༄༅། །བར་ལམ་ཏོག་དབྱིབས་གཉན་རིམས་གནས་སྟངས་ཞི་འཇམ་དུ་ཕྱིན་པ་དང་སྟབས་བསྟུན་བ་རེ་སེལ་དུ་ཡོད་པའི་ཆོས་རིག་འཛིན་སྐྱོང་གི་འཇམ་དབྱངས་བློ་འཕེལ་གཟའ་མཇུག་སློབ་གྲྭས་ཕྱི་ལོ་ ༢༠༢༢ ཟླ་བ་ ༠༤ ཚེས་ ༠༣ ཉིན་ཕྱི་སྣུར་ཞུས་པའི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༢ འཁོར་བའི་དུས་ཆེན་དང་སློབ་མའི་རིག་གཞུང་དུས་སྟོན་བཅས་དུས་གཅིག་ཏུ་གོ་སྒྲིག་ཞུས་འདུག ཆོས་རིག་འཛིན་སྐྱོང་ཚོགས་པའི་འོག་ཏུ་གཟའ་མཇུག་སློབ་གྲྭ་ཁག་དྲུག་དང་སློབ་མ་གྲངས་ ༣༧༢ ཡོད་ཅིང་། སློབ་གྲྭ་དེ་དག་ཨན་ཝེབ་ (Antwerp) དང་། བ་རེ་སེལ། (Brussels) ལེའུ་ཝེན། (Leuven)  ཨོས་ཊེན་ཊི། (Ostende) གེནཊ། (Gent)  བུ་རུ་ཇ་ (Bruge) བཅས་སུ་ཡོད་པ་རེད། 

དེ་ཡང་དུས་སྟོན་གྱི་དབུ་འབྱེད་གསུང་བཤད་ནང་ཆོས་རིག་འཛིན་སྐྱོང་སློབ་གྲྭའི་དྲུང་ཆེ་བཀྲ་ཤིས་བདེ་ལེགས་ལགས་ཀྱིས་ཏོག་དབྱིབས་ནད་ཡམས་རྐྱེན་གྱིས་དྲ་ཐོག་སློབ་ཁྲིད་བྱ་དགོས་བྱུང་ཡོད་སྐོར་དང་། སློབ་མའི་ཤེས་རིག་གོང་མཐོར་འགྲོ་མིན་གཙོ་བོ་ཕ་མ་དང་དགེ་རྒན་ལ་རག་ལུས་ཡོད་ཚུལ་ལམ་སྟོན་གནང་གྲུབ་མཚམས། སྐུ་མགྲོན་གཙོ་བོ་བེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སློབ་གྲྭའི་དགེ་ལས་སློབ་ཕྲུག་ཕ་མ་བཅས་ནས་ད་བར་སྐུ་ལས་སྐྱོན་པར་རྗེས་སུ་ཡི་རང་ཞུས་པ་དང་འབྲེལ་གཞོན་སྐྱེས་རྣམས་ཀྱིས་འོས་འགན་ཁུར་རྒྱུར་གྲ་སྒྲིག་ཨང་གསར་ཡོད་པར་བསྔགས་བརྗོད་གནང་། རྒྱུན་ཆགས་སུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་གནང་བཞིན་པ་ལྟར་སྐུ་ཚབ་དོན་གཅོད་ཀྱིས་བོད་མི་རྣམས་ཀྱིས་སྐད་ཡིག་དང་། རིག་གཞུང་། གོམས་སྲོལ་ཙམ་མ་ཡིན་པར་བོད་མིའི་བཟང་པོའི་ཡོན་ཏན་བྱམས་སྙིང་རྗེ་དང་། བཟོད་སྒོམ་སོགས་བདག་གཅེས་བྱ་རྒྱུ་གལ་གནད་ཆེན་པོ་ཡིན་པ་འགྲེལ་བརྗོད་གནང་བ་དང་། དེ་རྗེས་སློབ་མཐར་སོན་པའི་སློབ་མ་རྣམས་ལ་ཕྱག་ཁྱེར་གནང་། སྐུ་མགྲོན་རྣམ་པའི་གསུང་བཤད་གནང་གྲུབ་མཚམས་སློབ་གྲྭ་དྲུག་གི་སློབ་མ་དང་དགེ་ལས་རྣམས་ཀྱིས་རིག་གཞུང་འཁྲབ་སྟོན་གནང་ཞིང་། འདུ་འཛོམས་ཐོག་བེལ་ཇམ་ནང་གི་བོད་ཀྱི་ཚོགས་པ་འདྲ་མིན་གྱི་ཚོགས་མི་དང་། སློབ་ཕྲུག་དང་ཕ་མ་དུ་མ་ལྷན་ཞུགས་གནང་འདུག 

མཛད་སྒོར་བེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ལྷན་དུ་དྲུང་ཆེ་འཕྲིན་ལས་དབང་འདུས་ལགས་ཀྱང་ལྷན་བཅར་ཞུས་ཡོད་པ་བཅས།།