༄༅། །རྒྱ་ནག་གཞུང་གིས་ཕྱི་ལོ་ ༡༩༥༩ ལོར་བོད་ས་ཡོངས་རྫོགས་བཙན་བཟུང་བྱས་པར་ལོ་དེའི་ཟླ་བ་གསུམ་པའི་ཚེས་བཅུ་ཉིན་ལྷ་སར་བོད་མི་ཁྲི་ཕྲག་འདུས་ཏེ་རྒྱ་གཞུང་གི་ཁྲིམས་འགལ་གྱི་བཙན་འཛུལ་ལ་ངོ་རྒོལ་གནང་སྟེ་འདི་ལོར་ལོ་ངོ་ ༦༣ འཁོར་བའི་དུས་དྲན་ཉིན་འཛམ་གླིང་ཁྱོན་ཡོངས་སུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་སྔར་རྒྱུན་བཞིན་དུས་དྲན་སྲུང་བརྩི་ཞུས་ཏེ་ས་གནས་སོ་སོར་ལས་འགུལ་སྣ་ཚོགས་སྤེལ་ཡོད་པ་ལྟར། རྒྱ་གར་ནང་གི་བོད་དོན་རྒྱབ་སྐྱོར་ཚོགས་པ་ཁག་ནས་ཀྱང་དེ་ཉིན་ལས་འགུལ་འདྲ་མིན་སྤེལ་ཏེ་དུས་དྲན་སྲུང་བརྩི་ལེགས་པར་ཞུས་ཡོད། 

དེ་ཡང་ཇར་ཁནྜ་མངའ་སྡེའི་ས་གནས་ཧ་ཛ་རི་བྷག་ (Hazaribagh) ཏུ་ཧིན་བོད་མཛའ་འབྲེལ་ཚོགས་པས་ཤ་གུན་ཝ་ཊི་ཀ་ (Shagun Vatika) རུ་བོད་མིའི་རང་དབང་སྒེར་ལངས་ཐེངས་ ༦༣ སྲུང་བརྩི་ཞུས་ཤིང་། སྐབས་དེར་སྐུ་མགྲོན་གཙོ་བོར་རྒྱ་གར་གྲོས་ཚོགས་འཐུས་མི་ཟུར་པ་མ་ཧཱ་བིར་ལལ་བིཤྭ་ཀརྨ་ལགས་དང་། གཞན་ནང་རྒྱ་གར་བོད་དོན་རྒྱབ་སྐྱོར་བ་རྣམས་ཚོགས་བཅར་ཞུས་ཡོད། ཚོགས་འདུའི་གཙོ་སྐྱོང་ཧིན་བོད་མཛའ་འབྲེལ་ཚོགས་པའི་ཧ་ཛ་རི་བྷག་ས་གནས་ཀྱི་འབྲེལ་མཐུད་པ་སྐུ་ཞབས་སུ་དེཤ་ཀུ་མཱར་ལགས་ཀྱིས་གནང་ཞིང་། ཁོང་གིས་ཚོགས་བཅར་བ་རྣམས་ལ་དུས་དྲན་གྱི་གལ་གནད་དང་། ད་ལྟའི་བོད་ནང་གི་གནས་སྟངས་སོགས་ཀྱི་སྐོར་ངོ་སྤྲོད་གནང་ཡོད། བི་ཧཱར་མངའ་སྡེའི་པཊ་ནཱ་དང་། མུ་ཛ་ཕར་པུར། བྷ་གལ་པུར། ཡངས་པ་ཅན། ན་ཝ་ད། སི་ཊ་མ་རི་བཅས་སུ་ཧིན་བོད་མཛའ་འབྲེལ་ཚོགས་པས་བོད་ཀྱི་རྒྱལ་གཅེས་པ་རྣམས་ལ་གུས་བཀུར་དང་བཅས་ས་གནས་རྫོང་སོ་སོར་བོད་ཀྱི་རང་དབང་འཐབ་རྩོད་དང་འབྲེལ་བའི་ཚོགས་འདུ་གོ་སྒྲིག་ཞུས་ཡོད། ལྡི་ལི་ས་གནས་ཧིན་བོད་མཛའ་འབྲེལ་ཚོགས་པ་དང་ལོཀ་ནཱ་ཡཀ་ཇ་ཡ་པྲ་ཀཤ་རྒྱལ་སྤྱིའི་ཤེས་རིག་གོང་སྤེལ་ལྟེ་གནས་ཟུང་སྦྲེལ་གྱིས་བོད་ཀྱི་རང་དབང་དང་རྒྱ་གར་གྱི་བདེ་འཇགས་ཞེས་པའི་བརྗོད་གཞིའི་ཐོག་དྲ་ཐོག་ཚོགས་འདུ་གོ་སྒྲིག་གནང་ཡོད། 

གཞན་ཡང་རྒྱ་གར་གྱི་ཨུཏྟར་པྲདེཤ་གྱི་ས་གནས་མ་ཨུ་དང་། མཧཱ་རཱཥཊྲའི་བྷན་ད་ར། ཇོདྷ་པུར། རཱཇསྠན། ཨོ་ཌི་ཤཱ་རྣམས་སུ་ཧིན་བོད་མཛའ་འབྲེལ་ཚོགས་པས་བོད་མིའི་རང་དབང་སྒེར་ལངས་སྲུང་བརྩི་ཞུས་ཡོད། བྷེང་ལོར་ཧིན་བོད་མཛའ་འབྲེལ་ཚོགས་པས་ས་གནས་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་གོ་སྒྲིག་ཞུས་པའི་ལས་འགུལ་ནང་མཉམ་ཞུགས་གནང་སྟེ་དུས་དྲན་སྲུང་བརྩི་ཞུས་ཡོད། 

ཕྱོགས་མཚུངས་འཕགས་བོད་འབྲེལ་མཐུད་ཚོགས་པ་དབུས་ས་གཉིས་ནས་རྒྱ་ནག་གཞུང་གིས་བོད་བཙན་བཟུང་བྱས་པར་ངོ་རྒོལ་སྐད་འབོད་དང་བཅས་བོད་མིའི་རང་དབང་སྒེར་ལངས་ཐེངས་༦༣ སྲུང་བརྩི་ཞུས་ཡོད་ཅིང་། བོད་མིའི་རང་དབང་སྒེར་ལངས་དང་སྟབས་བསྟུན་འཕགས་བོད་འབྲེལ་མཐུད་ཚོགས་པས་བརྙན་ཐུང་ཞིག་འགྲེམས་སྤེལ་གནང་སྟེ་རྒྱ་གར་གཞུང་དམངས་གཉིས་ལ་རྒྱ་གར་གྱི་མཐའ་མཚམས་སྲུང་སྐྱོབ་དང་བོད་ལ་རང་དབང་ཐོབ་ཆེད་རྒྱ་ནག་དང་འབྲེལ་ཐག་མཚམས་འཇོག་དགོས་པའི་འབོད་སྐུལ་གནང་འདུག 

ཨ་སམ་ནང་དུ་བོད་རང་བཙན་ཨ་སམ་གྱི་འབོད་སྒྲ་ཞེས་པའི་བོད་དོན་རྒྱབ་སྐྱོར་ཚོགས་པས་བོད་ཀྱི་རང་དབང་འཐབ་རྩོད་དང་འབྲེལ་བའི་གཏམ་བཤད་དང་བགྲོ་གླེང་གོ་སྒྲིག་ཞུས་ཏེ་བོད་མིའི་རང་དབང་སྒེར་ལངས་ཐེངས་ ༦༣  སྲུང་བརྩི་ཞུས་ཡོད་པ་བཅས།།