༄༅། །ཕྱི་ལོ་ ༢༠༢༢ ཟླ་ ༠༤ ཚེས་ ༠༦ ཉིན་སུད་སིའི་གྲོང་ཁྱེར་ཇི་ནི་ཝར་ཇི་ནི་ཝ་འགྲོ་བ་མིའི་ཐོབ་ཐང་དང་མང་གཙོ་ལྷན་ཚོགས་ཞེས་པའི་ཚོགས་འདུ་ཐེངས་ ༡༤ ཚོགས་ཡོད་པ་དང་། ཚོགས་འདུའི་ཐོག་ཨ་རིའི་བྷོ་སི་ཊོན་སེལ་ཊིག་སི་ (Boston Celtics) རུ་ཁག་ནས་ཡིན་པ་ཨ་རིའི་རྒྱལ་ཡོངས་སིལ་སྤོལ་རྩེད་འགྲན་པ་གྲགས་ཅན་སྐུ་ཞབས་ཨེ་ནེ་སི་ཀེན་ཊར་ (Enes Kanter) ལགས་དང་། བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས། ཡུ་གུར་ལས་འགུལ་ཚོགས་པ་གསར་འཛུགས་གནང་མཁན་དང་ཆབ་སྲིད་བཙོན་པ་རུ་ཞན་ཨ་བྷ་སི་(Rushan Abbas) ལགས། ཧོང་ཀོང་ལྟ་ཞིབ་ཚོགས་པའི་སློབ་སྟོན་པ་ཇོ་ཡེ་སི་ཡུ་ (Joey Siu) ལགས། ད་ལྟའི་ཆབ་སྲིད་བཙོན་པའི་སྐུ་ཚབ་རྣམ་པ། རང་དབང་ལས་འགུལ་བ་སོགས་མཉམ་ཞུགས་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོར་བྲན་གཡོག་ལམ་ལུགས་ལ་ཁ་གཏད་དགེ་རྩ་ཚོགས་པ་གསར་འཛུགས་གནང་མཁན་ལུ་ཀེ་ཌེ་པུལ་ཧྥོར་ཌི་ (Luke de Pulford) ལགས་ཀྱིས་ཚོགས་འདུ་གཙོ་སྐྱོང་འོག་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་རྒྱ་ནག་ནང་འགྲོ་བ་མིའི་ཐོབ་ཐང་འཐབ་རྩོད་ཅེས་པའི་བརྗོད་གཞིའི་ཐོག་གསུང་བཤད་གནང་སྐབས་ཁོང་རང་ཉིད་བོད་ལ་བསྐྱོད་པའི་སྐབས་རྒྱ་ནག་གཞུང་གིས་འཛིན་བཟུང་བྱས་ཏེ་རྡུང་རྡེག་དང་མནར་སྤྱོད་བཏང་བ། འཛམ་གླིང་དམག་ཆེན་གཉིས་པའི་རྗེས་མཉམ་འབྲེལ་རྒྱལ་ཚོགས་གསར་འཛུགས་གནང་བ་དང་འཛམ་གླིང་གི་རྒྱལ་ཁབ་མང་པོར་རང་བཙན་ཐོབ་འགོ་ཚུགས་པ། སྐབས་དེ་དུས་རྒྱ་ནག་དམར་ཤོག་གཞུང་གིས་བོད་ས་ཡོངས་རྫོགས་དབང་བསྒྱུར་བྱས་པ་མ་ཟད། བོད་མི་སྟོང་ཕྲག་མང་པོ་དམར་གསོད་བཏང་ཡོད་ཀྱང་རྒྱལ་སྤྱིའི་ཐོག་ནས་བོད་དོན་སྐོར་ཤེས་རྟོགས་དེ་ཙམ་མེད་པ་དང་། བོད་དོན་སྐོར་ཤེས་རྟོགས་ཡོད་མཁན་ཚོ་རྒྱ་ནག་གི་ཕྱོགས་གཏོགས་སུ་ལངས་ཡོད་པ་སོགས་ཀྱི་སྐོར་གསུང་བཤད་གནང་ཡོད། གཞན་ཡང་ཁོང་གིས་ད་ལྟའི་རྒྱ་ནག་གི་སའི་རྒྱ་ཁྱོན་བརྒྱ་ཆ་ ༦༠ ཙམ་རྒྱ་ནག་དམར་ཤོག་གཞུང་གིས་དབང་བསྒྱུར་བྱས་པའི་ལུང་པ་ཡིན་པ་དང་། རྒྱ་ནག་གི་སྲིད་དབང་སྒེར་འཛིན་འོག་བོད་མི་ཙམ་མ་ཟད། རྒྱ་རིགས་རྣམས་ཀྱིས་ཀྱང་དཀའ་སྡུག་མྱོང་བཞིན་པ། འཛམ་གླིང་གི་རྒྱལ་ཁབ་ཁག་གིས་སོ་སོ་རྒྱལ་ཁབ་ཀྱི་ཚོང་གི་ཁེ་ཕན་དོན་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་སྟེ་རྒྱ་ནག་དང་མཉམ་དུ་ཚོང་འབྲེལ་བྱེད་བཞིན་པ་སོགས་ཀྱི་སྐོར་གསུངས་པ་དང་འབྲེལ་འགྲོ་བ་མིའི་ཐོབ་ཐང་སྲུང་སྐྱོབ་པ་དང་རང་དབང་ལས་འགུལ་བ་རྣམས་ལ་གདུང་སེམས་མཉམ་སྐྱེ་དང་རྒྱབ་སྐྱོར་གནང་དགོས་པའི་གལ་གནད་སྐོར་གསུངས་ཡོད། སུད་སི་བོད་ཀྱི་བུད་མེད་ཚོགས་པས་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱི་གསུང་བཤད་ལས་རིམ་ལ་མཐུན་འགྱུར་རོགས་རམ་གནང་ཡོད་པ་བཅས།།