༄༅། །ཉམས་ཞིབ་པ་དང་རྩོམ་པ་པོ་ཤེས་རབ་དར་རྒྱས་ལགས་ཀྱི་གོ་སྒྲིག་འོག་ཕྱི་ལོ་ ༢༠༢༢ ཟླ་ ༤ ཚེས་ ༡ ཉིན་གྱི་སྔ་དྲོ་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་རྨད་བྱུང་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོའི་དཔེ་དེབ་དབུ་འབྱེད་ཀྱི་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བཀའ་ཟུར་ཀིརྟི་རིན་པོ་ཆེ་མཆོག སྐུ་བཅར་རྣམ་རྒྱལ་ཕན་བདེ་ལེགས་བཤད་གླིང་གྲྭ་ཚང་གི་མཁན་ཟུར་བྱ་དོ་རིན་པོ་ཆེ་མཆོག དགའ་ལྡན་ཕོ་བྲང་གི་དྲུང་ཆེ་བློ་བཟང་སྤྱིན་པ་ལགས་བཅས་ཀྱིས་གཙོས་སྐུ་མགྲོན་རྣམ་པ་དང་། དེ་བཞིན་རྡ་ས་ཁུལ་གྱི་གསར་འགོད་པ་སོགས་ཕེབས་ཡོད།
དེ་ཡང་མཛད་སྒོའི་ཐོག་མར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བཀའ་ཟུར་ཀིརྟི་རིན་པོ་ཆེ་མཆོག མཁན་ཟུར་བྱ་དོ་རིན་པོ་ཆེ་མཆོག དགའ་ལྡན་ཕོ་བྲང་གི་དྲུང་ཆེ་བློ་བཟང་སྤྱིན་པ་ལགས་བཅས་ཀྱིས་རྨད་བྱུང་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོའི་དཔེ་དེབ་དབུ་འབྱེད་གནང་གྲུབ་མཚམས་ཉམས་ཞིབ་པ་དང་རྩོམ་པ་པོ་ཤེས་རབ་དར་རྒྱས་ལགས་ཀྱིས་རྨད་བྱུང་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོའི་དཔེ་དེབ་གྲངས་དགུའི་བྱུང་རིམ་གྱི་རྒྱབ་ལྗོངས་སྐོར་ངོ་སྤྲོད་གནང་རྗེས་མཁན་ཟུར་བྱ་དོ་རིན་པོ་ཆེ་མཆོག་གིས་སྤྱིར་བཏང་དུས་འཁོར་རྒྱུད་འགྲེལ་ཟེར་དུས་རྒྱ་ཆེ་མང་ཚོགས་ཀྱི་ངོས་ནས་ཆོས་ཕྱོགས་གཅིག་པུར་འབྲེལ་བ་ཡོད་པའི་དགོངས་ཚུལ་གསུང་གི་ཡོད། འོན་ཀྱང་དུས་འཁོར་རྒྱུད་འགྲེལ་དེ་ཆོས་ཕྱོགས་གཅིག་པུའི་འབྲེལ་བ་མིན་པར་བོད་ཀྱི་ཐུན་མོང་མིན་པའི་ཆོས་དང་རིག་གཞུང་ལ་འབྲེལ་བ་ཡོད། དུས་འཁོར་དེ་བོད་ཀྱི་རིག་གནས་བཅུའི་ཁྲོད་ནས་སྐར་རྩིས་དང་། གསོ་བ་རིག་པ། ནང་དོན་རིག་པ་བཅས་དང་འབྲེལ་བ་ཡོད། ཅེས་སོགས་ཀྱི་གསུང་བཤད་གནང་ཡོད།
དེ་རྗེས་བཀའ་ཟུར་ཀིརྟི་རིན་པོ་ཆེ་མཆོག་གིས་རྨད་བྱུང་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོའི་དཔེ་དེབ་རྩོམ་པོ་གཙོས་པའི་འབྲེལ་ཡོད་མཐུན་འགྱུར་རོགས་རམ་གནང་མཁན་ཡོངས་ལ་ཐུགས་རྗེ་ཆེ་ཞུས་གནང་བ་དང་འབྲེལ་ཀིརྟི་མཚན་ཞབས་རིན་པོ་ཆེའི་སྐོར་ངོ་སྤྲོད་དང་། དེ་བཞིན་དུས་འཁོར་ཁྲིད་རྒྱུན་སྐོར་དེ་སྔ་ཨ་ལགས་ཚེ་བརྟན་ཞབས་དྲུང་ལ་བཀའ་འདྲི་ཞུས་གནང་བ་སོགས་ཀྱི་སྐོར་གསུང་བཤད་གནང་ཡོད། དེ་ནས་དགའ་ལྡན་ཕོ་བྲང་གི་དྲུང་ཆེ་བློ་བཟང་སྤྱིན་པ་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགུང་ལོ་བཅུ་དྲུག་ཐོག་ཆོས་སྲིད་གཉིས་ཀྱི་ཐུགས་འགན་བཞེས་གནང་མཛད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་པ་ནས་བཟུང་ད་བར་བོད་ཀྱི་བསྟན་སྲིད་དོན་དུ་སྐུ་ངལ་འཛེམས་མེད་ཀྱིས་མཛད་པ་འཕྲིན་ལས་རླབས་པོ་ཆེ་ཇི་བསྐྱངས་སྐོར་ངོ་སྤྲོད་མདོར་བསྡུས་ཤིག་གནང་ཡོད།
