༄༅། །འདི་གར་མན་སྤར་ཕན་བདེ་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༢ ཟླ་ ༣ ཚེས་ ༡༡ ནས་ ༡༣ བར་ཉིན་གྲངས་གསུམ་རིང་མན་སྤར་ས་གནས་སུ་ (Mainpat Carnival 2022) ཞེས་པའི་དུས་ཆེན་ཚོགས་ཀྱི་ཡོད།

དེ་ཡང་ཕྱི་ཚེས་ ༡༡ ཉིན་གྱི་དབུ་འབྱེད་མཛད་སྒོའི་ཐོག་མན་སྤར་བོད་མི་རིག་གཞུང་ཚོགས་པ་ནས་འཁྲབ་སྟོན་ཞིག་གཟིགས་འབུལ་ཞུས་ཡོད་པ་དང་།  ཕྱི་ཚེས་ ༡༣ ཉིན་ཏེ་ཉིན་མཐའ་མའི་ (Mainpat Carnival 2022) མཛད་སྒོའི་ཐོག་སྐུ་མགྲོན་གཙོ་བོ་ཆ་ཏྟཱིས་གར་མངའ་སྡེའི་སྤྱི་ཁྱབ་བློན་ཆེན་བྷུ་པེཤ་བྷ་གྷེལ་  (Bhupesh Baghel) མཆོག་ཕེབས་འཆར་ཡོད་ཀྱང་ལས་དོན་གཞན་གྱི་རྐྱེན་པས་ཕེབས་མ་ཐུབ་པར་བརྟེན་སྤྱི་ཁྱབ་བློན་ཆེན་མཆོག་གི་ཚབ་ཏུ་ཆ་ཏྟཱིས་གར་མངའ་སྡེའི་རིག་གཞུང་དང་བཟའ་འབྲུའི་བློན་ཆེན་ཨ་མཱར་ཇིཏ་བྷ་གྷཏ་ (Amarjeet Bhagat) མཆོག་གིས་གཙོས་ས་གནས་ཀྱི་གནད་ཡོད་མི་སྣ་ཁག་གཅིག་ཆེད་ཕེབས་གནང་ཡོད། སྐབས་དེར་མན་སྤར་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་དང་ས་འཐུས་ཚོགས་གཙོ་སངས་རྒྱས་བསྟན་འཛིན་ལགས། དེ་བཞིན་མཉམ་འབྲེལ་དྲུང་ཆེ་བསྟན་འཛིན་དཔལ་འབྱོར་ལགས་བཅས་ཀྱིས་ཆ་ཏྟཱིས་གར་གྱི་རིག་གཞུང་དང་བཟའ་འབྲུའི་བློན་ཆེན་མཆོག་གིས་གཙོས་གནད་ཡོད་མི་སྣ་གཞན་དང་ལྷན་མཇལ་འཕྲད་གནང་བ་དང་སྦྲགས། ས་གནས་འགོ་འཛིན་བསྟན་འཛིན་ཟླ་སྒྲོན་ལགས་ཀྱིས་བློན་ཆེན་མཆོག་གི་བརྒྱུད་ཆ་ཏྟཱིས་གར་མངའ་སྡེའི་སྤྱི་ཁྱབ་བློན་ཆེན་མཆོག་གི་མཚན་ཐོག་ཏུ་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤   (Tibetan Rehabilitation Policy 2014)  ཞེས་པའི་གནད་དོན་དང་འབྲེལ་བའི་ཐོག་ལ་ཤོག་བུ་གཉིས་ཅན་གྱི་ཞུ་སྙན་ཞིག་ཕུལ་ཡོད། 

སྤྱིར་ཆ་ཏྟཱིས་གར་མངའ་སྡེའི་གཞུང་ནས་མན་སྤར་ས་གནས་སུ་ (Mainpat Carnival 2022) ཞེས་པའི་དུས་ཆེན་ཞིག་ལོ་ལྟར་ཚོགས་ཀྱི་ཡོད་པ་དང་དུས་ཆེན་ཐོག་ས་གནས་འདྲ་མིན་གྱི་གཞས་པ་གྲགས་ཅན་མགྲོན་འབོད་ཀྱིས་མང་ཚོགས་ལ་གཞས་སྣ་སོགས་གཟིགས་འབུལ་ཞུས་སྲོལ་ཡོད་པ་བཅས། །