༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༣ ཚེས་ ༡༤ ནས་བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་གཉིས་པ་འཚོགས་བཞིན་ཡོད་པ་ལྟར། དེ་རིང་ཟླ་ ༣ ཚེས་ ༡༥ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དབུ་བཞུགས་ཐོག་གྲོས་ཚོགས་ཚོགས་དུས་གཉིས་པའི་ལས་ཉིན་གཉིས་པ་ཚོགས་གནང་ཡོད།

དེ་ཡང་སྔ་དྲོ་ལས་རིམ་སྔོན་མའི་འཕྲོས་མུ་མཐུད་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་ཞིང་། ཐོག་མར་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཡིག་ཆ་ཨང་ ༧ པའི་གྲོས་ཆོད་དོན་ཚན་གསུམ་པའི་ཐོག་སྤྱི་འཐུས་དབུ་དཀར་ཚང་གཡུ་སྒྲོན་ལགས་ཀྱིས་བཟོ་བཅོས་གྲོས་འཆར་ཡིག་ཆ་ཨང་ ༡༤ པ་བཏོན་གནང་བ་དང་། སྤྱི་འཐུས་རིག་འཛིན་ལྷུན་གྲུབ་ལགས་ཀྱིས་རྒྱབ་སྐྱོར་གནང་རྗེས། དགག་བྱ་མེད་སྟབས་དེ་ཚུད་པ་དང་།དེ་བཞིན་སྤྱི་འཐུས་བསྟན་པ་ཡར་འཕེལ་ལགས་ཀྱིས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཡིག་ཆ་ཨང་ ༧ པའི་གྲོས་ཆོད་དོན་ཚན་དྲུག་པའི་ཐོག་བཟོ་བཅོས་གྲོས་འཆར་ཡིག་ཆ་ཨང་ ༡༥ པ་བཏོན་གནང་བར། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་ཀྱིས་རྒྱབ་སྐྱོར་གནང་རྗེས། དགག་བྱ་མེད་སྟབས་དེ་ཚུད་པ་དང་། དེ་ནས་སྤྱི་འཐུས་རྣམ་པས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཐོག་བགྲོ་གླེང་གནང་བ་དང་། བགྲོ་གླེང་གི་ལས་རིམ་ཐོག་སྤྱི་འཐུས་ ༢༥ དང་། དཔལ་ལྡན་སྲིད་སྐྱོང་མཆོག་དང་། དཔལ་ལྡན་བདེ་སྲུང་བཀའ་བློན་མཆོག་རྣམ་གཉིས་བཅས་ནས་ཆ་ཤས་བླངས་ཡོད་པ་དང་། གཙོ་བོ་སྤྱི་འཐུས་རྣམ་པས་རྒྱལ་སྤྱིའི་ནང་བོད་དོན་ལས་འགུལ་སྤེལ་དགོས་པ་དང་། བོད་ནང་གི་རྒྱལ་གཅེས་དཔའ་བོ་དཔའ་མོ་རྣམས་དྲན་གསོ་བྱེད་དགོས་པ་སོགས་གསུངས་གནང་རྗེས་སྤྱི་མོས་ཐོག་གཏན་འབེབས་གནང་སོང་།ད་རེས་ཀྱི་བཟོ་བཅོས་གྲོས་འཆར་ནང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་ལྕམ་སྐུ་མི་ཤེལི་བྷ་ཤེ་ལེཌི་ (Michelle Bachelet, United Nations High Commissioner for Human Rights) མཆོག་འདི་ལོའི་ཕྱི་ཟླ་ ༥ པའི་ནང་ཤར་ཏུར་ཀི་སི་ཐན་དུ་གཟིགས་སྐོར་སླད་ཆེད་ཕེབས་གནང་གཏན་འཁེལ་བ་བཞིན་བོད་ནང་དུའང་ཕེབས་ཐབས་གནང་དགོས་པ་དང་། དེ་བཞིན་བཀའ་སྤྱི་གཉིས་ནས་སྣེ་འཁྲིད་ཀྱིས་རྒྱལ་སྤྱིའི་ནང་གཞི་རྒྱ་ཆེ་བའི་བོད་དོན་ཞུ་གཏུག་གི་ལས་འགུལ་ཞིག་སྤེལ་དགོས་པ་བཅས་འཁོད་འདུག

ཉིན་རྒྱབ་དཔལ་ལྡན་སྲིད་སྐྱོང་དང་། ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ནང་སྲིད་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༠་་་༢༡ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་གནང་རྗེས། སྤྱི་འཐུས་རྒྱུན་ལས་ཀྱིས་ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་ལགས་ཀྱིས་སྙན་སྒྲོན་གནང་བ་དང་། སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས་ཀྱིས་གོང་གསལ་ལས་བསྡོམས་དང་། ཞིབ་འཇུག་སྙན་ཐོ་སྙན་སྒྲོན་ཟིན་པ་རྣམས་ལ་བགྲོ་གླེང་དགོས་པའི་གྲོས་འཆར་བཏོན་གནང་བར། སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་ཀྱིས་རྒྱབ་སྐྱོར་གནང་རྗེས། དཔལ་ལྡན་སྲིད་སྐྱོང་དང་། ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གོང་གསལ་སྙན་ཐོ་ནང་གསལ་སྤྱི་འཐུས་རྒྱུན་ལས་ཀྱི་དྲི་བ་ཁག་ལ་བཀའ་ཤག་གི་ལན་འདེབས་གསལ་བཤད་གནང་བ་དང་།དེ་རྗེས་ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་འཐུས་རྣམ་པས་བགྲོ་གླེང་གནང་ཞིང་། བགྲོ་གླེང་གི་ལས་རིམ་ཐོག་སྤྱི་འཐུས་རྣམ་པས་ཨམ་བྷ་ལ་སྲི་ཊྲི་པོ་ཏ་ལ་བོད་མིའི་སུད་ཚོང་ཁྲོམ་རར་མེ་སྐྱོན་བྱུང་བའི་གནས་སྟངས་སྐོར་དང་། གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས། བུན་གཏོང་ལས་འཆར། དྭང་ཟུར་ཉམ་ཐག་རོགས་སྐྱོར་ལས་གཞིའི་སྐོར། གསར་འབྱོར་བོད་མིའི་སྡོད་ཁང་གི་དཀའ་ངལ་སེལ་ཐབས། བལ་ཡུལ་ནང་གི་བོད་མིའི་ཡིག་ཆའི་དཀའ་ངལ། བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཐོག་བསྐྱར་ཞིབ་སླད་རྒྱ་གར་གཞུང་ལ་ཞུ་དགོས་གལ། རིས་མེད་གྲྭ་བཙུན་རྣམས་ལ་ཕྱིའི་སྐད་ཡིག་སྦྱོང་རྒྱུའི་མཐུན་རྐྱེན་སྦྱོར་ཐབས་ཡོང་བ་སོགས་ཀྱི་དགོངས་ཚུལ་དང་། དོགས་འདྲི་ཕུལ་གནང་བར། དཔལ་ལྡན་སྲིད་སྐྱོང་དང་། ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ལན་འདེབས་གསལ་བཤད་གནང་ཡོད་པ་བཅས། །