༄༅། །ཕྱི་ལོ་ ༢༠༢༢ ཟླ་ ༣ ཚེས་ ༢༥ ཉིན་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་རྟེན་གཞི་བྱས་པའི་སྨན་རྩིས་གསོ་རིག་མཐོ་སློབ་ཁང་གིས་བོད་ཀྱི་སྨན་རྩིས་ཁང་དབུ་བརྙེས་ནས་ལོ་ངོ་ ༡༠༦ འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་ཡོད། དུས་དྲན་མཛད་སྒོར་སྐུ་མགྲོན་གཙོ་བོ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། ༸ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་ཟླ་བ་ཚེ་རིང་ལགས། སྦེང་ལོར་སྨན་རྩིས་གསོ་རིག་མཐོ་སློབ་ཁང་གི་དགེ་ལས་སློབ་ཕྲུག་སོགས་ཕེབས་ཡོད།
དེ་ཡང་མཛད་སྒོའི་ཐོག་སྦེང་ལོར་སྨན་རྩིས་གསོ་རིག་མཐོ་སློབ་ཁང་གི་སློབ་སྤྱི་པ་སངས་དབང་འདུས་ལགས་ཀྱིས་མཛད་སྒོ་དབུ་འབྱེད་གསུང་བཤད་དང་ལོ་འཁོར་ལས་བསྡོམས་སྙན་སྒྲོན་ཞུས་གནང་ཡོད། དེ་རྗེས་སྐུ་མགྲོན་གཙོ་བོ་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་བོད་ཀྱི་རིག་གཞུང་དང་སྐད་ཡིག་མི་ཉམས་རྒྱུན་འཛིན་ཇི་ལྟར་གནང་དགོས་པའི་སྐོར་གསུང་བཤད་གནང་བ་དང་འབྲེལ་སྦེང་ལོར་སྨན་རྩིས་གསོ་རིག་མཐོ་སློབ་ཁང་གི་སློབ་ཕྲུག་རྣམས་ཀྱིས་བོད་ཀྱི་སྲོལ་རྒྱུན་གཞས་སྣ་འཁྲབ་སྟོན་གཟིགས་འབུལ་ཞུས་པར་རྗེས་སུ་ཡི་རང་ཞུས་གནང་ཡོད།
མཐར་སྦེང་ལོར་སྨན་རྩིས་གསོ་རིག་མཐོ་སློབ་ཁང་གི་སློབ་སྤྱི་གཞོན་པ་བསོད་ནམས་དཔལ་མོ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས། །
