༄༅། །ཕྱི་ལོ་ ༢༠༢༢ ཟླ་ ༣ ཚེས་ ༥ ཉིན་བེལ་ཇི་ཡམ་བོད་རིགས་ཚོགས་པའི་གོ་སྒྲིག་འོག་བེལ་ཇི་ཡམ་གྱི་གྲོང་ཁྱེར་ཨན་ཌི་ཝབ་ (Antwerp) ནང་བོད་རྒྱལ་ལོ་ ༢༡༤༩ བོད་ཟླ་ ༡ ཚེས་ ༣ རབ་གནས་ཆུ་སྟག་གནམ་ལོའི་རང་ཞལ་གསར་དུ་བཞད་པའི་དགའ་སྟོན་གྱི་མཛད་སྒོ་ཚོགས་ཡོད་པ་དང་། མཛད་སྒོའི་སྐུ་མགྲོན་དུ་བེལ་ཇི་ཡམ་གྱི་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ལྕམ་སྐུ་མི་ལ་ནི་ཡ་བྷོ་ལོན་ཌེ་ལེ་ (Melanie Blondelle) ལགས། བཀའ་བརྒྱུད་ཡོན་ཏན་རྒྱ་མཚོ་གླིང་གི་འགན་འཛིན་ཇོ་ཧན་ (M. De Herdt, Johan) ལགས། དེ་བཞིན་ས་གནས་བོད་རིགས་སྐྱིད་སྡུག་ཚོགས་པ་ཁག་གི་སྐུ་ཚབ་དང་མང་ཚོགས་བཅས་ཕེབས་ཡོད།དེ་ཡང་མཛད་སྒོའི་ཐོག་མར་བེལ་ཇི་ཡམ་བོད་རིགས་ཚོགས་པའི་ཚོགས་གཙོ་དཔལ་ལྡན་ཚེ་རིང་ལགས་ཀྱིས་འདས་པའི་ཟླ་གྲངས་བདུན་རིང་བེལ་ཇི་ཡམ་བོད་རིགས་ཚོགས་པའི་ངོས་ནས་ལས་འགུལ་ཇི་སྤེལ་སྐོར་ངོ་སྤྲོད་དང་། དེ་བཞིན་འབྱུང་འགྱུར་ཕྱི་ཟླ་ ༤ ནང་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་སྐོར་དང་། ཕྱི་ཟླ་བདུན་པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༧སྐུའི་འཁྲུངས་སྐར་སྲུང་བརྩི་ཞུ་ཕྱོགས་སྐོར་ངོ་སྤྲོད་གསུང་བཤད་གནང་ཡོད།དེ་རྗེས་སྐུ་མགྲོན་གཙོ་བོ་བེལ་ཇི་ཡམ་གྱི་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་དང་། བོད་མིའི་སྒྲིག་འཛུགས་སྲ་བརྟན་ཡོད་སྟབས་བོད་མི་ཚོས་རང་དབང་གི་ཆེད་དུ་འཐབ་རྩོད་བྱེད་བཞིན་པ་དེ་ཉིན་རེ་བཞིན་ཤུགས་ཇེ་ཆེར་འགྲོ་བཞིན་པའི་སྐོར་དྲན་གསོ་གནང་བ་དང་འབྲེལ་བོད་མིའི་ཐུན་མོང་མིན་པའི་འཇམ་པོའི་སྟོབས་ཏེ་སེམས་པ་བཟང་པོ་དང་། བྱམས་སྙིང་རྗེ། བཟོད་བསྲན། ཡ་རབས་བཟང་སྤྱོད་བཅས་ནི་གཞན་ལ་མིག་དཔེ་སྟོན་ཆོག་པ་ཡིན་པས་དེ་དག་མི་ཉམས་རྒྱུན་འཛིན་གནང་དགོས་པ་སོགས་ཀྱི་སྐོར་གསུངས་ཡོད།ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ལྕམ་སྐུ་མི་ལ་ནི་ཡ་བྷོ་ལོན་ཌེ་ལེ་ལགས་དང་། བཀའ་བརྒྱུད་ཡོན་ཏན་རྒྱ་མཚོ་གླིང་གི་འགན་འཛིན་ཇོ་ཧན་ལགས་ཀྱིས་ཉེ་ཆར་བོད་ཀྱི་རྒྱལ་ས་ལྷ་ས་ནས་རང་ལུས་མེར་སྲེག་བཏང་གནང་བའི་བོད་ཀྱི་གླུ་པ་གྲགས་ཅན་ཚེ་དབང་ནོར་བུ་ལགས་ཀྱི་སྐོར་གླེང་སློང་གནང་བ་དང་སྦྲགས་བོད་མིའི་ཐུན་མོང་མིན་པའི་ཡ་རབས་བཟང་སྤྱོད་ལ་རྗེས་སུ་ཡི་རང་གནང་ཡོད།

བེལ་ཇི་ཡམ་སྐུ་ཚབ་དོན་གཅོད་ཁང་གི་དྲུང་ཆེ་འཕྲིན་ལས་དབང་འདུས་ལགས་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ལྷན་བཅར་ཞུས་ཡོད་པ་བཅས།།