༄༅། །ཕྱི་ལོ་ ༢༠༢༢ ཟླ་ ༣ ཚེས་ ༢༡ ཉིན་བསྟན་འཛིན་སྒང་ས་གནས་འགོ་འཛིན་བསྟན་འཛིན་རིན་ཆེན་ལགས་དང་བསྟན་འཛིན་སྒང་ས་གནས་ལས་འཁྱུར་འགོ་འཛིན་དབྱངས་སྒྲུབ་ལགས་རྣམ་གཉིས་དབར་རྩིས་སྤྲོད་རྩིས་ལེན་གྱི་ལས་རིམ་ལེགས་པར་གྲུབ་མཚམས་བསྟན་འཛིན་རིན་ཆེན་ལགས་ཀྱིས་བསྟན་འཛིན་སྒང་ས་གནས་འགོ་འཛིན་གྱི་ལས་འགན་རྩིས་བཞེས་གནང་ཡོད།
དེ་ཡང་ཕྱི་ལོ་ ༢༠༢༢ ཟླ་ ༣ ཚེས་ ༡༥ ནས་ ༢༡ བར་རྩིས་སྤྲོད་རྩིས་ལེན་གྱི་ལས་དོན་ཆེད་བསྟན་འཛིན་སྒང་ས་གནས་མཉམ་འབྲེལ་དྲུང་ཆེ་རིན་ཆེན་དབང་ཕྱུག་ལགས་ཆེད་ཕེབས་ཀྱིས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཚབ་ཞུས་ཏེ་རྩིས་སྤྲོད་རྩིས་ལེན་གྱི་སྤྲོད་དཔང་གནང་ཡོད།
ལས་འཁྱུར་བསྟན་འཛིན་སྒང་ས་གནས་འགོ་འཛིན་དབྱངས་སྒྲུབ་ལགས་ཀྱིས་ཕྱི་ལོ་ ༢༠༡༣ ཟླ་ ༥ ཚེས་ ༢༧ ནས་ཕྱི་ལོ་ ༢༠༢༢ ཟླ་ ༣ ཚེས་ ༢༡ བར་ཁྱོན་བསྡོམས་ལོ་ངོ་དགུའི་རིང་བསྟན་འཛིན་སྒང་ས་གནས་འགོ་འཛིན་གྱི་ཐུགས་འགན་བཞེས་ཏེ་བསྟན་འཛིན་སྒང་ས་གནས་མི་མང་ལ་ཕན་པའི་ཞབས་འདེགས་བསྒྲུབས་གནང་ཡོད་པ་བཅས།།
