༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཞིས་བྱེས་བོད་མི་ཡོངས་ལ་བོད་རྒྱལ་ལོ་ ༢༡༤༩ རབ་གནས་ཆུ་སྟག་ལོའི་གནམ་ལོ་གསར་དུ་བཞད་པའི་དགའ་སྟོན་གྱི་རྟེན་འབྲེལ་ལ་འཚམས་འདྲི་གནང་དོན། གཞིས་བྱེས་བོད་མི་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། སྐབས་ ༡༦ པའི་བཀའ་ཤག་སླེབས་ཏེ་གནམ་ལོ་གསར་ཚེས་སྲུང་བརྩི་ཞུ་རྒྱུ་འདི་ཐེངས་དང་པོ་ཆགས་ཀྱི་ཡོད་སྟབས། བོད་རྒྱལ་ལོ་ ༢༡༤༩ རབ་གནས་ཆུ་སྟག་ལོའི་གནམ་ལོའི་རང་ཞལ་གསར་དུ་བཞད་པར་གཞིས་བྱེས་བོད་མི་ཡོངས་ལ་བཀའ་ཤག་སྐབས་ ༡༦ པའི་ངོས་ནས་གནམ་ལོ་གསར་ཚེས་ཀྱི་དགའ་སྟོན་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
རྣམ་པ་ཚོ་ཚང་མ་སྐུ་ཁམས་བདེ་ཐང་ཡོང་བ་དང་རང་ཉིད་ཀྱི་འདོད་པ་གཞིར་བཟུང་ལས་དོན་མཐའ་དག་འགྲུབ་པའི་རེ་བ་ཞུ་བཞིན་ཡོད། ལྷག་པར་ང་ཚོ་ཚང་མ་འཐབ་རྩོད་བྱེད་མཁན་གྱི་མི་རིགས་ཤིག་ཡིན་པར་བརྟེན། བོད་ནང་ཡོད་པའི་བོད་མི་ཚོས་ད་བར་སྐུ་ལས་བསྐྱོན་པ་དང་། བཙན་བྱོལ་ནང་ཡོད་མཁན་ཚོ་ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་དབུ་ཁྲིད་ལམ་སྟོན་འོག་ཤར་བསྐྱོད་བྱས་ཏེ་ད་བར་རྒྱལ་སྤྱིའི་བཙན་བྱོལ་སྤྱི་ཚོགས་ནང་ནས་གཞན་དང་མི་འདྲ་བ་ཞིག་ཆགས་ཡོད་པ་དང་། བོད་པའི་འཐབ་རྩོད་འདི་མི་ཉུང་ངུ་ལས་མེད་ནའང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ད་བར་རྒྱ་ནག་ཡིན་ནའང་དོ་སྣང་མ་བྱས་པར་བཞག་པ་མིན་པ་དང་། རྒྱལ་སྤྱིའི་ནང་བོད་དོན་ཐོག་ད་ལྟ་ཡིན་ནའང་མུ་མཐུད་རྒྱབ་སྐྱོར་ཡོང་བཞིན་པ་དེ་དག་ཚང་མ་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་རེད།
གཉིས་པ་ནི། བོད་ནང་ཡོད་པའི་བོད་མི་ཚོས་སོ་སོའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་སྟེ་དཀའ་ལས་བརྒྱབ་པ་ལ་བརྟེན་ནས་བྱུང་བ་རེད།
