༄༅། །སུད་སི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་ཆེན་ཐེངས་ ༤༩ འཚོགས་བཞིན་པའི་སྐབས་དང་བསྟུན། སུད་སི་སྐུ་ཚབ་དོན་གཅོད་ཁང་གི་ལས་བྱེད་སྐལ་ལྡན་མཚོ་མོ་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གིས་རྒྱ་ནག་གཞུང་ལ་བཀག་སྡོམ་མེད་པའི་ཐོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་མཆོག་རྒྱ་ནག་གིས་གཙོས་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་ནང་གཟིགས་སྐོར་དུ་ཕེབས་སྐབས་ངེས་པར་དུ་བོད་དུའང་གཟིགས་སྐོར་ཕེབས་འཇུག་དགོས་པའི་གནོན་ཤུགས་སྤྲོད་རོགས་ཞེས་རེ་སྐུལ་ཞུས་ཡོད།

དེ་ཡང་སྐལ་ལྡན་མཚོ་མོ་ལགས་ཀྱིས་འཇིག་ཉེན་ཡོད་པའི་མི་རིགས་སྲུང་སྐྱོབ་ལྷན་ཚོགས་ (Society for Threatened Peoples) ཞེས་པའི་གཞུང་ཁོངས་མ་ཡིན་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པའི་ཚབ་ཞུས་ཏེ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་མཆོག་རྒྱ་ནག་གིས་གཙོས་རྒྱ་ནག་གི་དབང་བསྒྱུར་འོག་ཡོད་པའི་ས་ཁུལ་གཞན་ཁག་གི་ནང་གཟིགས་སྐོར་དུ་ཕེབས་དགོས་པ་ཛ་དྲག་གི་གལ་གནད་ཆགས་ཡོད། འོན་ཀྱང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་མཆོག་བོད་ཀྱི་ས་ཁུལ་ཁག་གི་ནང་གཟིགས་སྐོར་དུ་མ་ཕེབས་ཚེ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པར་རྟོག་ཞིབ་ཆ་ཚང་བ་ཞིག་བྱེད་མི་ཐུབ། ཅེས་གསུངས་ཡོད།

གཞན་ཡང་སྐལ་ལྡན་མཚོ་མོ་ལགས་ཀྱིས་ཉེ་ཆར་བོད་ནང་ཕོ་བྲང་པོ་ཏ་ལའི་མདུན་ཐང་དུ་བོད་ཀྱི་གཞོན་སྐྱེས་གླུ་པ་གྲགས་ཅན་ཚེ་དབང་ནོར་བུ་ལགས་ཀྱིས་བོད་ཀྱི་བསྟན་སྲིད་དོན་དུ་རང་ལུས་མེར་སྲེག་བཏང་གནང་བ་ཚུད་པའི་ད་བར་བོད་མི་གྲངས་ ༡༥༦ ལྷག་གིས་བོད་བསྟན་སྲིད་སླད་རང་ལུས་མེར་སྲེག་བཏང་གནང་ཡོད་པ། དེ་བཞིན་ཉེ་ཆར་རྒྱ་ནག་གཞུང་གིས་ཁམས་བྲག་མགོ་ནས་སྟོན་པའི་སྐུ་བརྙན་གཏོར་བཤིག་དང་སློབ་གྲྭ་སྒོ་བརྒྱབ་པའི་སྐོར་གསུངས་ཡོད།

ཕྱོགས་མཚུངས་སྐལ་ལྡན་མཚོ་མོ་ལགས་ཀྱིས་རྒྱ་ནག་གཞུང་གིས་ཁོར་ཡུག་སྲུང་སྐྱོབ་ལས་འགུལ་བ་ཨ་ཉག་སེང་སྒྲ་ལགས་དང་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་སོགས་འཛིན་བཟུང་བཙོན་འཇུག་བྱས་ཡོད་པས། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ངོས་ནས་ཁོང་རྣམ་པའི་སྐོར་ཞིབ་འཇུག་མཐིལ་ཕྱིན་པ་གནང་དགོས་པའི་རེ་སྐུལ་ཞུས་གནང་ཡོད་པ་བཅས།།