༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཡུ་ཀེ་རེན་གྱི་བོད་དོན་རྒྱབ་སྐྱོར་ཚོགས་པར་གདུང་སེམས་མཉམ་སྐྱེའི་གསུང་འཕྲིན་ཞིག་ཕུལ་བའི་ནང་འཁོད་དོན།
ངས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཚབ་ཞུས་ཏེ་ཡུ་ཀེ་རེན་གཞུང་མང་གཉིས་ལ་ལྷག་བསམ་རྣམ་དག་དང་སྙིང་ཐག་པ་ནས་གདུང་སེམས་མཉམ་སྐྱེ་ཞུ་རྒྱུ་ཡིན། ཨུ་རུ་སུའི་དམག་གིས་ཡུ་ཀེ་རེན་ལ་བཙན་འཛུལ་བྱེད་བཞིན་པ་དེ་ནི་ཡུ་ཀེ་རེན་རྒྱལ་ཁབ་ཀྱི་བདག་དབང་ལ་རྩིས་མེད་རྡོག་རོལ་གཏོང་གི་ཡོད་པ་མ་ཟད། རྒྱལ་སྤྱིའི་ཁྲིམས་དང་། འབྲེལ་ལམ། ཆེ་མཐོང་བཅས་ལའང་རྩིས་མེད་རྡོག་རོལ་གཏོང་གི་ཡོད། ཡུ་ཀེ་རེན་མི་མང་གི་དཀའ་སྡུག་ཆེ་ཆེར་མ་འགྲོ་བའི་ཆེད་དུ་རྒྱལ་སྤྱིའི་ཚོགས་སྡེ་ནས་ཨུ་རུ་སུའི་བཙན་འཛུལ་ལ་ཡོད་དགུ་རྩལ་སྤྲུག་གིས་ངོ་རྒོལ་ཤུགས་ཆེ་གནང་དགོས། བོད་མི་ཚོར་མཚོན་ན་ཨུ་རུ་སུའི་དམག་གིས་བཙན་འཛུལ་བྱེད་བཞིན་པ་དེས་ཕྱི་ལོ་༡༩༥༠ ནང་རྒྱ་ནག་བཅིངས་བཀྲོལ་དམག་གིས་བོད་ལ་བཙན་འཛུལ་བྱས་པ་དེ་དྲན་གསོ་བྱེད་དུ་བཅུག་སོང་། ཐ་ན་མང་གཙོ་དང་ཕན་ཚུན་ཞི་བདེ་ངང་མཉམ་གནས་བྱེད་བཞིན་པའི་སྐབས་སུའང་འདི་ལྟ་བུའི་བཙན་འཛུལ་བྱེད་བཞིན་པ་མཐོང་དུས་དངོས་གནས་དྲང་གནས་ཧ་ལས་པ་དང་བཟོད་དཀའ་བའི་སྡུག་བསྔལ་ཞིག་རེད། བོད་མི་རྣམས་ཀྱིས་ཡུ་ཀེ་རེན་གཞུང་མང་གཉིས་ལ་གདུང་སེམས་མཉམ་སྐྱེ་དང་། ཡུ་ཀེ་རེན་མི་མང་གི་དཀའ་སྡུག་མགྱོགས་མྱུར་ཞི་བའི་སྨོན་འདུན་ཞུ་རྒྱུ་ཡིན།
ཡུ་ཀེ་རེན་ནང་བོད་དོན་རྒྱབ་སྐྱོར་བ་ཤུགས་ཆེ་ཡོད་པ་མ་ཟད། བོད་བརྒྱུད་ནང་བསྟན་ལ་དད་མོས་ཞུ་མཁན་ཡང་མང་དག་ཅིག་ཡོད། ང་ཚོས་དཀའ་སྡུག་མྱོང་བཞིན་པ་དང་འཐབ་རྩོད་བྱེད་བཞིན་པའི་སྐབས་ཡུ་ཀེ་རེན་གྱི་བོད་དོན་རྒྱབ་སྐྱོར་བ་ཚོས་ང་ཚོའི་རྒྱབ་ཏུ་བཞེངས་ནས་རྒྱབ་སྐྱོར་གནང་དང་གནང་མུས་ཡིན། ད་ལྟ་ཡུ་ཀེ་རེན་མི་མང་གིས་བཙན་འཛུལ་ལ་ཁ་གཏད་གཅོག་བཞིན་པའི་སྐབས་འདིར་ང་ཚོས་ཡུ་ཀེ་རེན་མི་མང་ལ་རྒྱབ་སྐྱོར་དང་གདུང་སེམས་མཉམ་སྐྱེ་ཞུ་རྒྱུ་ཡིན། ཡུ་ཀེ་རེན་གཞུང་ལ་འཇོན་ཐང་ལྡན་པའི་དབུ་ཁྲིད་ཅིག་ཡོད་པས། མགྱོགས་མྱུར་ཡུ་ཀེ་རེན་ནང་སླར་ཡང་རང་དབང་དང་བདེ་སྐྱིད་ཏན་ཏན་འཐོབ་ངེས་ཡིན་པ་ཕྲན་རང་ཉིད་ལ་ཡིད་ཆེས་ཡོད། ཅེས་འཁོད་ཡོད།།
