༄༅། །ཕྱི་ལོ་ ༢༠༢༢ ཟླ་ ༠༢ ཚེས་ ༢༨ ཉིན་རྒྱ་གར་བྱང་ཤར་མེ་གྷཱ་ལཡ་(Meghalaya) མངའ་སྡེའི་སྲིད་སྐྱོང་སྐུ་ཞབས་སཏྱ་པཱལ་མ་ལིཀ་  (Satya Pal Malik) མཆོག་ཤིས་ལོངས་དགའ་ལྡན་ཆོས་གླིང་དགོན་པར་གཟིགས་སྐོར་ཕེབས་ཏེ་སྟོན་པ་ཐུབ་པའི་དབང་པོའི་སྐུ་བརྙན་ལ་མཇལ་ཁ་ཞུས་གནང་ཡོད་པ་དང་། སྐབས་དེར་ཤིས་ལོངས་ས་གནས་འགོ་འཛིན་པདྨ་དོན་གྲུབ་ལགས་དང་། ཕྱོགས་བཞུགས་བོད་མི་མང་སྤྱི་འཐུས་ཚེ་རིང་སྒྲོལ་མ་ལགས། དགའ་ལྡན་ཆོས་གླིང་དགོན་པའི་མཁན་པོ་བསོད་ནམས་སྦྱིན་པ་ལགས། དེ་བཞིན་གཞུང་དང་གཞུང་ཁོངས་མིན་པའི་བོད་མིའི་ཚོགས་པ་ཁག་གི་སྐུ་ཚབ་རྣམ་པས་མེ་གྷཱ་ལཡ་མངའ་སྡེའི་སྲིད་སྐྱོང་སྐུ་ཞབས་སཏྱ་པཱལ་མ་ལིཀ་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།ཤིས་ལོངས་ས་གནས་མི་མང་གིས་སྲིད་སྐྱོང་སྐུ་ཞབས་སཏྱ་པཱལ་མ་ལིཀ་མཆོག་ལ་ཐུགས་རྗེ་བཀའ་དྲིན་མཚོན་ཆེད་དུ་དྲན་རྟེན་ཕྱག་རྟགས་ཕུལ་ཡོད། དེ་བཞིན་ཤིས་ལོངས་ས་གནས་འགོ་འཛིན་པདྨ་དོན་གྲུབ་ལགས་ཀྱིས་བོད་མིའི་སྒྲིག་འཛུགས་དང་། གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་རྒྱ་གར་གཞུང་དང་། མེ་གྷཱ་ལཡ་མངའ་སྡེའི་སྲིད་སྐྱོང་སྐུ་ཞབས་སཏྱ་པཱལ་མ་ལིཀ་མཆོག་གིས་བཙན་བྱོལ་བོད་མི་རྣམས་ལ་གནས་ཚང་གཡར་བ་མཚོན་པའི་བོད་དོན་སླད་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུས་པ་དང་འབྲེལ་སྲིད་སྐྱོང་མཆོག་ལ་ཤིས་ལོངས་ས་གནས་བོད་མིའི་གཞིས་ཆགས་ལ་ཕན་པའི་ལས་དོན་ཇི་བསྒྲུབས་ཡོད་པའི་སྐོར་དང་། དེ་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་ཤིས་ལོངས་ས་གནས་བོད་མིའི་གཞིས་ཆགས་སུ་ནང་པའི་རིག་གཞུང་བསྟི་གནས་ཤིག་འཛུགས་སྐྲུན་གནང་བཞིན་པའི་སྐོར་སྙན་སྒྲོན་ཞུས་གནང་ཡོད།མེ་གྷཱ་ལཡ་མངའ་སྡེའི་སྲིད་སྐྱོང་སྐུ་ཞབས་སཏྱ་པཱལ་མ་ལིཀ་མཆོག་གིས་ས་གནས་བོད་མི་རྣམས་ཀྱིས་བོད་པའི་ཐུན་མོང་མིན་པའི་ཆོས་དང་རིག་གཞུང་། སྐད་ཡིག་བཅས་མི་ཉམས་རྒྱུན་འཛིན་གནང་དང་གནང་བཞིན་པའི་སྐོར་རྗེས་སུ་ཡི་རང་གནང་ཡོད་པ་མ་ཟད། ས་གནས་འགོ་འཛིན་ནས་ས་གནས་བོད་མིའི་བདེ་དོན་ཆེད་དུ་ལས་འཆར་སྤེལ་བ་དང་། ས་གནས་བོད་མི་དང་ཡུལ་མི་ཚོ་དབར་ལ་འབྲེལ་བ་དམ་ཟབ་བཟོ་བཞིན་པར་བསྔགས་བརྗོད་གནང་ཡོད། ཤིས་ལོངས་ས་གནས་བོད་མི་དང་ཤིས་ལོངས་སམ་བྷོ་ཊ་གཏན་སློབ་ཀྱི་སློབ་ཕྲུག་རྣམས་ནས་སྲིད་སྐྱོང་མཆོག་ལ་བོད་ཀྱི་གཞས་ཞབས་བྲོ་གཟིགས་འབུལ་དང་། ཉིན་གུང་གི་གསོལ་ཚིགས་འདེགས་འབུལ་ཞུས་གནང་ཡོད་པ་བཅས།