༄༅། །ཕྱི་ལོ་ ༢༠༢༢ ཟླ་ ༤ ཚེས་ ༢༠ ནས་ཟླ་ ༥ ཚེས་ ༡ བར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རྒྱལ་སྤྱིའི་བསྟི་གནས་ཁང་གི་ཚོགས་ཁང་ (India International Centre)  དུ་གློག་བརྙན་བཟོ་སྐྲུན་པ་བསྟན་འཛིན་བསོད་ནམས་ལགས་དང་ཁོང་གི་བཟའ་ཟླ་རི་ཏུ་ས་རིན་ (Ritu Sarin) ལགས་རྣམ་གཉིས་ཀྱིས་གོ་སྒྲིག་གནང་བའི་པར་རིས་འགྲེམས་སྟོན་གྱི་དབུ་འབྱེད་མཛད་སྒོར་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་མཉམ་ཞུགས་གནང་ཡོད། 

དེ་ཡང་འགྲེམས་སྟོན་ནང་བདེ་སྲུང་བཀའ་བློན་ཟུར་པ་ལྷ་མོ་ཚེ་རིང་དང་འབྲེལ་བའི་པར་རིས་ཁག་གཅིག་དང་། དེ་བཞིན་གློག་བརྙན་བཟོ་སྐྲུན་པ་བསྟན་འཛིན་བསོད་ནམས་ལགས་དང་ཁོང་གི་བཟའ་ཟླ་རི་ཏུ་ས་རིན་ལགས་རྣམ་གཉིས་ཀྱིས་དེ་སྔའི་བསྟན་སྲུང་དང་བླངས་དམག་མིར་བཅར་འདྲི་ཞུས་པ་སོགས་ཀྱི་གློག་བརྙན་ཁག་གཅིག་ཀྱང་གཟིགས་འབུལ་ཞུས་ཡོད།

འགྲེམས་སྟོན་དེ་བཞིན་དེ་སྔ་ཕྱི་ལོ་ ༢༠༡༩ ལོར་སྦར་ལིན་དུ་གོ་སྒྲིག་གནང་ཡོད་པ་དང་། ད་རེས་རྒྱ་གར་ནང་གོ་སྒྲིག་གནང་བ་ཆེས་ཐོག་མ་ཆགས་ཀྱི་ཡོད་པ་བཅས། །