༄༅། །ཨེལ་སལ་ཝེ་ཌོར་ (El Salvador) རྒྱལ་ཁབ་ནས་ཡིན་པའི་བོད་དོན་རྒྱབ་སྐྱོར་བ་དང་བོད་ཀྱི་གྲོགས་པོ་རྙིང་ཤོས་གྲས་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་ (Dr Alfredo Martinez Moreno) མཆོག་དམ་པ་དེ་ཉིད་ཀྱི་རྗེས་དྲན་མཛད་སྒོ་ཞིག་ཚོགས་ཡོད་པ་དང་། མཛད་སྒོ་དེ་བཞིན་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་དམ་པ་དེ་ཉིད་ཀྱི་སྲས་མོ་ཁི་ལ་རེ་ལི་ཤི་ཡ་མར་ཊི་ནེ་ཛི་ (Claralicia Martinez) ལགས་ཀྱིས་གོ་སྒྲིག་གནང་ཡོད་པ་དང་། མཛད་སྒོར་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་དམ་པ་དེ་ཉིད་ཀྱི་ནང་མི་དང་། གྲོགས་པོ་གྲོགས་མོ། ལྷོ་ཨ་མི་རི་ཀའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས། ཁྲིམས་རྩོད་པ། གཞུང་ཚབ་མི་སྣ། གསར་འགོད་པ་སོགས་ཕེབས་ཡོད།

དེ་ཡང་མཛད་སྒོའི་ཐོག་ལྷོ་ཨ་མི་རི་ཀའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མི་མང་སྤྱི་འཐུས་ལྷན་ཚོགས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་བཅས་ནས་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་དམ་པ་དེ་ཉིད་ཀྱི་ནང་མི་ཡོངས་ལ་ཐུགས་གསོའི་གསུང་འཕྲིན་གནང་བ་ཁག་ཕུལ་བར། སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་དམ་པ་དེ་ཉིད་ཀྱི་ནང་མི་རྒན་གྲས་རཝེ་ར་རི་ཆར་ཌི་སན་ (Carlos A. Rivera Richardson) ལགས་ཀྱིས་ནང་མིའི་ཚབ་ཞུས་ཏེ་ཐུགས་རྗེ་ཆེ་ཞུས་ཡོད་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་སྙིང་རྗེ་ཐོག་བཀའ་སློབ་ལམ་སྟོན་སྩལ་བ་རྣམས་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་དམ་པ་དེ་ཉིད་ཀྱིས་ང་ཚོ་ཚང་མ་ཞི་བདེ་དང་འཆམ་མཐུན་ཡོང་སླད་ལག་བསྟར་གནང་ཡོད། ཅེས་གསུངས།སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས། བོད་མི་ཡོངས་ཀྱི་ཚབ་ཞུས་ཏེ་དམ་པ་དེ་ཉིད་ཀྱི་སྐུ་ཟླ་ལྕམ་སྐུ་ཨ་ལི་ཤ་མར་ཊི་ནེ་ཛི་ (Alicia Martinez) ལགས་དང་སྲས་མོ་ཁི་ལ་རེ་ལི་ཤི་ཡ་མར་ཊི་ནེ་ཛི་ལགས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་། མཐུན་པ་སྤུན་བཞིའི་སྐུ་ཐང་ཕུལ་ཡོད།

གཞན་ཡང་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཀྱིས་སལ་ཝེ་ཌོར་གྱི་རྒྱལ་ས་སན་སལ་ཝེ་ཌོར་ (San Salvador) ནང་ཉིན་གྲངས་གཉིས་རིང་གི་གཟིགས་སྐོར་སྐབས་ཨེལ་སལ་ཝེ་ཌོར་རྒྱལ་ཁབ་ཀྱི་གྲོས་ཚོགས་འཐུས་མི་ཇོན་ནེ་ (Johnny Wright) ལགས་དང་། བོད་དོན་རྒྱབ་སྐྱོར་བ་མེ་རི་ཡ་ཨེ་ལེ་ནཱ་ (Maria Elena Sol) ལགས་དང་མཇལ་འཕྲད་ཀྱིས་བོད་ནང་གི་ཆོས་དད་རང་དབང་དང་། ཁོར་ཡུག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན་སོགས་ཀྱི་སྐོར་རྒྱབ་སྐྱོར་གནང་དགོས་པའི་འབོད་སྐུལ་ཞུས་གནང་ཡོད་པ་བཅས།།