༄༅། །ཕྱི་ལོ་ ༢༠༢༢ ཟླ་ ༣ ཚེས་ ༡༠ ཉིན་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ལྕམ་སྐུ་ཀིམ་བྷར་ལེ་ཀིཊ་ཆིན་ (Kimberley Kitching) མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༢ ཟླ་ ༣ ཚེས་ ༡༢ ཉིན་དམ་པ་དེ་ཉིད་ཀྱི་སྐུ་ཟླ་སྐུ་ཞབས་ཨན་ཌི་རེའོ་ལན་ཌར་ཡོ་ (Andrew Landeryou) ལགས་ལ་ཐུགས་གསོའི་གསུང་འཕྲིན་སྩལ་བའི་ནང་འཁོད་དོན། སྐུ་ཉིད་ཀྱི་སྐུ་ཟླ་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་དང་ང་ཚོའི་མཛའ་གྲོགས་ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་གློ་བུར་དུ་སྐུ་ཚེའི་འཕེན་པ་རྫོགས་པའི་གནས་ཚུལ་ཤེས་རྟོགས་བྱུང་བས་བློ་ཕམ་བྱུང་། ངོས་ཀྱིས་དམ་པ་དེ་ཉིད་ལ་ཐུགས་སྨོན་དང་། སྐུ་ཉིད་ཀྱིས་གཙོས་ནང་མི་ཡོངས་ལ་ཐུགས་གསོ་ཞུ་རྒྱུ་ཡིན།
ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་ནི། བོད་མིའི་བློ་ཐུབ་ཀྱི་མཛའ་གྲོགས་ཞིག་ཡིན་པ་མ་ཟད། བོད་དོན་ལ་རྒྱབ་སྐྱོར་གཡོ་བ་མེད་པར་གནང་མཁན་ཞིག་ཀྱང་ཡིན། སྐུ་ཉིད་ཀྱིས་མཁྱེན་གསལ་ལྟར། དམ་པ་དེ་ཉིད་ཕྱི་ལོ་ ༢༠༡༧ ལོར་ཨོསྟྲེ་ལི་ཡཱའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་དང་ལྷན་རྡ་སར་ཕེབས་པའི་སྐབས་ངོས་ཀྱིས་མཇལ་འཕྲད་ཞུ་རྒྱུའི་གོ་སྐབས་བྱུང་། ཐུགས་སྨོན་དང་བཅས། ཞེས་འཁོད་ཡོད།།
