༄༅། །ནོར་འཛིན་དབང་མོ་ཞུ་བའི་ཕྲུ་གུ་གསུམ་ཅན་གྱི་ཨ་མ་ཞིག་ལ་རང་ལུས་མེར་སྲེག་གི་གནས་ཚུལ་ཕྱི་བསྒྲགས་བྱས་པའི་ཉེས་མིང་འོག་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་འདུག
དེ་ཡང་བོད་ཀྱི་དུས་བབ་ནས་གནང་ཚུལ་སྤེལ་གསལ་ལྟར་ན། ཡུལ་ཤུལ་ཁུལ་ཆུ་དམར་ལེབ་རྫོང་ཆིག་སྒྲིལ་གྲོང་སྔོན་ལུང་སྡེ་པའི་ཕྲུ་གུ་གསུམ་གྱི་ཨ་མ་ཡིན་པ་ནོར་འཛིན་དབང་མོ་ལགས་སུ་ཕྱི་ལོ་ ༢༠༡༣ ལོར་ཆུ་དམར་ལེབ་རྫོང་དུ་བོད་མི་ཞིག་གིས་རང་ལུས་མེར་སྲེག་བཏང་བའི་གནས་ཚུལ་ཕྱི་བསྒྲགས་བྱས་པའི་ཉེས་མིང་འོག་ཆུ་དམར་ལེབ་རྫོང་མི་དམངས་ཁྲིམས་ཁང་ཟེར་བས་ཁོ་མོར་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། བཙོན་ཁང་དུ་ལས་བཀོལ་མང་དྲགས་པ་དང་རང་གི་ནང་མི་བུ་ཕྲུག་དང་བཅས་པར་ཐུག་མི་ཐུབ་པ་སོགས་ཀྱི་རྒྱུ་རྐྱེན་འོག་ད་ལྟ་ནོར་འཛིན་དབང་མོ་ལགས་ཀྱི་གཟུགས་གཞིའི་གནས་སྟངས་བདེ་པོ་མེད་པ་ཆགས་ཡོད་འདུག
གནས་ཚུལ་མཁོ་སྤྲོད་པས་འགྲེལ་བརྗོད་གནང་བ་ལྟར་ན། ནོར་འཛིན་དབང་མོ་ལགས་སུ་ཕྱི་ལོ་ ༢༠༢༠ ཟླ་ ༥ པའི་ནང་ཆུ་དམར་ལེབ་རྫོང་མི་དམངས་ཁྲིམས་ཁང་གིས་གསང་བའི་ཁྲིམས་ར་ཚོགས་ནས་ལུ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་དང་། ཁོང་ལ་བཙོན་འཇུག་ཁྲིམས་ཐག་གཅོད་དོན་གཙོ་བོ་ནི། ཕྱི་ལོ་ ༢༠༡༣ ཟླ་ ༥ ཚེས་ ༢༧ ཉིན་གཞོན་སྐྱེས་བསྟན་འཛིན་ཤེས་རབ་ལགས་ཀྱིས་ཆུ་དམར་ལེབ་རྫོང་ཆིག་སྒྲིལ་གྲོང་རྡལ་དུ་རང་ལུས་མེར་སྲེག་བཏང་བའི་གནས་ཚུལ་རྣམས་ཕྱི་བསྒྲགས་ཀྱི་ཉེས་འཛུགས་བྱས་པས་ཡིན་པ་རེད་ལ། ནོར་འཛིན་དབང་མོ་ལགས་དང་དཔའ་བོ་དམ་པ་བསྟན་འཛིན་ཤེས་རབ་ལགས་གཉིས་བར་གཉེན་ཉེ་སྤུན་མཆེད་སོགས་ཀྱི་འབྲེལ་བ་གང་ཡང་མེད་པ་རེད།
གནས་ཚུལ་མཁོ་སྤྲོད་པས་འགྲེལ་བརྗོད་ལྟར་ན། ཕྱི་ལོ་ ༢༠༢༠ ལོར་ནོར་འཛིན་དབང་མོ་ལགས་འཇུ་བཟུང་བྱེད་སྐབས། ས་གནས་ཉེན་རྟོག་པས་ཐོག་མར་ནོར་འཛིན་དབང་མོ་ལགས་ཞིབ་བཤེར་ཁང་དུ་ཆུ་ཚོད་ཉི་ཤུའི་རིང་བཀག་ཉར་བྱས་པ་དང་། ལག་པར་ལྕགས་སྒྲོན་བརྒྱབ་ནས་སྐར་མ་འགའི་རིང་ནང་མིར་ཐུག་ཏུ་བཅུག་ཡོད་ཀྱང་། ནང་མི་ཚོས་སྤྲད་པའི་གྱོན་ཆས་དང་ཅ་དངོས་གང་ཡང་ལེན་བཅུག་མེད་པ་རེད།
སྤྱིར་ནོར་འཛིན་དབང་མོ་ལགས་ནི་ཁྲི་འདུ་རྫོང་སྡོམ་མདའ་ཞང་སྐར་ཆེན་སྡེ་བའི་རུ་ཆེན་དང་པོ་ནས་ཡིན་ཞིང་། ཕྱི་ལོ་ ༢༠༡༦ ལོར་ཁོང་ཆུ་དམར་ལེབ་རྫོང་ཆིག་སྒྲིལ་གྲོང་རྡལ་སྔོན་ལུང་ས་གནས་སུ་གནས་ལ་ཕྱིན་ནས། འབྲོག་པའི་འཚོ་བ་སྐྱེལ་བཞིན་ཡོད་པ་དང་། བཟའ་ཟླ་ཉི་མ་གཙོས་ནང་མི་ཚོས་བཙོན་ཁང་དུ་ཁོ་མོར་ཐུག་ཐབས་གང་ཡོང་བྱས་ཡོད་ནའང་། ད་ལྟའི་བར་རྒྱ་ནག་གཞུང་གིས་ཐུག་བཅུག་མེད་པ་རེད་ལ། ད་ལྟ་ཁོང་ལ་རང་ཁྱིམ་དུ་བཟའ་ཟླ་ཉི་མ་གཙོས་བུ་ཕྲུག་ཆུང་ཤོས་ལོ་ ༢ དང་ཆེ་ཤོས་ལོ་ ༥ བཅས་ཁྱོན་བྱིས་པ་ ༣ ཡོད་འདུག །
