༄༅། །ཕྱི་ལོ་ ༢༠༢༢ ཟླ་ ༠༤ ཚེས་ ༢༦ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཕ་རཱན་སིའི་སྲིད་འཛིན་གྱི་འོས་བསྡུ་ཆེན་མོའི་ཁྲོད་ཕ་རཱན་སིའི་སྲིད་འཛིན་ལས་ཐོག་སྐུ་ཞབས་ཨེམ་མེ་ནུལ་མེ་ཁི་རོན་ (Emmanuel Macron) མཆོག་སླར་ཡང་སྲིད་འཛིན་དུ་བདམས་ཐོན་བྱུང་བར་དགའ་བསུའི་འཚམས་འཕྲིན་ཞིག་ཕུལ་བའི་ནང་འཁོད་དོན། ངས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཚབ་ཞུས་ཏེ་ཕ་རཱན་སིའི་སྲིད་འཛིན་གྱི་འོས་བསྡུ་ཆེན་མོའི་ཁྲོད་སྐུ་ཉིད་སླར་ཡང་སྲིད་འཛིན་དུ་བདམས་ཐོན་བྱུང་བར་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན།

སྐུ་ཉིད་སླར་ཡང་ཕ་རཱན་སིའི་སྲིད་འཛིན་དུ་བདམས་ཐོན་བྱུང་བ་དེས་ཕ་རཱན་སིའི་མི་མང་གིས་སྐུ་ཉིད་ཀྱི་དབུ་ཁྲིད་ཀྱི་གནས་བབ་ལ་ཡིད་ཆེས་བློ་གཏད་གནང་གི་ཡོད་པ་མཚོན་གྱི་ཡོད། སྐུ་ཉིད་མང་གཙོའི་འོས་འདེམས་ལམ་ནས་ཕ་རཱན་སིའི་སྲིད་འཛིན་གྱི་འོས་བསྡུ་ཁྲོད་རྒྱལ་ཁ་ཐོབ་པ་ནི་ཞི་བདེ་ལ་དགའ་མོས་གནང་མཁན་གྱི་འཛམ་གླིང་མི་མང་ལ་རྒྱལ་ཁ་ཐོབ་པ་ཞིག་ཡིན། ལྷག་པར་འཛམ་གླིང་ནང་རྙོག་གྲ་འབྱུང་བཞིན་པའི་སྐབས་འདིར་སྐུ་ཉིད་ཀྱིས་ཡུ་རོབ་སྟོབས་ཤུགས་ཆེ་རུ་གཏོང་རྒྱུའི་གཙོ་འདོན་དང་། དེ་བཞིན་སྟོབས་ལྡན་རྒྱལ་ཁབ་ཕ་རཱན་སི་ཡིས་ཁོར་ཡུག་སྲུང་སྐྱོབ་ལ་རྒྱབ་སྐྱོར་གནང་རྒྱུའི་གཙོ་འདོན་གནང་བཞིན་པ་ནི་རྗེས་སུ་ཡི་རང་ཞུ་འོས་པ་ཞིག་རེད།

འདས་པའི་ལོ་མང་རིང་ཕ་རཱན་སིའི་གྲོས་ཚོགས་གོང་འོག་གཉིས་ནང་ཆབ་སྲིད་ཚོགས་པ་ཁག་གིས་བོད་དོན་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱབ་སྐྱོར་གནང་དང་གནང་བཞིན་ཡོད་པས། ང་ཚོས་ཕ་རཱན་སིའི་ཆབ་སྲིད་ཚོགས་པ་ཁག་ལ་ཐུགས་རྗེ་ཆེ་ཞུ་རྒྱུ་ཡིན། ཕ་རཱན་སིར་བོད་དོན་རྒྱབ་སྐྱོར་ཚོགས་པ་མང་ཤོས་ཡོད་པ་མ་ཟད། ཕ་རཱན་སིའི་གཞུང་འཛིན་རིམ་པ་དང་ མི་མང་བཅས་ནས་བོད་མི་དང་བོད་དོན་ལ་རྒྱབ་སྐྱོར་གནང་དང་གནང་བཞིན་ཡོད་སྟབས། ཕ་རཱན་སིའི་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་དང་།

གཞན་ཡང་བཀའ་བློན་མཆོག་གིས་བོད་རྒྱའི་དཀའ་རྙོག་སེལ་ཐབས་སུ་བོད་རྒྱའི་གྲོས་མོལ་བསྐྱར་གསོ་དགོས་པའི་ཛ་དྲག་སྐོར་དང་། ཕ་རཱན་སིའི་སྲིད་འཛིན་ལས་ཐོག་སྐུ་ཞབས་ཨེམ་མེ་ནུལ་མེ་ཁི་རོན་མཆོག་གི་དབུ་ཁྲིད་འོག་ཕ་རཱན་སིའི་གཞུང་གིས་རྒྱབ་སྐྱོར་གནང་བ་ལ་བརྟེན་ནས། ད་ཆ་ཕ་རཱན་སི་ཡིས་ཡུ་རོབ་སྤྱི་མཐུན་ལྷན་ཁང་ (Council of the European Union) གི་གཙོ་འཛིན་གྱི་ལས་ཁུར་གནང་བཞིན་ཡོད། ཅེས་འཁོད་ཡོད།།