༄༅། །འདི་གར་བལ་ཡུལ་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བོད་རྒྱལ་ལོ་ ༢༡༤༩ རབ་གནས་ཆུ་སྟག་ལོའི་གནམ་ལོ་གསར་དུ་བཞད་པའི་བཀྲ་ཤིས་དགའ་སྟོན་གྱི་རྟེན་འབྲེལ་ལ་ཚེས་གཅིག་ཉིན་སྔར་རྒྱུན་ལྟར་བལ་ཡུལ་ཀཱཋ་མཱཎ་ཌུའི་ཁུལ་གྱི་དགོན་སྡེ་ཁག་དང་། གཞུང་དང་གཞུང་ཁོངས་མིན་པའི་ཚོགས་སྐྱིད་ཁག་གི་ལས་ཀྱི་སྣེ་མོ་བ་རྣམས་བལ་ཡུལ་སྐུ་ཚབ་དོན་གཅོད་ཁང་དུ་ངོ་བཅར་གྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་༧སྐུ་པར་མཐོང་གྲོལ་རིན་པོ་ཆེར་རྟེན་འབྲེལ་མཇལ་དར་སྒྲོན་འབུལ་ཞུས་པ་དང་། རྟེན་འབྲེལ་གསོལ་ཇ་འབྲས་སིལ་འདེགས་འབུལ་ཞུས། དེ་ནས་དོན་ཁང་མདུན་ཐང་དུ་སྐུ་རླུང་དར་ཆེན་བསྒྲེངས་འཛུགས་ཀྱིས་ཀྭི་བསྭོའི་ལྷ་རྒྱལ་འཐེན།ལོ་སར་གཞུང་འབྲེལ་བསང་གསོལ་མཛད་སྒོ་འདི་བཞིན་ཚེས་གསུམ་ཉིན་ཏེ་ཕྱི་ལོ་ ༢༠༢༢ ཟླ་ ༣ ཚེས་ ༥ ཉིན་འཇོ་ལ་ཁེལ་བསམ་གྲུབ་གླིང་བཟོ་གཞིས་ལས་ཁུངས་ཀྱི་མདུན་ཐང་དུ་གོ་སྒྲིག་ཞུས་ཏེ་གཟབ་རྒྱས་ངང་སྲུང་བརྩི་ཞུས་ཡོད། མཛད་སྒོའི་སྐུ་མགྲོན་གཙོ་བོར་རྒྱལ་སྤྱི་གསུང་རབ་སློབ་གཉེར་ཁང་གི་ངེས་སྟོན་པ་མཁན་པོ་ངག་དབང་འབྱོར་ལྡན་མཆོག་དང་། དམིགས་གསལ་སྐུ་མགྲོན་དུ་བལ་ཡུལ་ཨ་རི་གཞུང་ཚབ་ཁང་གི་གཞུང་ཚབ་ཆེན་མོ་ (Randy Berry) མཆོག་དང་། གཞུང་ཚབ་གཞོན་པ་ (Manuel Mccaller) ལགས། ཨོསྟྲེ་ལི་ཡཱའི་གཞུང་ཚབ་ལྕམ་སྐུ་ (Felicity Volk) མཆོག  ཨིན་ཡུལ་གཞུང་ཚབ་ལྕམ་སྐུ་ (Nicola Pollitt) མཆོག  སུད་སི་གཞུང་ཚབ་ལྕམ་སྐུ་ (Elisabeth Von Capeller) མཆོག