༄༅། །ཨ་རིའི་ཕྱི་སྲིད་དྲུང་ཆེ་ཟུར་པ་ལྕམ་མ་ཊི་ལི་ནི་ཨལ་བ་རེཊ་ (Madeleine Albright) མཆོག་ཕྱི་ལོ་ ༢༠༢༢ ཟླ་བ་ ༠༣ ཚེས་ ༢༣ ཉིན་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ཕྱི་ལོ་ ༢༠༢༢ ཟླ་བ་ ༠༣ ཚེས་ ༢༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གང་གི་སྲས་མོ་ཨེ་ལ་ཡིས་ཨལ་བ་རེཊ་ (Alice Patterson Albright) ལགས་ཀྱི་མཚན་ཐོག་ཏུ་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ཐུགས་གསོའི་གསུང་འཕྲིན་ཞིག་གནང་འདུག། 

དེ་ཡང་ཐུགས་གསོའི་གསུང་འཕྲིན་ནང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཚེ་འདས་ལྕམ་མ་ཊི་ལི་ནི་ཨལ་བ་རེཊ་མཆོག་གི་སྲས་མོ་ཨེ་ལ་ཡིས་ཨལ་བ་རེཊ་ལགས་སུ་ཁོ་མོའི་མ་ཡུམ་དང་ཨ་རིའི་ཕྱི་སྲིད་དྲུང་ཆེ་ཟུར་པ་མཆོག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་གོ་ཐོས་བྱུང་བར་ཧ་ཅང་བློ་ཕམ་ཆེན་པོ་བྱུང་ཞེས་དང་། དཀའ་སྡུག་ཆེ་བའི་དུས་སྐབས་འདིར་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ཁོང་དང་ཁོང་གི་ནང་མི་ཉེ་འབྲེལ། དེ་བཞིན་ཨ་རིའི་མི་མང་ཡོངས་ལ་སེམས་གཏིང་ནས་ཐུགས་གསོ་ཞུ་རྒྱུ་ཡིན་ཞེས་གསུངས་འདུག 

མུ་མཐུད་དཔལ་ལྡན་སྲིད་སྐྱོང་མཆོག་གིས། ཚེ་འདས་ལྕམ་མ་ཊི་ལི་ནི་ཨལ་བ་རེཊ་མཆོག་གིས་གོ་ལ་སྤྱི་ཡོངས་སུ་མི་ས་ཡ་མང་པོའི་འགྲོ་བ་མིའི་ཐོབ་ཐང་དང་རང་དབང་ཆེད་ཞུ་གཏུག་འཐབ་རྩོད་གནང་བ་ལྟར་བོད་ཀྱི་གནད་དོན་ཐོག་ལའང་ཞུ་གཏུག་འཐབ་རྩོད་གནང་ཡོད་སྟབས། དམ་པ་ཁོང་འདས་གྲོངས་སུ་གྱུར་བའི་གྱོང་གུད་བོད་མི་ཡོངས་ཀྱི་སེམས་གཏིང་ནས་ཚོར་ངེས་རེད། དམ་པ་དེ་ཉི་ནི་ཨ་རིའི་བོད་དོན་དམིགས་བསལ་འབྲེལ་མཐུད་པ་ཐོག་མར་བསྐོ་བཞག་གནང་མཁན་གྱི་ཨ་རིའི་ཕྱི་སྲིད་དྲུང་ཆེ་ཡིན་པ་དང་། གནད་འགག་ཆེ་བའི་ལས་གནས་དེ་བརྒྱུད་ཨ་རི་གཞུང་ནས་བོད་རྒྱའི་དཀའ་རྙོག་སེལ་ཐབས་སུ་རོགས་ཕན་གནང་ཡོད། ང་ཚོས་དམ་པ་ཁོང་གིས་དབུ་ཁྲིད་ལམ་སྟོན་དང་རོགས་སྐྱོར་གནང་བའི་བཀའ་དྲིན་དུས་རྟག་ཏུ་སྙིང་ལ་འཆང་བཞིན་ཡོད་ཅེས་དང་། 

མཐར་དཔལ་ལྡན་སྲིད་སྐྱོང་མཆོག་གིས་དམ་པ་དེ་ཉིད་ཀྱིས་སྐུ་ཚེ་ཧྲིལ་པོར་སྐུ་ལས་བསྐྱོན་པ་ལྟར་ང་ཚོས་སྔར་བས་མང་གཙོ་དང་། དྲང་བདེན། ཞི་བདེ་ལྡན་པའི་འཛམ་གླིང་ཞིག་བསྐྲུན་པར་ཞབས་འདེགས་ཞུ་ཐུབ་པའི་རེ་བ་ཡོད་ཅེས་གསུངས་འདུག །