༄༅། །སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པས་བོད་མི་དང་རྒྱལ་སྤྱིའི་བོད་དོན་རྒྱབ་སྐྱོར་བ་ཡོངས་དང་ལྷན་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༣ པའི་ཉིན་མོ་སྲུང་བརྩི་ཞུས་ཡོད།
དེ་ཡང་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༣ པའི་ཉིན་མོར་བོད་མིའི་འཚེ་མེད་ཞི་བའི་རང་དབང་འཐབ་རྩོད་ལ་མུ་མཐུད་རྒྱབ་སྐྱོར་གནང་རྒྱུའི་བསྒྲགས་གཏམ་ཞིག་སྤེལ་ཡོད་པ་དང་། བསྒྲགས་གཏམ་དེའི་ནང་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས། ཨུ་རུ་སུ་ཡིས་ཡུ་ཀེ་རེན་ལ་བཙན་འཛུལ་བྱེད་བཞིན་ཡོད་སྟབས། ཡུ་ཀེ་རེན་གྱི་སྐྱབས་བཅོལ་བ་སྟོང་ཕྲག་མང་པོ་བྲོས་བྱོལ་དུ་ཕེབས་བཞིན་ཡོད་པ་རྣམས་དང་། དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཁྲིམས་འགལ་ཐོག་བོད་ལ་དབང་བསྒྱུར་བྱས་པའི་འོག་བོད་མི་རྣམས་ཀྱིས་གཞི་རྩའི་འགྲོ་བ་མིའི་ཐོབ་ཐང་དང་། རང་ཐག་རང་གཅོད། རང་དབང་སླར་གསོ་གནང་བཞིན་པ་བཅས་ལ་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་དང་།
རྒྱ་ནག་གཞུང་གིས་མུ་མཐུད་ཆབ་སྲིད་ཐོག་དམ་བསྒྲགས་དང་། བོད་མི་བརྒྱ་ཕྲག་མང་པོ་འཛིན་བཟུང་བཙོན་འཇུག བོད་མིིའི་ཆོས་དང་རིག་གཞུང་། ངོ་བོ་བཅས་རྒྱ་ནག་ཅན་དུ་སྒྱུར་བཞིན་པ། བོད་མི་རྣམས་ལ་རང་གི་ཕ་སྐད་བོད་ཡིག་སྦྱང་དུ་འཇུག་གི་མེད་པ་སོགས་ཀྱི་སྙན་ཐོ་འབྱོར་བཞིན་ཡོད་པས། རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་ཆབ་སྲིད་ཐོག་དྲག་གནོན་བྱེད་བཞིན་པ་མཚམས་འཇོག་བྱེད་དགོས་པ་མ་ཟད། བོད་མི་རྣམས་ལ་འཇིགས་སྣང་དང་བཙན་གནོན་མེད་པའི་སྒོ་ནས་ཆོས་དང་རིག་གཞུང་ཉམས་ལེན་བྱེད་དུ་འཇུག་དགོས་པ་སོགས་འཁོད་ཡོད།
གཞན་ཡང་བསྒྲགས་གཏམ་དེའི་ནང་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་རྒྱ་ནག་གཞུང་གིས་དུས་རབས་མང་པོའི་རིང་བོད་མིའི་བླ་སྤྲུལ་ངོས་འཛིན་ཞུ་ཕྱོགས་ཀྱི་སྲོལ་རྒྱུན་ལ་ཐེ་བྱུས་བཞིན་པར་ངོ་རྒོལ་དང་། རྒྱ་ནག་གི་འགོ་ཁྲིད་ཚོས་བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་། བླ་སྤྲུལ་ངོས་འཛིན་ཞུ་ཕྱོགས་ཀྱི་སྲོལ་རྒྱུན་བཅས་ལ་བརྩི་བཀུར་ཞུ་དགོས་པའི་འབོད་སྐུལ་གནང་ཡོད་པ་བཅས།།
