༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་དབུས་ཁུལ་གྱི་བོད་མིའི་གཞིས་ཆགས་ཁག་གསུམ་དུ་གཞུང་འབྲེལ་ཕྱོགས་ཕེབས་ཀྱི་མཛད་འཆར་ཁོངས་ཐོག་མར་ཕྱི་ལོ་ ༢༠༢༢་ཟླ་ ༤ ཚེས་ ༨ ཉིན་གྱི་སྔ་དྲོ་རྒྱ་གར་གྱི་རྒྱལ་ས་ལྡི་ལི་ནས་ཕེབས་ཐོན་གྱིས་ཉིན་གུང་ཨོ་ཌི་ཤཱ་མངའ་སྡེའི་རྒྱལ་ས་བྷུབ་ནེཤྭར་དུ་ཕེབས་འབྱོར་སྐབས་གནམ་ཐང་དུ་ཨོ་ཌི་ཤཱ་ཕུན་ཚོགས་གླིང་གི་ས་འཐུས་ཚོགས་གཙོ་དང་། ས་གནས་འགོ་འཛིན། མཉམ་འབྲེལ་དྲུང་ཆེ། ས་གནས་འཕྲོད་བསྟེན་སྨན་ཁང་གི་འགན་འཛིན་དང་སྨན་པ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

ཉིན་རྒྱབ་དཔལ་ལྡན་སྲིད་སྐྱོང་མཆོག་གིས་གཞིས་མི་རྣམས་ལ་ཡུན་རིང་རོགས་རམ་གནང་མཁན་ཨོ་ཌི་ཤཱ་མངའ་སྡེའི་སྤྱི་ཁྱབ་དྲུང་ཆེ་ལས་འཕར་སྐུ་ཞབས་ཨེས་པི་ཋཱ་ཀུར་ (Shri S.P. Thakur) ལགས་དང་མཇལ་འཕྲད་གནང་། དེ་རྗེས་དཔལ་ལྡན་སྲིད་སྐྱོང་མཆོག་ས་གནས་གཞིས་ཆགས་སུ་ཕེབས་ཐོན་གྱིས་ཕྱི་དྲོ་ཕུན་ཚོགས་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་མང་ཚོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།ཕྱི་ཚེས་ ༩ དང་ ༡༠ བཅས་ཉིན་གྲངས་གཉིས་རིང་དཔལ་ལྡན་སྲིད་སྐྱོང་མཆོག་གིས་ཨོ་ཌི་ཤཱ་ཕུན་ཚོགས་གླིང་བོད་མིའི་གཞིས་ཆགས་ཀྱི་དགོན་པ་ཁག་ཏུ་གནས་གཟིགས་དང་། གཞིས་ཆགས་ཀྱི་ལས་ཁུངས་ཁག་དང་རྒས་གསོ་ཁང་། སློབ་གྲྭ། ཡན་ལག་སྨན་རྩིས་ཁང་དང་ས་གནས་འཕྲོད་བསྟེན་སྨན་ཁང་། ལ་རྒྱབ་སོགས་ལ་གཟིགས་བསྐོར་གནང་རྒྱུ་དང་། དེ་བཞིན་མང་ཚོགས་ལ་གསུང་བཤད་དང་དྲི་བ་དྲིས་ལན་གནང་རྒྱུ་ཡིན་པ་མ་ཟད། གཞོན་སྐྱེས་རྣམས་དང་ཟུར་དུ་མཇལ་འཕྲད་གནང་རྒྱུ་སོགས་ཀྱི་མཛད་འཆར་ཡོད་འདུག་པ་བཅས།།