༄༅། །ཕྱི་ལོ་ ༢༠༢༢ ཟླ་ ༣ ཚེས་ ༡༠ ཉིན་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ལྕམ་སྐུ་ཀིམ་བྷར་ལེ་ཀིཊ་ཆིན་ (Kimberley Kitching) མཆོག་སྐུ་ཚེའི་འཕེན་པ་རྫོགས་པར་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་དམ་པ་དེ་ཉིད་ཀྱི་སྐུ་ཟླ་སྐུ་ཞབས་ཨན་ཌི་རེའོ་ལན་ཌར་ཡོ་ (Andrew Landeryou) ལགས་ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན། སྐུ་ཉིད་ཀྱི་བརྩེ་བའི་སྐུ་ཟླ་ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་གློ་བུར་དུ་སྐུ་ཚེའི་འཕེན་པ་རྫོགས་པའི་ཡིད་སྐྱོ་བའི་གནས་ཚུལ་གོ་ཐོས་བྱུང་བས་ཧ་ཅང་བློ་ཕམ་བྱུང་། ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་གློ་བུར་དུ་སྐུ་ཚེའི་འཕེན་པ་རྫོགས་པ་ནི་བོད་མི་རྣམས་ལ་མཚོན་ན་བོད་དོན་ལ་རྒྱུན་དུ་རྒྱབ་སྐྱོར་ཤུགས་ཆེ་གནང་མཁན་གྱི་བློ་ཐུབ་ཀྱི་གྲོགས་པོ་ཞིག་མེད་པ་ཆགས་ཡོད། ཅེས་དང་།
ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་གིས་འགྲོ་བ་མིའི་ཐོབ་ཐང་དང་རང་དབང་གི་དོན་དུ་སྐུ་ངལ་འཛེམས་མེད་ཀྱིས་སྐུ་ལས་བསྐྱོན་ཡོད་ལ། དམ་པ་ཁོང་གིས་ཨོསྟྲེ་ལི་ཡཱའི་གཞུང་ནས་རང་གི་མི་མང་ལ་གཟིགས་རྟོག་གནང་དགོས་པའི་ཐུགས་ཁུར་གནང་ཡོད།དམ་པ་ཁོང་སྐུ་ཚེའི་འཕེན་པ་རྫོགས་པ་ནི་ཨོསྟྲེ་ལི་ཡཱའི་མི་མང་ལ་མཚོན་ན་རླབས་ཆེན་གྱི་དབུ་ཁྲིད་ཅིག་མེད་པ་ཆགས་ཡོད། ང་ཚོས་དམ་པ་ཁོང་དང་ཨོསྟྲེ་ལི་ཡཱའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་བཞི་བཅས་ཕྱི་ལོ་ ༢༠༡༧ ལོར་བཞུགས་སྒར་རྡ་སར་ཕེབས་ཏེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་དང་། བོད་མིའི་སྒྲིག་འཛུགས་ཀྱི་དབུ་ཁྲིད་རྣམ་པར་མཇལ་འཕྲད་ཞུས་གནང་བ་དེ་དྲན་སོས་ཀྱི་འདུག
དམ་པ་ཁོང་གིས་ད་བར་བོད་དོན་ལ་རྒྱབ་སྐྱོར་གནང་བ་དེ་བོད་མི་ཡོངས་ཀྱིས་དུས་རྟག་ཏུ་དྲན་ངེས་ཡིན། ང་ཚོས་ལྷག་བསམ་རྣམ་དག་གིས་ཐུགས་གསོ་ཞུ་རྒྱུ་ཡིན། ཞེས་འཁོད་འདུག་པ་བཅས།།