༄༅། །ཕྱི་ལོ་ ༢༠༢༢ ཟླ་ ༤ ཚེས་ ༡༣ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྡུ་རུག་ (Durg) མེ་འཁོར་འབབ་ཚུགས་སུ་ཕེབས་འབྱོར་སྐབས་་བྷན་རྡ་ར་ནོར་རྒྱས་གླིང་གི་ས་གནས་འཐུས་ཚོགས་ཀྱི་ཚོགས་གཙོ་དང་། ས་གནས་འགོ་འཛིན། ས་གནས་རང་བདེན་ཚོགས་ཆུང་གི་ཚོགས་གཙོ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་དང་། ཉིན་རྒྱབ་བྷན་རྡ་ར་ནོར་རྒྱས་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་གཞིས་མི་མང་ཚོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།དེ་ཡང་དཔལ་ལྡན་སྲིད་སྐྱོང་མཆོག་གིས་ཉིན་རྒྱབ་གཞིས་དགོན་གཉིས་སུ་མཆོད་མཇལ་དང་། ས་གནས་འགོ་འཛིན་ལས་ཁུངས་དང་། ས་འཐུས་ལས་ཁུངས་དང་ཚོགས་ཁང་། ས་གནས་རང་བདེན་ཚོགས་ཆུང་གི་ལས་ཁུངས། མཉམ་འབྲེལ་ལས་ཁུངས་གསར་རྙིང་། སྤྱི་མི་བརྒྱ་དཔོན་གྱི་ལས་ཁུངས། འབྲས་ཀྱི་བཟོ་གྲྭ་བཅས་པར་འཚམས་གཟིགས་གནང་གྲུབ་རྗེས་ཕྱི་དྲོར་མང་ཚོགས་ལ་གསུང་བཤད་དང་། དྲི་བར་ལན་འདེབས་གནང་ཡོད།ཐོག་མར་ས་གནས་འགོ་འཛིན་སྐལ་བཟང་སྲི་གཅོད་ལགས་ཀྱིས་གཞིས་ཆགས་ཀྱི་སྐོར་ངོ་སྤྲོད་དང་ལས་བསྡོམས་སྙིང་བསྡུས་སྙན་སྒྲོན་ཞུས་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་བོད་ནང་གི་ཛ་དྲག་གནས་སྟངས་དང་། རྒྱ་ནག་གཞུང་གིས་བོད་ཀྱི་སྐད་ཡིག་རྩ་མེད་བཟོ་བཞིན་པའི་སྐོར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་འབེབས་གནང་བའི་གཉིས་སྨན་དབུ་མའི་ལམ་གྱི་སྲིད་བྱུས་འོག་བོད་རྒྱ་གཉིས་ཀྱི་དཀའ་རྙོག་སེལ་ཐབས། ཤེས་རིག་ལས་ཁུངས་ནས་བཙན་བྱོལ་བོད་མིའི་སློབ་གྲྭ་ཁག་རྩིས་ལེན་ཟིན་པ་དང་འབྲེལ་བའི་སློབ་ཕྲུག་གི་ཤེས་ཡོན་དང་མཐུན་རྐྱེན་ཡར་རྒྱས་གཏོང་ཕྱོགས། དེ་བཞིན་སློབ་ཕྲུག་གི་གནས་སྟངས་དང་སློབ་གྲྭ་ཟླ་སྒྲིལ་གཏོང་འཆར་སྐོར། སྡོད་ཁང་མེད་མཁན་རྣམས་ལ་སྡོད་ཁང་མཐུན་འགྱུར་གནང་ཐབས་འབད་བརྩོན་གནང་རྒྱུའི་སྐོར་དང་། གཞོན་སྐྱེས་རྣམས་ནས་ལས་རིགས་སློབ་སྦྱོང་ཐོན་རྗེས་གཞིས་ཆགས་སུ་ཕྱིར་ལོག་བྱུང་ཚེ་སྤྱི་སྒེར་གཉིས་ཀར་ཕན་ཐོགས་ཡོད་པ་མ་ཟད། གཞིས་ཆགས་སྲ་བརྟན་ཡོང་རྒྱུར་དགེ་མཚན་ཡོད་པར་བརྟེན་ལས་འཆར་ཕུགས་འཕེར་ཡོད་ཚེ་ས་གནས་འགོ་འཛིན་དང་མཉམ་དུ་གོ་བསྡུར་གྱིས་ལས་འཆར་གསར་པ་བཟོ་འགོད་དང་འཆར་འབུལ་བྱུང་མཚམས་བོད་མིའི་སྒྲིག་འཛུགས་ཀྱི་ངོས་ནས་མཐུན་སྐྱོར་གནང་རྒྱུར་བསམ་བློ་གཏོང་ཆོག་ཅེས་གསུངས།  གཞན་ཡང་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་འདས་པའི་ཟླ་བ་བཅུའི་ནང་ལས་དོན་ཇི་བྱས་སྐོར་གསུང་དོན། རིང་མིན་མི་འབོར་གྲངས་བཤེར་འགོ་འཛུགས་བྱ་རྒྱུ་དང་།  བོད་རྒྱ་གྲོས་མོལ་དང་བོད་རྒྱ་གཉིས་ཀྱི་དཀའ་རྙོག་སེལ་ཐབས་དང་འབྲེལ་བའི་ཐབས་བྱུས་འཆར་འགོད་ཚོགས་ཆུང་གསར་འཛུགས་གནང་བ། བོད་མིའི་སྒྲིག་འཛུགས་ཀྱི་ལས་བྱེད་ཀྱི་ས་མིག་སྒྲོམ་གཞི་བསྐྱར་སྒྲིག་གནང་བ། ལས་བྱེད་པའི་བླང་དོར་སྒྲིག་གཞིར་བསྐྱར་བཅོས་གནང་བ་སོགས་ཀྱི་སྐོར་གསུངས། ཕྱི་ཚེས་ ༡༤ ཉིན་གྱི་སྔ་དྲོར་དཔལ་ལྡན་སྲིད་སྐྱོང་མཆོག་གིས་གྲོང་སྡེ་དང་པོའི་གཞིས་སློབ་དང་། ཡན་ལག་སྨན་རྩིས་ཁང་། ས་གནས་འཕྲོད་བསྟེན་སྨན་ཁང་བཅས་སུ་འཚམས་གཟིགས་གནང་རྗེས་ཉིན་རྒྱབ་ནཱག་སྤུར་དུ་ཕེབས་འབྱོར་སྐབས་ནཱག་སྤུར་དུ་རྒྱ་གར་བོད་དོན་རྒྱབ་སྐྱོར་ཚོགས་པ་ (Indo- Tibet Friendship Association) དང་། (Bharat Tibat Sahyog Manch) གཉིས་ཀྱི་ཚོགས་མི་རྣམས་ནས་དཔལ་ལྡན་སྲིད་སྐྱོང་མཆོག་ནཱག་སྤུར་དུ་ཐེངས་དང་པོ་ཕེབས་པར་དགའ་བསུ་དང་འཚམས་འདྲིའི་སྣེ་ལེན་ཞུས་ཡོད།སྐབས་དེར་དཔལ་ལྡན་སྲིད་སྐྱོང་མཆོག་གིས་རྒྱ་གར་གཞུང་མང་གཉིས་ནི་བོད་མི་རྣམས་ལ་བཀའ་དྲིན་ཤིན་ཏུ་ཆེན་པོ་ཡིན་པའི་སྐོར་དང་། ཁོང་རྣམ་པས་ལོ་མང་སྔོན་ནས་བོད་དོན་ལ་རྒྱབ་སྐྱོར་གནང་དང་གནང་བཞིན་པར་སྙིང་ཐག་པ་ནས་ཐུགས་རྗེ་ཆེ་ཞེས་གསུངས། དེ་རྗེས་རྒྱ་གར་གསར་འགོད་པའི་བཅར་འདྲི་དང་ལེན་གནང་བ་བཅས་ཐེངས་འདིའི་དཔལ་ལྡན་སྲིད་སྐྱོང་མཆོག་གི་རྒྱ་གར་དབུས་ཁུལ་གྱི་བོད་མིའི་གཞིས་ཆགས་ཁག་གསུམ་དུ་འཚམས་གཟིགས་ཀྱི་ལས་རིམ་ཁག་ཡོངས་སུ་ལེགས་གྲུབ་བྱུང་ཡོད་པ་བཅས། །