༄༅། །ཕྱི་ལོ་ ༢༠༢༢ ཟླ་ ༣ ཚེས་ ༢༡ ཉིན་ཨ་རིའི་རོགས་ཚོགས་ (USAID) ཀྱི་སྐུ་ཚབ་ཚོགས་ཆུང་ཞིག་བཞུགས་སྒར་རྡ་སར་ཉིན་གྲངས་བཞིའི་རིང་གཟིགས་སྐོར་དུ་ཕེབས་ཡོད།

དེ་ཡང་ཨ་རིའི་རོགས་ཚོགས་ (USAID) ཀྱི་སྐུ་ཚབ་ཚོགས་ཆུང་ཀངྒ་ར་གནམ་ཐང་དུ་ཕེབས་འབྱོར་སྐབས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩའི་འབྲེལ་ཡོད་ལས་བྱེད་རྣམ་པས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

ཐེངས་འདིའི་གཟིགས་སྐོར་སྐབས་ཨ་རིའི་རོགས་ཚོགས་ཀྱི་སྐུ་ཚབ་ཚོགས་ཆུང་གིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་རྣམ་པར་མཇལ་འཕྲད་གནང་རྒྱུ་ཡིན་པ་མ་ཟད། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་དང་། ནང་སྲིད་ལས་ཁུངས། འཕྲོད་བསྟེན་ལས་ཁུངས། དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་འཕེལ་ཚན་པ། བོད་ཀྱི་འགྲེམས་སྟོན་ཁང་། ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པའི་ཡན་ལག་བོད་མིའི་མདུན་ལམ་སློབ་སྟོན་ཁང་། བོད་ཀྱི་ཟློས་གར་ཚོགས་པ། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། གོ་པལ་པུར་བོད་ཁྱིམ། སྦིར་བོད་མིའི་གཞིས་ཆགས་སོགས་ལ་གཟིགས་སྐོར་དུ་ཕེབས་རྒྱུ་ཡིན་འདུག་པ་བཅས།།