་ཡོང་ཐབས་དང་དུས་ཚོད་སྟངས་འཛིན་ཐོག་དོ་སྣང་གནང་གལ་ཆེ་བའི་སྐོར་གསུངས་པ་དང་འབྲེལ། སྤྱི་ཚོགས་ནང་ལས་འགུལ་ལེགས་གྲུབ་ཡོང་སླད་འགན་འཁུར་བ་རྣམས་ལ་ལེགས་གསོལ་བསྔགས་བརྗོད་གནང་འདུག 

དེ་བཞིན་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ས་གནས་དབུས་གཙང་ཆོལ་ཁའི་རྒྱུན་ལས་རྣམས་ལ་དབུས་གཙང་ཆོལ་ཁའི་དབུས་རྒྱུན་ལས་ཁང་ནས་གནང་བའི་ཕྱག་འཁྱེར་དང་། དེ་རྗེས་རིག་གཞུང་འཁྲབ་སྟོན་འགྲན་སྡུར་ལ་མཉམ་ཞུགས་པ་རྣམས་ལ་ལེགས་གསོལ་བྱ་དགའ་གནང་། བེལ་ཇམ་དབུས་གཙང་ཆོལ་ཁའི་ས་གནས་རྒྱུན་ལས་ཁང་གི་ཚོགས་གཙོ་བསྟན་འཛིན་འཛོམས་སྐྱིད་ལགས་ཀྱིས་འཚམས་འདྲི་དང་འབྲེལ་ཚོགས་པའི་ངོ་སྤྲོད་དང་། དྲུང་ཆེ་བསོད་ནམས་ལྷ་ས་ལགས་ཀྱིས་ཚོགས་པའི་ལོ་གཉིས་ཀྱི་ལས་བསྡོམས་སྒྲོགས་སྦྱང། རྩིས་པ་བསྟན་འཛིན་བཟོད་པ་ལགས་ཀྱིས་རྩིས་ལོ་ ༢༠༢༠ ནས་ ༢༠༢༡ ལོའི་རྩིས་ཁྲ་སྒྲོགས་སྦྱང་གནང་འདུག

བེལ་ཇམ་ས་གནས་དབུས་གཙང་ཆོལ་ཁ་ནི་ཕྱི་ལོ་ ༢༠༡༦ ལོར་བེལ་ཇམ་གནས་སྡོད་དབུས་གཙང་མི་མང་ནས་སྤྱི་མོས་ཐོག་ཐག་གཅོད་གནང་བ་ལྟར་གསར་འཛུགས་གནང་བ་ཞིག་རེད་འདུག་ལ་ད་ལྟའི་ཆར་ཚོགས་མི་ ༢༠༠ ལྷག་ཡོད་འདུག་པ་བཅས། །