དེ་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གསུང་བཤད་གནང་གྲུབ་མཚམས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། དུས་རབས་ ༡༣ ནས་ ༡༤ བར་བོད་ཀྱི་ལོ་རྒྱུས་ཐོག་ཆབ་སྲིད་ཉམས་རྒུད་ཕྱིན་ཡོད་ཀྱང་ཆོས་ཕྱོགས་ཀྱི་ཐད་ནས་བཤད་ན་ཧ་ཅང་ཡར་རྒྱས་ཕྱིན་ཡོད། དེ་ནས་ང་ཚོ་བཙན་བྱོལ་ལ་སླེབས་པ་ནས་བཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་ཀྱི་བསྟན་བདག་བླ་ཆེན་རྣམ་པས་བོད་བསྟན་སྲིད་དོན་དུ་སྐུ་ལས་ཧ་ཅང་བསྐྱོན་ཡོད། ང་ཚོས་དཔེ་ཆ་བལྟས་པ་ཙམ་གྱིས་མི་འགྲིག་པར་ཉམས་ལེན་གནང་རྒྱུ་གལ་ཆེན་པོ་ཡིན། ང་ཚོས་དུས་འཁོར་རྒྱུད་འགྲེལ་དེ་དག་མི་ཉམས་རྒྱུན་འཛིན་བྱེད་རྒྱུ་གལ་ཆེན་པོ་ཡིན་ཞེས་དང་།
གཞན་ཡང་དཔལ་ལྡན་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་ཀྱི་བཞེད་དགོངས་བསྒྲུབ་པར་ང་ཚོ་ཚང་མས་ཕྱར་བ་གྲུ་འདེགས་བྱེད་དགོས་པ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་སྙིང་ལ་བཅངས་ནས་ལས་དོན་ཆེ་ཕྲ་ཆུང་གསུམ་གང་ཡིན་ཡང་ལྷོད་གཡེང་མེད་པར་འབད་བརྩོན་གནང་དགོས་པ། ང་ཚོས་ངེས་པར་གོམ་པ་མདུན་སྤོ་རྒྱག་དགོས་པ་སོགས་ཀྱི་སྐོར་གསུང་བཤད་གནང་ཡོད།
མཐར་རྨད་བྱུང་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོ་རྩོམ་སྒྲིག་པ་ཤེས་རབ་དར་རྒྱས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་དང་། ཐེངས་འདིའི་མཛད་སྒོ་དེ་བཞིན་རྨད་བྱུང་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོའི་ཕྱག་དཔེ་དབུ་འབྱེད་དང་༸རྒྱལ་བའི་བཀའ་དྲིན་རྗེས་སུ་དྲན་པ་ཞེས་པའི་བརྗོད་གཞིའི་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་མཛད་རྗེས་ལ་གོང་བཀུར་ཞུ་སླད་མཛད་སྒོ་ཚོགས་པ་ཞིག་ཡིན།
རྨད་བྱུང་དགོངས་བཞེད་ལས་འཁྲུངས་པའི་དུས་འཁོར་རྒྱུད་འགྲེལ་ཆེན་མོ་ནི། ཕྱི་ལོ་ ༢༠༠༠ ལོར་དགའ་ལྡན་ཁྲི་ཟུར་ལ་དྭགས་རི་རྫོང་རིན་པོ་ཆེས་གསོལ་འདེབས་འབུལ་གནང་མཛད་པ་ལྟར་སྐྱབས་རྗེ་ཀིརྟིའི་མཚན་ཞབས་རིན་པོ་ཆེས་དུས་འཁོར་རྒྱུད་འགྲེལ་གྱི་བཤད་ལུང་ཆེན་མོ་གནང་བ་དེ་སྒྲ་འཇུག་ཞུས་པ་ལ་སྒྲ་འཛིན་འཁོར་ཐག་གྲངས་ ༡༤༣ ཡོད་པ་དེ་དག་ཡིག་འབེབས་ཀྱིས་བསྒྲིགས་པ་ལ་ཕྱག་དཔེ་པོད་ ༦ དང་། ཕྱིས་སུ་ཤེས་རབ་དར་རྒྱས་ལགས་ཀྱིས་ཉམས་ཞིབ་གནང་སྟེ་བཀོད་པ་ལ་པོད་ ༢ ། འདོན་ཆོག་གི་རིམ་པ་ནག་འགྲོས་སུ་བཀོད་པ་ལ་པོད་ ༡ བཅས་བསྡོམས་པས་པོད་ ༩ ཡོད་པ་བཅས།།