གསུམ་པ་ནི། བཙན་བྱོལ་ནང་གི་མི་རབས་རྒན་པ་ཚོས་སྐུ་ལས་བསྐྱོན་ཏེ་ཡོང་བ་རེད། དེ་རིང་ལོ་གསར་གྱི་དུས་སྟོན་དང་སྟབས་བསྟུན་རྣམ་པ་ཚོར་ཞུ་རྒྱུ་གཙོ་བོ་གཅིག་ནི། ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཁམས་ཧ་ཅང་བདེ་པོ་དང་། སྐུ་ལྷོད་ལྷོད་གནང་སྟེ་བཞུགས་ཡོད། དེར་བརྟེན་རྣམ་པ་ཚོ་ཐུགས་གཡེང་རྩ་བ་ཉིད་ནས་གནང་མི་དགོས་ཞེས་ཞུ་རྒྱུ་ཡིན།
འཛིན་སྐྱོང་བཀའ་ཤག་གི་འགན་དེ་སྲིད་སྐྱོང་དང་བཀའ་ཤག་ལྷན་རྒྱས། འཛིན་སྐྱོང་གི་ལས་བྱེད་ཡོངས་ལ་ཡོད་སྟབས། མང་ཚོགས་ལ་ཞུ་རྒྱུར་ཕྱི་ལོ་ ༢༠༢༡ ཟླ་ ༥ ཚེས་ ༢༧ ཉིན་དམ་བཅའ་ཕུལ་བ་ནས་བཟུང་བོད་མིའི་སྒྲིག་འཛུགས་ནས་ལས་ཀ་གང་ཞིག་བྱས་པ་ཡིན་ནའང་ཁྲིམས་དང་སྒྲིག་གཞི་ཁག་དང་མཐུན་པ། འཆར་གཞི་དང་ལྡན་པ། ད་ལྟ་དང་ཕུགས་བཅས་བསམ་བློ་གཞི་ལ་བཞག་ནས་ལས་དོན་སྒྲུབ་བཞིན་ཡོད། ད་ལྟ་ལས་དོན་བྱེད་བཞིན་པ་དེ་དག་རིམ་བཞིན་མང་ཚོགས་ལ་གསལ་བསྒྲགས་ཟིན་པ་ཁག་གཅིག་དང་། མ་འོངས་པར་ལས་གཞི་སྤེལ་རིམ་བཞིན་གསལ་བསྒྲགས་ཡོང་རྒྱུ་ཁག་རྣམ་པ་ཚོས་གསན་གྱི་རེད། ང་ཚོ་ཚང་མས་ངོས་ནས་འབད་བརྩོན་གནང་སྟེ་མཉམ་རུབ་ཀྱི་ནུས་པ་དེ་འདོན་དགོས་ཀྱི་ཡོད་པར་སོང་། ངས་དུས་རྒྱུན་དུ་ང་ཚོ་ཚང་མས་ནུས་པ་མཉམ་སྤུངས་བྱེད་དགོས་ཞེས་གལ་ཆེན་པོ་བྱས་ནས་ཞུ་བཞིན་ཡོད། དེར་བརྟེན་བོད་ཕྱི་ནང་གཉིས་སུ་ཡོད་པའི་བོད་མི་ཚང་མའི་ནུས་པ་མཉམ་དུ་སྤུངས་བ་ཡིན་ན། གྲུབ་འབྲས་ཀྱང་དེ་ལྟར་འཐོན་གྱི་རེད། ཅེས་འབོད་སྐུལ་ཞུས་པ་དང་འབྲེལ་བོད་མི་ནང་ཁུལ་ཕར་ཚུར་མཐོང་དུས་ཕན་ཚུན་དགྲ་སྡང་པོ་ལྟ་བུ་ཕལ་ཆེར་སྐབས་རེ་རྒྱ་ནག་ལས་དགྲ་སྡང་པའི་གནས་སྟངས་ལྟ་བུ་དེང་སྐབས་སྤྱི་ཚོགས་ནང་ཆགས་ཡོང་གི་འདུག སྤྱི་ཚོགས་ནང་ཁག་གཅིག་གིས་རྒྱ་ནག་གི་རྒྱུག་ཁྱི་བྱེད་རྒྱུ་དེ་འདྲ་ཡོང་གི་ཡོད། དེ་བཞིན་དོལ་རྒྱལ་རྗེས་འབྲང་བ་ལ་བརྟེན་ནས་ཡོང་གི་ཡོད།
