༄༅། །འཛམ་གླིང་ཁྱོན་ཡོངས་སུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཕྱི་ལོ་ ༢༠༢༢ ཟླ་བ་ ༠༣ ཚེས་ ༡༠ ཉིན་བོད་མིའི་རང་དབང་སྒེར་ལངས་ཐེངས་ ༦༣ སྲུང་བརྩི་ཞུས་ཡོད་པ་ལྟར། ཨིན་ཡུལ་ལོན་ཊོན་ཤར་ཕྱོགས་སུ་ཝུལ་ཝི་ཆ་ཚོགས་ཁང་ (Woolwich Town Hall) དུ་གི་རིན་ཝི་ཆའི་ (Greenwich) གྲོང་སྡེའི་སྤྱི་ཁྱབ་གྲེ་ནེ་སི་ཧེ་ལེན་ (Denise Hyland) ལགས་དང་། སྤྱི་ཁྱབ་གཞོན་པ་གྲེ་ནི་ཐོར་པེ་ (Danny Thorpe) ལགས། སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་བཅས་དབུ་བཞུགས་ཐོག་དུས་དྲན་སྲུང་བརྩི་ཞུས་ཡོད། 

མཛད་སྒོའི་ཐོག་མར་འཛམ་གླིང་ཞི་བདེ་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བརྟན་པའི་ཞབས་བརྟན་སྨོན་ཚིག་གསུང་འདོན་གནང་གྲུབ་རྗེས་བོད་རྒྱལ་ཁབ་ཆེན་པོའི་རྒྱལ་གླུ་དང་བཅས་གྲོང་སྡེའི་སྤྱི་ཁྱབ་དང་སྐུ་ཚབ་དོན་གཅོད་རྣམ་གཉིས་ཀྱིས་རྒྱལ་དར་བསྒྲེངས་འཛུགས་གནང་། སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་མཛད་སྒོའི་ཐོག་གྲོང་སྡེའི་སྤྱི་ཁྱབ་དང་སྤྱི་ཁྱབ་གཞོན་པ་རྣམ་པས་བོད་མིར་གདུང་སེམས་མཉམ་སྐྱེ་དང་བོད་དོན་ལ་རྒྱབ་སྐྱོར་མུ་མཐུད་གནང་བར་ཐུགས་རྗེ་ལེགས་འབུལ་ཞུས་ཤིང་། གྲོང་སྡེའི་སྤྱི་ཁྱབ་ཀྱིས་ཀྱང་ཚོགས་བཅར་བ་རྣམས་གསོལ་ཇར་མགྲོན་འབོད་གནང་བ་མ་ཟད། བོད་མིར་རྒྱབ་སྐྱོར་མུ་མཐུད་གནང་རྒྱུ་ཡིན་པའི་ཞལ་བཞེས་གནང་ཡོད། 

བོད་དང་གཉའ་གནོན་འོག་ཡོད་པའི་གྲངས་ཉུང་མི་རིགས་ཆེད་གོ་ལ་ཡོངས་ཀྱི་མཐུན་སྒྲིག་ཚོགས་པ་གསར་འཛུགས་པ་ཚེ་རིང་པ་སངས་ལགས་དང་གི་རིན་ཝི་ཆ་གནས་སྡོད་པ་རྣམས་ཀྱིས་གི་རིན་ཝི་ཆ་བོད་རིགས་སྤྱི་མཐུན་ཚོགས་པའི་ཚབ་ཞུས་ཏེ་གྲོང་སྡེའི་སྤྱི་ཁྱབ་དང་སྤྱི་ཁྱབ་གཞོན་པས་བོད་དོན་ལ་རྒྱབ་སྐྱོར་མུ་མཐུད་གནང་བར་ཐུགས་རྗེ་ཆེ་ཞུས་ཤིང་། མཛད་སྒོར་ས་གནས་སུ་ཡོད་པའི་བོད་མི་རྣམས་མཉམ་ཞུགས་གནང་ཡོད།

ཨིན་ཡུལ་སྐུ་ཚབ་དོན་ཁང་ནས་ཚེ་རིང་པ་སངས་ལགས་ཀྱིས་གི་རིན་ཝི་ཆ་བོད་རིགས་སྤྱི་མཐུན་ཚོགས་པའི་ངོས་ནས་མཛད་སྒོ་གོ་སྒྲིག་གནང་བར་ཐུགས་རྗེ་ཆེ་ཞུས་ཡོད་པ་བཅས།།