༄༅།།ཕྱི་ལོ་ ༢༠༢༢ ཟླ་ ༣ ཚེས་ ༠༨ ཉིན་གྱི་སྔ་དྲོ་ཆུ་ཚོད་ ༡༡།༣༠ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྐུ་མགྲོན་གཙོ་བོར་མགྲོན་འབོད་ལྟར། རྡ་ཤོད་ཨེ་པེག་སི་སྨན་ཁང་ (Apex multi-speciality hospital) གསར་པ་དབུ་འབྱེད་མཛད་སྒོར་ཆེད་ཕེབས་གནང་ཡོད། ཨེ་པེག་སི་སྨན་ཁང་ནི་ནད་རིགས་ཆེད་ལས་སྨན་ཁང་ཞིག་ཡིན་ཞིང་། བཞུགས་སྒར་རྡ་སར་གཏན་བཞུགས་རྒྱ་གར་གཞུང་གི་སྨན་པ་བགྲས་ཡོལ་པ་དང་བོད་དོན་རྒྱབ་སྐྱོར་བ་སྐུ་ཞབས་རམ་སུ་བ་རོབ་ (Ram Swaroop) ལགས་སོགས་ཀྱིས་བོད་མི་ཚུད་པའི་ས་གནས་ཡུལ་མི་རྣམས་ལ་དམིགས་ཏེ་གསར་འཛུགས་གནང་བ་ཞིག་ཡིན།
དེ་ཡང་དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྨན་ཁང་དེས་མ་འོངས་པར་ས་གནས་ཡུལ་མི་ཙམ་མ་ཟད། བོད་མི་རྣམས་ལའང་ཐད་ཀར་ཕན་ཐོགས་ཆེན་པོ་འབྱུང་ངེས་ཡིན་པ་དང་། སྨན་ཁང་གི་ངོས་ནས་བོད་མིའི་སྒྲིག་འཛུགས་ཀྱི་ལས་བྱེད་རྣམས་ལ་ཆག་ཡང་གནང་རྒྱུ་ཡིན་སྐོར་བརྗོད་པར་རྗེས་སུ་ཡི་རང་ཞུས་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་མི་རྣམས་ཐོག་མར་རྒྱ་གར་ལ་བཙན་བྱོལ་དུ་འབྱོར་སྐབས་ནས་བཟུང་ད་བར་རྒྱ་གར་དབུས་གཞུང་དང་། ཧི་མཱ་ཅལ་མངའ་སྡེའི་གཞུང་། དེ་བཞིན་རྒྱ་གར་མི་མང་བཅས་ནས་བཙན་བྱོལ་བོད་མི་རྣམས་ལ་རྒྱབ་སྐྱོར་གནང་དང་གནང་མུས་ཡིན་སྟབས། རྒྱ་གར་གཞུང་མང་གཉིས་ནི་བཙན་བྱོལ་བོད་མི་རྣམས་ལ་མཚོན་ན་བཀའ་དྲིན་ཤིན་ཏུ་ཆེན་པོ་ཡིན། ཞེས་དང་།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བཙན་བྱོལ་བོད་མི་རྣམས་རྒྱ་གར་གྱིས་གཙོས་ཕྱི་རྒྱལ་ཡུལ་གྲུ་ཁག་གི་ནང་ཁ་ཐོར་ནས་གནས་ཡོད་ཀྱང་བཞུགས་སྒར་རྡ་ས་ནི་བཙན་བྱོལ་བོད་མི་གནས་སའི་བསྟི་གནས་ཆགས་ཡོད་པ་ཟད། ཧི་མཱ་ཅལ་མངའ་སྡེ་གཞུང་གི་བློན་ཆེན་རིམ་བྱོན་རྣམས་དང་། ས་གནས་རྒྱ་གར་བ་བོད་ཀྱི་གྲོགས་པོ་ཚོས་བོད་མི་རྣམས་ལ་མཐུན་འགྱུར་རོགས་རམ་གནང་དང་གནང་བཞིན་ཡོད་པས་ཧི་མཱ་ཅལ་མངའ་སྡེའི་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་གསུངས་ཡོད་པ་བཅས།།
