༄༅། །ཕྱི་ལོ་ ༢༠༢༢ ཟླ་ ༣ ཚེས་ ༢ ཉིན་ཨམ་བྷེ་ཊི་ཀར་བུད་མེད་ཚོགས་པའི་གོ་སྒྲིག་འོག་རྒྱ་གར་མཧཱ་རཱཤ་ཊྲ་མངའ་སྡེའི་གྲོང་ཁྱེར་ཨ་མྲ་ཝ་ཏི་རུ་རྒྱ་གར་རྒྱལ་ཡོངས་བུད་མེད་རྩོམ་རིག་ལྷན་ཚོགས་ཤིག་བསྐོང་ཚོགས་གནང་ཡོད་པ་དང་། ལྷན་ཚོགས་ཐོག་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་དང་། སྦན་ད་ར་ནོར་རྒྱས་གླིང་གི་ས་གནས་འགོ་འཛིན་སྐལ་བཟང་སྲི་གཅོད་ལགས། དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཞོན་ཚེ་རིང་སྒྲོལ་མ་ལགས། ས་གནས་བུད་མེད་ལྷན་ཚོགས་ཀྱི་ཚོགས་གཙོ་ཀུན་བཟང་བདེ་ཆེན་ལགས། དེ་བཞིན་ཇ་མི་ཡ་མི་ལི་ཡ་མཐོ་སློབ་ཀྱི་སློབ་དཔོན་ཧིམ་ལཱ་ཏཱ་མཱ་ཧེཤ་ཝར་ལགས། མོ་ནད་སྨན་པ་པུཤ་པཱ་ཐོ་ཏཱཌ་ལགས། ཨ་མྲ་ཝ་ཏི་མཐོ་སློབ་ཀྱི་འབུམ་རམས་པ་བྷི་ཨར་ཝཀ་མཱ་རེ་ལགས་སོགས་མཉམ་ཞུགས་གནང་ཡོད།ལྷན་ཚོགས་ཐོག་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་རྒྱ་ནག་གཞུང་གིས་བོད་ནང་དྲན་གནོན་ཅན་གྱི་སྲིད་བྱུས་ལག་བསྟར་བྱེད་བཞིན་པའི་སྐོར་དང་། འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཁྱབ་བརྡལ་གྱི་དཀའ་ངལ་ཤུགས་ཆེ་བཟོས་པའི་འགན་དེ་རྒྱ་ནག་གཞུང་ལ་ཡོད་ཅེས་གསུངས་པ་དང་། དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཞོན་ཚེ་རིང་སྒྲོལ་མ་ལགས་ཀྱིས་བོད་ཀྱི་བུད་མེད་ལྷན་ཚོགས་ཀྱི་བྱུང་རབས་དང་བསྒྲུབ་བྱ་སོགས་ངོ་སྤྲོད་གནང་ཡོད།

གཞན་ཡང་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་དང་། དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཞོན་ཚེ་རིང་སྒྲོལ་མ་ལགས། ས་གནས་བུད་མེད་ལྷན་ཚོགས་ཀྱི་ཚོགས་གཙོ་ཀུན་བཟང་བདེ་ཆེན་ལགས་བཅས་ནས་ཉེ་ཆར་འདས་གྲོངས་སུ་གྱུར་པའི་ཧིན་བོད་མཛའ་འབྲེལ་ཚོགས་པའི་ཚོགས་མི་དམ་པ་སཱཏིཤ་མོ་རེཧ་ (Satish Mohrey) ལགས་ཀྱི་ནང་མིར་གདུང་སེམས་མཉམ་སྐྱེ་ཞུས་ཡོད་པ་བཅས། །