༄༅། །ཕྱི་ལོ་ ༢༠༢༢ ཟླ་ ༣ ཚེས་ ༤ ཉིན་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཉེ་ཆར་གསར་དུ་བདམས་ཐོན་བྱུང་བའི་ཡུ་རོབ་གྲོས་ཚོགས་ཀྱི་ཚོགས་གཙོ་ལྕམ་སྐུ་རོ་བྷར་ཊཱ་མེཊ་སོ་ལཱ་ (Ms. Roberta Metsola) མཆོག་གི་འཛིན་སྐྱོང་འགན་འཛིན་ཅེའོ་ཀེ་ཊི་ (Alessandro Chiocchetti) ལགས་དང་མཇལ་འཕྲད་གནང་ཡོད།

དེ་ཡང་ཆུ་ཚོད་ཕྱེད་ཀ་ཙམ་གྱི་མཇལ་མོལ་སྐབས་ཁོང་རྣམ་གཉིས་ནས་༸གོང་ས་ཏཱ་ལའི་བླ་མ་མཆོག་གི་སྐུ་གཟུགས་གནས་སྟངས་དང་། ཐུན་མོང་གི་ཁེ་ཕན་སོགས་ཀྱི་གནད་དོན་སྐོར་གྲོས་བསྡུར་གནང་ཡོད།

སྐབས་དེར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཅེའོ་ཀེ་ཊི་ལགས་ལ་ཐུགས་རྗེ་ཆེ་ཞུས་གནང་བ་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་གྲོས་ཚོགས་ཀྱི་ཚོགས་གཙོ་ལྕམ་སྐུ་རོ་བྷར་ཊཱ་མེཊ་སོ་ལཱ་ (Ms. Roberta Metsola) མཆོག་ལ་སྩལ་བའི་འཚམས་འཕྲིན་དེ་ཉིད་ཕུལ་ཡོད།

མཇལ་འཕྲད་སྐབས་ཨེ་ཤི་ཡ་དང་དབུས་ཤར་ཁུལ་གྱི་འགན་འཁུར་བ་ཀོ་ལེར་ (Köller) ལགས་དང་བེལ་ཇི་ཡམ་སྐུ་ཚབ་དོན་གཅོད་ཁང་གི་ལས་བྱེད་རིག་འཛིན་ཆོས་སྒྲོན་ལགས་ཀྱང་ལྷན་ཞུགས་གནང་ཡོད་པ་བཅས།།