ཁག་གཅིག་ནི་ཚོགས་མ་བསགས་པར་སྤྱི་ཚོགས་ནང་སྐད་ཆ་གང་བྱུང་མང་བྱུང་བཤད་དགོས་མཁན་རིགས་ཀྱང་ཡོང་གི་ཡོད་པར་བརྟེན་དེ་དག་གིས་སོ་སོའི་རྩ་དོན་དང་། སོ་སོའི་ལས་འགན་ཤེས་པར་བྱས་ཏེ་རང་རེའི་སྤྱི་ཚོགས་ནང་དཀྲུག་ཤིང་བརྒྱབ་པ་ལས་རྒྱ་ནག་ལ་ཁ་གཏད་ནས་ནུས་པ་སྤུངས་ཐུབ་པ་ཡིན་ན། དེ་གཞིར་བཟུང་གྲུབ་འབྲས་འཐོན་ཡོང་གི་རེད། དེ་དག་ལ་མང་ཚོགས་ངོས་ནས་དོགས་ཟོན་དང་། བོད་མིའི་སྒྲིག་འཛུགས་ཀྱི་ངོས་ནས་གང་ཐུབ་ཕྱི་གསལ་ནང་གསལ་དང་མང་ཚོགས་ལ་འགན་འཁུར་རྒྱུ་དེ་ཡང་མང་ཚོགས་དང་ཐད་ཀར་ཡིན་ནའང་འདྲ་འདུག བརྒྱུད་ལམ་ཁག་གི་བརྒྱུད་ནས་ཡིན་ནའང་འདྲ་འདུག གྲོས་ཚོགས་ཀྱི་བརྒྱུད་ནས་ཡིན་ནའང་འདྲ་འདུག སྤྱི་ཚོགས་ནང་མིང་ངོ་རྟགས་ཆོད་ནས་དྲི་བ་གཏོང་མཁན་རིགས་བྱུང་བ་ཡིན་ན། བཀའ་ཤག་སྐབས་ ༡༦ པའི་ལས་དོན་གང་བྱེད་པ་ཡིན་ནའང་ཕྱི་གསལ་ནང་གསལ་དང་འགན་འཁུར། རྩིས་བརྒྱབ་པའི་ཐོག་ནས་དེ་དག་ཚང་མར་གསལ་བཤད་ལན་འདེབས་བྱེད་རྒྱུའི་ལངས་ཕྱོགས་འཛིན་བཞིན་ཡོད།
མང་གཙོ་ཚད་དང་ལྡན་པ་ཞིག་ཡོང་བར་ང་ཚོ་ཚང་མས་ལས་འགན་དང་སོ་སོའི་ས་མཚམས་ཀྱི་དབྱེ་བ་འབྱེད་ཤེས་ཐུབ་པ་ཡིན་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕུགས་རྒྱང་རིང་པོའི་དགོངས་གཞི་ཡོད་པ་ལྟར་བོད་མི་ཚང་མས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་སྒྲུབ་ཐུབ་པ་ཡིན་ན། མ་འོངས་པར་བོད་པའི་བདེན་མཐའ་ཏན་ཏན་མགྱོགས་མྱུར་གསལ་རྒྱུའི་ཐོག་ལ་ནུས་པ་འཐོན་ངེས་རེད་ཅེས་ཞུ་རྒྱུ་ཡིན། སླར་ཡང་གཞིས་བྱེས་བོད་མི་ཡོངས་ལ་གནམ་ལོ་གསར་ཚེས་ཀྱི་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། སྐུ་གཟུགས་བདེ་ཐང་ཡོང་བ། ནམ་རྒྱུན་ནས་དགོངས་པ་བཞེས་སྟངས་དེ་བོད་སྤྱི་པའི་དོན་དུ་དགོངས་པ་བཞེས་ཏེ་ད་བར་མུ་མཐུད་ཕྱག་ལས་གནང་བཞིན་པ་དེ་དག་མཇུག་སྐྱོང་ཚད་དང་ལྡན་པ་ཡོང་དགོས་རྒྱུ་གལ་ཆེན་པོ་རེད། དེ་དག་གནང་རོགས་ཞེས་ཞུ་རྒྱུ་ཡིན་ཐུགས་རྗེ་ཆེ། །
