༄༅། །འདི་གར་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་བཏང་གནས་ནང་འཁོད་དོན། ཨ་རི་བོད་ཀྱི་ཐེབས་རྩའི་འགན་འཛིན་བཀའ་ཟུར་བློ་བཟང་སྙན་གྲགས་མཆོག་དང་འགན་འཛིན་གཞོན་པ་བྷོབ་ཨེན་ཀར་སོན་ (Bob Ankerson) ལགས་རྣམ་གཉིས་ཕྱི་ལོ་ ༢༠༢༢ ཟླ་ ༣ ཚེས་ ༢༨ ཉིན་གྱི་སྔ་དྲོ་ནང་སྲིད་ལས་ཁུངས་སུ་ཆེད་ཕེབས་ཀྱིས་ནང་སྲིད་དྲུང་ཆེ་གཙོས་པའི་དྲུང་འཕར་དང་ཚན་པའི་འགན་འཛིན་རྣམས་ཚང་འཛོམས་ཐོག་བོད་ཀྱི་ཐེབས་རྩ་བརྒྱུད་རོགས་དངུལ་གནང་འབྱོར་ལས་འཆར་ཁག་དང་མ་འོངས་ལས་དོན་བྱེད་སྒོ་སོགས་ལ་བཀའ་བསྡུར་ལྷུག་པོ་བྱུང་ཡོད།དེ་ཡང་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་སྐུ་མགྲོན་རྣམ་གཉིས་ལ་འཚམས་འདྲི་དང་སྦྲགས་ནང་སྲིད་ལས་ཁུངས་ཀྱི་སྤྱི་ཡོངས་ཀྱི་སྒྲོམ་གཞི་དང་སྡེ་ཚན་དང་ཚན་པ་སོ་སོའི་ལས་དོན་བྱེད་ཕྱོགས་སྐོར་ངོ་སྤྲོད་གནང་། ཚན་པའི་འགན་འཛིན་སོ་སོའི་ངོས་ནས་ལས་འཆར་དང་འབྲེལ་བའི་དགོངས་འཆར་དང་རོགས་དངུལ་ལེན་བེད་བྱེད་སྒོ་ཁག་བོད་མིའི་སྒྲིག་འཛུགས་ཀྱི་སྒྲིག་གཞི་ལམ་སྟོན་སྐོར་བཀའ་བསྡུར་སྦྱངས་བཤད་གནང་།

ནང་སྲིད་དྲུང་ཆེ་ནས་ལོ་མང་རིང་བོད་ཀྱི་ཐེབས་རྩ་ནས་བོད་མིའི་གཞིས་ཆགས་ཁག་ཚགས་ཚུད་དང་རྒྱུན་གནས་ཐོག་མཐུན་འགྱུར་གནང་བར་ཐུགས་རྗེ་ཆེ་ཞུ་བ་དང་ཆབས་ཅིག་མ་འོངས་ནང་སྲིད་ལས་འཆར་ཁག་ལ་རྒྱབ་སྐྱོར་མུ་མཐུད་གནང་ཕྱོགས་འབོད་སྐུལ་ཞུས་གནང་ཡོད་པ་བཅས། །