༄༅། །འདི་ལོའི་ལོ་སྟོད་དུ་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་འདུ་ཐེངས་ ༤༩ པ་འཚོགས་བཞིན་པའི་སྐབས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གིས་འདི་ལོའི་ཕྱི་ཟླ་ ༥ ནང་ཁོང་རྒྱ་ནག་དང་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་ནང་གཟིགས་སྐོར་དུ་ཕེབས་རྒྱུའི་གསལ་བསྒྲགས་སྤེལ་ཡོད་པ་དེར་བོད་མིའི་སྒྲིག་འཛུགས་ཀྱི་ངོས་ནས་དགའ་བསུ་ཞུ་བཞིན་ཡོད།
བོད་མིའི་སྒྲིག་འཛུགས་ནས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་ཤར་ཏུར་ཀི་སི་ཐན་ནང་ཆེད་ཕེབས་ཀྱིས་འགྲོ་བ་མིའི་ཐོབ་ཐང་ལ་རྟོག་ཞིབ་དང་། ཡུ་གུར་མི་མང་གི་དཀའ་ངལ་ངོ་མ་གང་ཡིན་སེལ་ཐབས་གནང་རྒྱུའི་ཡིད་ཆེས་བྱེད་ཀྱི་ཡོད་ལ། ཡུ་གུར་ནང་གི་ཛ་དྲག་གི་གནས་སྟངས་ལ་མཐའ་གཅིག་ཏུ་ངོ་རྒོལ་ཤུགས་ཆེ་གནང་དགོས། འབྱུང་འགྱུར་གྱི་གཟིགས་སྐོར་སྐབས་ལྕམ་སྐུ་མཆོག་གིས་རྒྱ་ནག་གཞུང་གིས་རྒྱ་སྐྱེད་རིང་ལུགས་ཀྱི་སྲིད་བྱུས་སྤེལ་བཞིན་པའི་ཉེན་ཁ་དང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་རྣམས་སེལ་ཐབས་གནང་དགོས། རྒྱ་ནག་གཞུང་གིས་ཁྲིམས་འགལ་ཐོག་བོད་ནང་དབང་བསྒྱུར་བྱས་པ་ནས་བཟུང་ད་བར་ནོར་འཁྲུལ་ཅན་གྱི་སྲིད་བྱུས་རིམ་པ་ཁག་ལག་བསྟར་བྱས་ཏེ་བོད་མིའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་གི་ཡོད། ལྷག་པར་རྒྱ་ནག་གཞུང་གིས་བོད་ནང་དྲག་གནོན་བྱས་དང་བྱེད་བཞིན་ཡོད་སྟབས། ད་བར་བོད་མི་གྲངས་ ༡༥༨ ལྷག་གིས་རང་ལུས་མེར་སྲེག་བཏང་སྟེ་བོད་ནང་རང་དབང་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་ཞེས་ཞི་བའི་སྒོ་ནས་ངོ་རྒོལ་གྱིས་སྐད་འབོད་གནང་ཡོད།
རྒྱ་ནག་གཞུང་གིས་བོད་ནང་ཡར་རྒྱས་དང་དབུལ་ཕོངས་ཀྱི་དཀའ་ངལ་སེལ་རྒྱུར་ཁ་གཡར་ནས་ད་བར་བོད་མི་འབྲོག་པ་གྲངས་ས་ཡ་གཉིས་ལྷག་རང་གི་ཕ་མེས་ཡང་མེས་ཀྱི་རྩྭ་ཐང་ནས་བཙན་དབང་གིས་གྲོང་ཁྱེར་དང་གྲོལ་རྡལ་ཁག་གིས་གཙོས་ས་ཁུལ་གཞན་ལ་གནས་སྤོ་བཅུག་ཡོད་པ་མ་ཟད། དེ་སྔ་བོད་ཡིག་ལམ་ནས་སློབ་ཁྲིད་བྱེད་བཞིན་པའི་བོད་མིའི་སློབ་གྲྭ་ཁག་བཙན་གྱིས་སྒོ་རྒྱག་ཏུ་བཅུག་སྟེ་བོད་ཡིག་གི་ལམ་ནས་སློབ་ཁྲིད་བྱེད་རྒྱུའི་ཚབ་ཏུ་རྒྱ་ཡིག་གི་ལམ་ནས་སློབ་ཁྲིད་བྱེད་དུ་འཇུག་གི་ཡོད། ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༸པཎ་ཆེན་ཆུང་སྲིད་རིན་པོ་ཆེ་འཛིན་བཟུང་བཙན་འཕྲོག་བྱས་རྗེས་ད་བར་གར་སོང་ཆ་མེད་དུ་གྱུར་ཡོད་པ་ནི་བོད་མི་ཙམ་མ་ཟད། འཛམ་གླིང་གི་ནང་པ་ཡོངས་ནས་ཐུགས་འཚབ་གནང་གི་ཡོད།
འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་མཁས་མི་སྣ་དྲུག་ལས་གྲུབ་པའི་ཚོགས་པས་ཕྱི་ལོ་ ༢༠༢༢ ཟླ་བ་ ༠༢ ནང་རྒྱ་ནག་གཞུང་ལ་བཏང་བའི་ཡིག་འབྲེལ་ནང་རྒྱ་ནག་གཞུང་གིས་བོད་ཀྱི་རྩོམ་པ་པོ་བློ་བཟང་ལྷུན་གྲུབ་ལགས་དང་། གཞས་པ་ལྷུན་གྲུབ་གྲགས་པ་ལགས། དགེ་རྒན་རིན་ཆེན་སྐྱིད་ལགས་བཅས་བཙན་བཟུང་བཀག་ཉར་དང་གར་སོང་ཆ་མེད་བཏང་བར་བློ་འཚབ་དང་རྒྱ་གཞུང་ནས་རྒྱུ་མཚན་གསལ་བཤད་དགོས་པའི་རེ་འདུན་བཏོན་ཡོད་པ་དེས་བོད་ནང་གི་བོད་མི་སྤྱི་དང་། ལྷག་པར་བོད་པའི་སྲོལ་རྒྱུན་རིག་གཞུང་དང་། བོད་ཀྱི་སྐད་ཡིག་བཅས་སྲུང་སྐྱོབ་ཀྱི་ལས་འགུལ་སྤེལ་མཁན་དང་། དེ་བཞིན་རྒྱ་ནག་གཞུང་གི་སྲིད་བྱུས་ཁག་གི་སྐོར་གླེང་སློང་གནང་མཁན་བོད་མི་ཡོངས་ལ་ཉིན་རེ་བཞིན་དྲག་གནོན་གྱི་དཀའ་ངལ་འཕྲད་བཞིན་ཡོད་པ་གསལ་རྗེན་དུ་བསྟན་ཡོད། བོད་ནང་གི་གནས་སྟངས་ཉིན་རེ་བཞིན་ཇེ་སྡུག་ཇེ་ཞན་དུ་འགྲོ་བཞིན་ཡོད་པ་མ་ཟད། བོད་ཀྱི་སྲོལ་རྒྱུན་རིག་གཞུང་དང་ངོ་བོ་རྣམས་རིམ་བཞིན་རྩ་བརླག་ཏུ་འགྲོ་བཞིན་ཡོད། དེར་བརྟེན་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གིས་བོད་ལ་གཟིགས་སྐོར་དུ་ཕེབས་ཏེ་བོད་ནང་གི་ཛ་དྲག་གི་དངོས་ཡོད་གནས་སྟངས་ལ་དོན་ཕན་ལྡན་པའི་རྟོག་ཞིབ་ནན་མོ་གནང་དགོས་པ་ཆགས་ཡོད།
དེ་ཡང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གསུང་དོན། ང་ཚོའི་ངོས་ནས་དེ་སྔ་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེལེ་བྷཤེ་ལེཌི་ (Michelle Bachelet) མཆོག་ལ་བོད་ནང་ངེས་པར་གཟིགས་སྐོར་དུ་ཕེབས་དགོས་པའི་ཞུ་ཡིག་ཅིག་ཕུལ་ཡོད་ཀྱང་ད་བར་ལྕམ་སྐུ་མཆོག་གིས་བརྡ་ལན་ཁ་གསལ་ཞིག་གནང་མེད་སྟབས། ང་ཚོས་ཧ་ཅང་སེམས་འཚབ་བྱེད་ཀྱི་ཡོད། ད་ལྟའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གིས་དེ་སྔའི་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་རྣམ་པ་ཚོ་ནང་བཞིན་མ་ཡིན་པར་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་གླེང་སློང་གནང་གི་མེད་པས། ང་ཚོས་ཧ་ཅང་སེམས་འཚབ་བྱེད་ཀྱི་ཡོད།
མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་དང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་ཁུངས་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྟོག་ཞིབ་དང་། དེ་བཞིན་བོད་ནང་གི་ཛ་དྲག་གི་གནས་སྟངས་དང་དྲག་གནོན་གྱི་དཀའ་ངལ་སེལ་རྒྱུའི་འགན་འཁུར་ཡོད། མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་གིས་སྔར་ལས་ལྷག་བོད་ནང་གི་འགྲོ་བ་མིའི་ཐོབ་ཐང་དང་རང་དབང་། དེ་བཞིན་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་འགྲོ་བ་མིའི་ཐོབ་ཐང་དང་རང་དབང་གི་ཆེད་དུ་བཟང་ཕྱོགས་ཀྱི་བརྡ་ལན་དང་རེ་བ་ཞིག་ངེས་པར་བསྐྲུན་དགོས།
དེར་བརྟེན་ང་ཚོས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་ལ་འབྱུང་འགྱུར་གྱི་གཟིགས་སྐོར་སྐབས་བོད་ཚུད་པའི་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་ནང་ངེས་པར་གཟིགས་སྐོར་དུ་ཕེབས་རྒྱུའི་རེ་སྐུལ་སླར་ཡང་ནན་ཏན་དུ་ཞུ་རྒྱུ་ཡིན། ཞེས་གསུངས། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཕྱི་ལོ་ ༢༠༢༢ ཟླ་ ༤ ཚེས་ ༢༩ ལ།།
