༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ཕྱི་སྲིད་དྲུང་ཆེ་ཟུར་པ་ལྕམ་སྐུ་མ་ཌིལ་ལིན་ཨལ་བ་རེཌེ་ (Madeleine Albright) མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་གསན་རྗེས་དམ་པ་དེ་ཉིད་ཀྱི་སྲས་མོ་ཨེ་ལི་སི་པེ་ཊར་སན་ (Alice Patterson Albright) ལགས་ལ་ཐུགས་གསོ་གནང་བའི་ནང་འཁོད་དོན། སྐུ་ཉིད་ཀྱི་ཡུམ་དམ་པ་དེ་ཉིད་ནི་ཨ་རིའི་བུད་མེད་ཕྱི་སྲིད་དྲུང་ཆེ་ཐོག་མ་དེ་ཡིན་པ་མ་ཟད། ཁོང་གིས་ཨ་རི་ཕྱི་སྲིད་དྲུང་ཆེའི་ཐུགས་འགན་བཞེས་པའི་རིང་འབུར་དུ་ཐོན་པའི་ཕྱག་ལས་གནང་ཡོད།

དམ་པ་དེ་ཉིད་ལ་ཨ་རིའི་སྲིད་འཛིན་ཟུར་པ་བྷ་རག་ཨོ་བྷ་མ་ (Barack Obama) མཆོག་གིས་སྲིད་འཛིན་གྱི་རང་དབང་རྟགས་མ་ (Presidential Medal of Freedom) ཞེས་པ་ཕུལ་བ་དེས་མི་གཞན་རྣམས་ཀྱང་དམ་པ་དེ་ཉིད་ཀྱི་རྗེས་སུ་འབྲངས་རྒྱུར་རླབས་ཆེན་གྱི་སེམས་ཤུགས་སྐྱེད་དུ་བཅུག་ཡོད། ངོས་ལ་མཚོན་ན་འདས་པའི་དུས་ཡུན་ནང་ཨ་རིར་དམ་པ་ཁོང་དང་མཇལ་འཕྲད་ཀྱི་གོ་སྐབས་ཐེངས་འགའ་བྱུང་མྱོང་ཡོད་པ་མ་ཟད། ཐེངས་གཅིག་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པི་རག་ (Prague) ནང་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་སྐུ་ཞབས་ཝག་ལེབ་ཧ་བེལ་ (Vaclav Havel) མཆོག་དང་ལྷན་ཁོང་དང་མཇལ་འཕྲད་ཀྱི་གོ་སྐབས་བཟང་པོ་བྱུང་། དམ་པ་ཁོང་གི་ནང་མིའི་རྒྱབ་ལྗོངས་ནི་སྐྱབས་བཅོལ་བ་ཡིན་སྟབས། ཁོང་གིས་འགྲོ་བ་མི་གཞན་གྱི་རང་དབང་དང་བདེ་དོན་ལ་ཐུགས་ཁུར་དང་རྒྱབ་སྐྱོར་ཤུགས་ཆེ་གནང་ཡོད། ཅེས་འཁོད་ཡོད།།