༄༅། །ཕྱི་ལོ་ ༢༠༢༢ ཟླ་ ༣ ཚེས་ ༣༡ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་བཞུགས་སྒར་རྡ་ས་ཁུལ་གྱི་གསར་འགྱུར་ལས་ཁང་ཁག་གི་སྤྱི་ཁྱབ་རྩོམ་སྒྲིག་པ་དང་གསར་འགོད་པ་རྣམས་ལ་རྡ་ཤོད་རོ་ཡཱལ་ཀྶ་ཌལ་ (Hotel Royal Castle) ཞེས་པའི་གསོལ་མགྲོན་ཁང་དུ་གུང་ཚིགས་གསོལ་སྟོན་རྒྱས་པ་ཞིག་གོ་སྒྲིག་གནང་ཡོད། སྐབས་དེར་ཕྱི་དྲིལ་ལས་ཁུངས་ཀྱི་གསར་འགོད་འབྲེལ་མཐུད་པ་བསྟན་འཛིན་དཔལ་འབྱོར་ལགས་ཀྱིས་རྒྱ་གར་གྱི་གསར་འགོད་པ་རྣམས་ལ་མུ་མཐུད་བོད་དོན་སྐོར་གནས་ཚུལ་ཁྱབ་སྤེལ་གང་མང་སྤེལ་གནང་ཡོང་བའི་འབོད་སྐུལ་ཞུས་ཡོད། 

དེ་ཡང་གུང་ཚིགས་གསོལ་སྟོན་སྐབས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། བོད་ཀྱི་གསར་འགྱུར་ལས་ཁང་གི་འགན་འཛིན་དྲུང་འཕར་རྣམ་རྒྱལ་ཚེ་དབང་ལགས། འཛིན་སྐྱོང་འགན་འཛིན་ཟུང་དྲུང་བཀྲ་ཤིས་ཕུན་ཚོགས་ལགས། རྒྱ་གར་གྱི་གསར་འགྱུར་ཚན་པ་ཁག་གི་སྤྱི་ཁྱབ་རྩོམ་སྒྲིག་པ་དང་གསར་འགོད་པ་བཅས་དང་། དེ་བཞིན་བོད་ཀྱི་གསར་འགྱུར་བརྒྱུད་ལམ་ཁག་གི་རྩོམ་སྒྲིག་པ་དང་གསར་འགོད་པ་བཅས་ཁྱོན་མི་གྲངས་ ༦༠ ཙམ་ཕེབས་ཡོད།སྤྱིར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་ས་གནས་ཀྱི་གསར་འགྱུར་བརྒྱུད་ལམ་ཁག་ལ་ལོ་འཁོར་གསོལ་སྟོན་གོ་སྒྲིག་ཞུས་དགོས་དོན་གཙོ་བོ་ནི། བོད་མི་དང་རྒྱ་གར་གྱི་གསར་འགོད་པའི་དབར་སྔར་ལྷག་འབྲེལ་ལམ་དམ་ཟབ་ཡོང་ཐབས་དང་། ལྷག་པར་བོད་མིའི་སྒྲིག་འཛུགས་དང་ས་གནས་ཀྱི་གསར་འགོད་པའི་དབར་འབྲེལ་ལམ་དམ་ཟབ་ཡོང་སླད་དང་། ཕྱོགས་མཚུངས་གསར་འགྱུར་བརྒྱུད་ལམ་ཁག་གིས་སྤྱི་ཚོགས་ཁྲོད་གོ་རྟོགས་ཀྱི་ལས་དོན་རླབས་ཆེན་སྤེལ་བཞིན་པའི་བྱས་རྗེས་ལ་ངོས་འཛིན་གནང་ཆེད་ཀྱང་ཡིན་འདུག་པ་བཅས།།