༄༅། །བོད་གཞིས་ཀ་རྩེ་གམ་པ་རྫོང་ནས་ཡིན་པའི་བོད་མི་ཡུལ་སྐོར་སྣེ་ཤན་པ་པ་སངས་ནོར་བུ་ལགས་རྒྱ་ནག་གཞུང་གི་ཉེན་རྟོག་པས་རྐང་འཁོར་ཡུལ་སྐོར་སྣེ་འཁྲིད་བྱེད་པ་ནི་ཁྲིམས་འགལ་དང་བདེ་འཇགས་མིན་པར་བསྙད་ནས་འཛིན་བཟུང་བཙན་འཁྲིད་བྱས་ཡོད་འདུག
དེ་ཡང་གསར་འགྱུར་བརྒྱུད་ལམ་ཁག་གཅིག་གི་ནང་གནས་ཚུལ་སྤེལ་གསལ་ལྟར་ན། ཕྱི་ལོ་ ༢༠༢༢ ཟླ་ ༣ ཚེས་ ༡༡ ཉིན་བོད་རང་སྐྱོང་ལྗོངས་ཟེར་བའི་ཁོངས་གཏོགས་གཞིས་ཀ་རྩེ་གམ་པ་རྫོང་རྒྱལ་རུས་གྲོང་བརྡལ་ནས་ཡིན་པའི་བོད་མི་ཡུལ་སྐོར་སྣེ་ཤན་པ་པ་སངས་ནོར་བུ་ལགས་ཀྱིས་ས་གནས་སུ་ཡུལ་སྐོར་སྣེ་ལེན་ཁང་ཞིག་ཆེད་འཛུགས་ཀྱིས་རྐང་འཁོར་གྱིས་ཡུལ་སྐོར་སྣེ་ཤན་གྱི་ལས་ཀ་བྱེད་བཞིན་པར་ས་གནས་འབྲེལ་ཡོད་ཚན་པས་རྐང་འཁོར་ཡུལ་སྐོར་སྣེ་ཤན་བྱེད་པ་ནི་བདེ་འཇགས་མིན་པ་དང་ཁྲིམས་འགལ་ཡིན་ཚུལ་བརྗོད་ནས་རྡུང་རྡེག་དང་འཛིན་བཟུང་བཙན་ཁྲིད་ཀྱིས་གར་སོང་ཆ་མེད་དུ་གྱུར་ཡོད།
དེ་སྔོན་ས་གནས་ཉེན་རྟོག་པ་ཐེངས་གཉིས་རིང་པ་སངས་ནོར་བུ་ལགས་ཀྱི་ཡུལ་སྐོར་སྣེ་ལེན་ཞབས་ཞུ་ཁང་དུ་ཡོང་ནས་ཞབས་ཞུ་ཁང་དེ་སྒོ་རྒྱག་དགོས་པའི་སྡིགས་ར་སྐུལ་ཡོད་ནའང་པ་སངས་ནོར་བུ་ལགས་ཀྱིས་རྒྱ་སྒོར་ ༡༨༠༠༠ སྤྲད་ནས་བོད་རང་སྐྱོང་ལྗོངས་ཡུལ་སྐོར་སྣེ་ལེན་ཞབས་ཞུ་ཁང་དུ་ཐོ་འགོད་བྱས་ནས་ཡུལ་སྐོར་སྣེ་ལེན་གྱི་ཆོག་མཆན་བླངས་ཡོད་པ་དང་། ཉེ་ལམ་པ་སངས་ནོར་བུ་ལགས་ཀྱིས་ཡུལ་སྐོར་སྣེ་ལེན་པའི་ཆོག་མཆན་ཡིག་ཆ་དང་བཅས་པ་ས་གནས་ཉེན་རྟོག་པར་བསྟན་ཡོད་ཀྱང་། ཉེན་རྟོག་པས་རྐང་འཁོར་ཡུལ་སྐོར་སྣེ་འཁྲིད་བྱས་ན་ཁྲིམས་འགལ་ཡིན་པ་དང་བདེ་འཇགས་མེད་ཚུལ་བརྗོད་ནས་པ་སངས་ནོར་བུ་ལགས་སུ་རྡུང་རྡེག་ཚབས་ཆེ་བཏང་རྗེས་འཛིན་བཟུང་བཙན་འཁྲིད་བྱས་པ་དང་། པ་སངས་ནོར་བུ་ལགས་ཀྱི་རྐང་འཁོར་ཚང་མའང་བཙན་འཕྲོག་བྱས་ཡོད་འདུག
བོད་རིགས་ཡུལ་སྐོར་སྣེ་ཤན་པ་པ་སངས་ནོར་བུ་ལགས་ནི། ལོ་ན་ ༢༠ ནང་ཡིན་པ་དང་དམའ་འབྲིང་སློབ་གྲྭ་བར་སློབ་སྦྱོང་བྱས་ཡོད། ཁོང་ནི་ནམ་རྒྱུན་གྲོང་མི་ཕན་ཚུན་བར་འབྲེལ་ལམ་དང་ཀུན་སྤྱོད་ཧ་ཅང་ཡག་པོ་ཡོད་སྟབས། མི་ཚང་མས་བསྔགས་བརྗོད་བྱེད་ཡུལ་གྱི་གཞོན་སྐྱེས་ཤིག་ཡིན། ཁོང་གི་པ་ལགས་འདས་གྲོངས་སུ་གྱུར་ནས་ནང་མིར་འཚོ་བའི་དཀའ་ངལ་རྐྱེན་པས་མུ་མཐུད་སློབ་གྲྭར་བྱེད་ཐུབ་མེད་པ་དང་། པ་སངས་ནོར་བུ་ལགས་སུ་ཡུལ་སྐོར་སྣེ་ལེན་རྐང་འཁོར་བདུན་ཡོད་པ་དང་དེ་དག་ཚང་མ་སྤུས་ཀ་ཧ་ཅང་ཡག་པོ་ཡིན་འདུག ཁོང་གི་ནང་མིའི་འཚོ་བ་ཡང་ཡུལ་སྐོར་སྣེ་ལེན་གྱི་ལས་ཀར་བརྟེན་ཡོད་འདུག པ་པ་སངས་ནོར་བུ་ལགས་ཀྱི་ཨ་མའི་མིང་ལ་འཚམས་སྐྱིད་དང་། ས་གནས་ཀྱི་སློབ་གྲྭར་བསྐྱོད་བཞིན་པའི་ལོ་ན་ ༡༣ ཅན་གྱི་གཅུང་མོ་ཆོས་སྒྲོན་ཞུ་བ་བཅས་ཡོད་འདུག །
