༄༅། །སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་དང་གྲོས་ཚོགས་འཐུས་མི་སྐུ་ཞབས་ནི་ཀོ་ལ་སི་ཝལ་ཌར་ (Nicolas Walder) མཆོག་གིས་སུད་སིའི་དཔྱིད་ཀའི་གྲོས་ཚོགས་ཚོགས་དུས་ལས་ཉིན་མཐའ་མའི་སྐབས་བོད་ནང་གི་གནས་སྟངས་ཇེ་སྡུག་དང་། ལྷག་པར་ད་ལྟའི་ཆར་ཁམས་བྲག་མགོ་ཁུལ་གྱི་གནས་སྟངས་ཇེ་སྡུག་ཇེ་ཞན་དུ་འགྲོ་བཞིན་པར་ཐུགས་འཚབ་དང་འབྲེལ་སུད་སིའི་གཞུང་ནས་རྒྱ་ནག་གཞུང་གིས་ཁམས་བྲག་མགོ་ནས་སྟོན་པའི་སྐུ་བརྙན་གཏོར་བཤིག་བཏང་བ་དེར་དབྱེ་ཞིབ་གནང་སྟེ་མཐའ་གཅིག་ཏུ་ངོ་རྒོལ་གནང་དགོས་པ། དེ་བཞིན་བོད་མིའི་ཆོས་དང་རིག་གཞུང་། བོད་མིའི་བླ་སྤྲུལ་ངོས་འཛིན་ཞུ་ཕྱོགས་ཀྱི་ཐོབ་ཐང་སྲུང་སྐྱོབ་གནང་དགོས་པའི་ཞུ་ཡིག་ཅིག་སུད་སིའི་གྲོས་ཚོགས་འོག་མའི་ནང་ཕུལ་འདུག
ཞུ་ཡིག་དེའི་ནང་སྐུ་ཞབས་ནི་ཀོ་ལ་སི་ཝལ་ཌར་མཆོག་གིས་རྒྱ་ནག་གཞུང་གིས་བོད་ནང་གི་ཆོས་དད་རང་དབང་དང་རིག་གཞུང་གཏོར་བཤིག ། དགེ་ལྡན་ནང་བསྟན་སློབ་གྲྭ་སྒོ་བརྒྱབ་ཡོད་པ་འཁོད་ཡོད་པ་མ་ཟད། རྒྱ་ནག་གཞུང་གི་འགོ་ཁྲིད་ཚོས་ཕྱི་ལོ་ ༢༠༢༡ ཟླ་ ༡༠ ནས་ཕྱི་ལོ་ ༢༠༢༢ ཟླ་ ༠༡ བར་ཁམས་བྲག་མགོ་ནས་སྟོན་པའི་སྐུ་བརྙན་གཏོར་བཤིག་དང་། དགེ་ལྡན་ནང་བསྟན་སློབ་གླིང་སྒོ་བརྒྱབ་པ། བྲག་མགོ་དགོན་པའི་མཁན་པོ་དང་ས་གནས་བོད་མི་ཁག་གཅིག་བཅས་འཛིན་བཟུང་བྱས་ཡོད་པ་འཁོད་ཡོད།
གཞན་ཡང་ཞུ་ཡིག་དེའི་ནང་སྐུ་ཞབས་ནི་ཀོ་ལ་སི་ཝལ་ཌར་མཆོག་གིས་རྒྱ་ནག་གཞུང་གི་འགོ་ཁྲིད་ཚོས་ཁམས་བྲག་མགོ་ཁུལ་དུ་བོད་བརྒྱུད་ནང་བསྟན་གྱི་གནས་དང་གྲྭ་ཤག་ཁག་གཅིག་གཏོར་བཤིག་བཏང་སྟེ་ཤུལ་དུ་བྱ་གསོ་ཁང་དང་ཕག་གསོ་ཁང་བཙུགས་ནས་བོད་མིའི་ཆོས་དང་རིག་གཞུང་གི་ཐོབ་ཐང་ལ་ཁྱད་གསོད་དང་མཐོང་ཆུང༌བྱས་ཡོད་པའི་སྐོར་འཁོད་ཡོད།།