གཞན་ཕ་རཱན་སི་གཞུང་ཚབ་གཞོན་པ། ཡུ་རོབ་སྤྱི་མཐུན་གྱི་སྐུ་ཚབ་ཁང་དང་མཉམ་སྦྲེལ་རྒྱལ་ཚོགས་སྐྱབས་བཅོས་ལས་ཁུངས་ཀྱི་སྐུ་ཚབ། ཨ་རི་གཞུང་ཚབ་ཁང་གི་ལས་བྱེད། བལ་ཡུལ་འགྲོ་བ་མིའི་ཐོབ་ཐང་ཚོགས་པ་ཁག་གི་ཚོགས་གཙོ་རྣམ་པ་གདན་ཞུ་ལྟར་ཆེད་ཕེབས་གནང་ཡོད་པ་དང་། དེ་བཞིན་སྤྱི་ཟུར་དང་། ས་འཐུས་ཚོགས་གཙོ། ས་གནས་འགོ་འཛིན། རང་བདེན་ཚོགས་གཙོ། གཞུང་དང་གཞུང་ཁོངས་མིན་པའི་ཚོགས་པ་ཁག་གི་འགན་འཛིན་རྣམ་པ། སེར་སྐྱ་མི་མང་མང་དག་ཅིག་རང་ལུགས་རྒྱན་གོས་གཟབ་འཆོར་སྤྲས་ནས་ཕེབས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་བསམ་གཏན་གླིང་དགོན་པའི་དགེ་འདུན་པ་རྣམ་པས་དུང་རྒྱ་གླིང་གི་སེར་འཕྲེང་དང་། བལ་ཡུལ་ཏྲེ་ཧོར་སྐྱིད་སྡུག་ནས་གཡག་དང་སེང་གེ། སྐུ་མགྲོན་གཙོ་བོ་མཆོག་དང་། སྐུ་ཚབ་དོན་གཅོད། སྤྱི་ཟུར། ས་འཐུས་ཚོགས་གཙོ། ས་གནས་འགོ་འཛིན་སོགས་གནད་ཡོད་མི་སྣ་རྣམ་པས་སྤོས་སྣེས་སྔོན་བསུས་ཏེ་༧རྒྱལ་བའི་༧སྐུ་པར་མཐོང་གྲོལ་རིན་པོ་ཆེ་འཇོ་ཁེལ་བཟོ་གཞིས་ལས་ཁུངས་ནས་གདན་འདྲེན་ཞུས་ཏེ་བཞུགས་ཁྲིར་ཞབས་སོར་འཁོད་ཅིང་མཁན་པོ་དང་དགེ་འདུན་པ་རྣམས་ནས་ཁྲུས་གསོལ་རབ་གནས་གནང་གྲུབ་མཚམས་སྐུ་མགྲོན་གཙོ་བོ་མཆོག་དང་། དོན་གཅོད་ནས་མཎྜལ་རྟེན་གསུམ་འདེགས་འབུལ་ཞུས་རྗེས་སྐུ་མགྲོན་གཞན་དང་སེར་སྐྱ་མི་མང་རྣམས་ནས་རིམ་བཞིན་རྟེན་འབྲེལ་མཇལ་དར་སྒྲོན་འབུལ་ཞུས།དེ་ནས་རྟེན་འབྲེལ་དགའ་སྟོན་མཚོན་བྱེད་དུ་བལ་ཡུལ་ཏྲེ་ཧོར་སྐྱིད་སྡུག་ནས་གངས་སེང་དཀར་མོ་དང་ནོར་གཡག་གི་འཁྲབ་སྟོན་དང་། རྣམ་རྒྱལ་མཐོ་སློབ་དང་ཨ་ཏི་ཤ་སློབ་གྲྭ།  ནོར་གླིང་རྩེད་ཚོགས་གསུམ་ནས་གཞས་སྣ་འཁྲབ་སྟོན་གཟིགས་འབུལ་ཞུས། སྐུ་མགྲོན་གཙོ་བོ་མཆོག་དང་སྐུ་ཚབ་དོན་གཅོད་རྣམ་གཉིས་ནས་ལོ་གསར་འཚམས་འདྲི་གསུང་བཤད་གནང་མཐར་སྐུ་མགྲོན་དང་མང་ཚོགས་ཡོངས་རྫོགས་སྐུ་བཞེངས་ཀྱིས་བཀྲ་ཤིས་རྣམ་ཐར་དང་བཅས་ཀྭི་བསྭོའི་ལྷ་རྒྱལ་འབྲུག་སྟོང་ལྡིར་བ་ལྟར་འཐེན་ནས་ལོ་གསར་བསང་གསོལ་མཛད་སྒོ་རྒྱལ་ཁའི་ངང་མཇུག་སྒྲིལ་ཡོད་པ་བཅས།།