༄༅། །ཕྱི་ལོ་ ༢༠༢༢ ཟླ་ ༣ ཚེས་ ༢༧ ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཡུ་རོབ་དང་ཨ་ཕི་རི་ཀའི་ཁུལ་གྱི་སྤྱི་འཐུས་ཐུབ་བསྟན་དབང་ཆེན་ལགས་དང་སྤྱི་འཐུས་ཐུབ་བསྟན་རྒྱ་མཚོ་ལགས་བཅས་ནས་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་ཏཱ་ལའི་བླ་མའི་དགེ་རྩ་ཚོགས་པའི་མཐུན་སྦྱོར་འོག་བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་ཨིན་སྐད་ནང་ཡོད་པའི་༸རྒྱལ་བའི་གསུང་རྩོམ་བོད་འགྱུར་ཞུས་པའི་ཕྱག་དེབ་བདུན་དབུ་འབྱེད་གནང་སོང་།
དེ་ཡང་དབུ་འབྱེད་མཛད་སྒོའི་ཐོག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཡུ་རོབ་དང་ཨ་ཕི་རི་ཀའི་ཁུལ་གྱི་སྤྱི་འཐུས་ཐུབ་བསྟན་དབང་ཆེན་ལགས་དང་སྤྱི་འཐུས་ཐུབ་བསྟན་རྒྱ་མཚོ་ལགས། དེ་བཞིན་བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གི་འགན་འཛིན་དང་ལས་རོགས། ཏཱ་ལའི་བླ་མ་དགེ་རྩ་ཚོགས་པའི་དྲུང་ཆེ་འཇམ་དཔལ་ལྷུན་གྲུབ་ལགས་བཅས་རྣམ་པ་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།

བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གི་འགན་འཛིན་དང་ཕྱག་རོགས་ལས་བྱེད་རྣམ་པས་ཆོད་སེམས་བརྟན་པོ་དང་ཕྱག་ལས་ཞིབ་ཚགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་ཚོ་ཚང་མས་ལོ་ཙཱ་བ་གསོ་སྐྱོང་བྱེད་རྒྱུ་དེ་གལ་ཆེན་པོ་རྩི་ཡི་ཡོད། འོན་ཀྱང་ལོ་ཙཱ་བ་ཚད་དང་ལྡན་པ་ཡོང་རྒྱུ་དེ་ཁག་པོ་ཆགས་འདུག  ཨ་རིའི་ཀོ་ལ་རེ་ཌོ་ (Colorado) མངའ་སྡེའི་ནང་ལོ་གཉིས་རེ་མཚམས་སུ་རྒྱལ་སྤྱིའི་ལོ་ཙཱ་བའི་ཚོགས་འདུ་འཚོགས་སྐབས་བོད་པའི་ལོ་ཙཱ་བའི་སློབ་སྟོན་པ་ཐུབ་བསྟན་སྤྱིན་པ་ལགས་མ་གཏོགས་ཚོགས་འདུར་བཅར་མཁན་ཞེ་དྲགས་མཐོང་རྒྱུ་མེད། རྒྱལ་སྤྱིའི་ལོ་ཙཱ་བའི་ཚོགས་འདུ་འཚོགས་སྐབས་ཕྱི་རྒྱལ་མི་རིགས་མ་གཏོགས་བོད་པའི་ལོ་ཙཱ་བ་ཞེ་དྲགས་མཐོང་རྒྱུ་མེད། ཅེས་དང་། བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་མ་འོངས་པར་བོད་ཡིག་དང་ཨིན་ཡིག་གཉིས་ཀའི་ཐོག་ནས་ཕར་སྒྱུར་ཚུར་སྒྱུར་བྱེད་ཐུབ་མཁན་གྱི་ལོ་ཙཱ་བ་གསོ་སྐྱོང་གནང་རྒྱུར་བསམ་བློ་གཏོང་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གདུལ་བྱའི་ཁམས་དང་མོས་པར་བསྟུན་ནས་གསུང་ཆོས་གནང་གི་ཡོད་སྟབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་སྐད་དང་ཨིན་སྐད་ཐོག་གསུང་ཆོས་གནང་སྐབས་ཁྱད་པར་ཡོད། མ་འོངས་པར་བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་ཨིན་ཡིག་ཐོག་གསུངས་པའི་བཀའ་སློབ་རྣམས་ཕྱོགས་སྒྲིག་གནང་ཐུབ་པ་ཡིན་ན་དེས་བོད་པའི་གཞོན་སྐྱེས་རྣམས་ཀྱིས་བོད་ཡིག་དང་ཨིན་ཡིག་གཉིས་ཀ་ཡར་རྒྱས་གཏོང་བར་བོད་ཡིག་དང་ཨིན་ཡིག་ཐོག་ཡོད་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་རྣམས་མཚུངས་བསྡུར་བྱས་ནས་ལྟ་ཀློག་བྱེད་པ་ཡིན་ན་ཏན་ཏན་ཕན་ཐོགས་ཆེ་བ་ཡོང་གི་རེད། གཙོ་བོ་དཔེ་དེབ་བཀླགས་ནས་ཉམས་ལེན་བྱེད་རྒྱུ་གལ་ཆེན་པོ་ཆགས་ཡོད། ཅེས་དང་། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་དེང་སང་མི་ཚང་མ་བྲེལ་ཟིང་ཆེན་པོ་ཡོད་སྟབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་རྣམས་སྒྲ་ལྡན་དང་བརྙན་དེབ་བཟོ་ཐུབ་ན་ཕན་ཐོགས་ཆེ་བ་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་དེ་དག་ཨིན་ཡིག་ལས་ཚུར་སྒྱུར་སྐབས་མི་མང་གིས་གོ་བདེ་པོ་ཞིག་བཟོ་རྒྱུ་གལ་ཆེན་པོ་ཆགས་ཡོད། ཅེས་གསུངས། གཞན་ཡང་དཔལ་ལྡན་སྲིད་སྐྱོང་མཆོག་གིས་ཕྲུ་གུ་རྣམས་ལ་དམིགས་ཏེ་འགུལ་རིས་བཟོ་རྒྱུར་ཤུགས་སྣོན་རྒྱག་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཡོངས་སུ་རྫོགས་པ་ཉན་པ་དང་ལྟ་ཀློག་བྱས་ཏེ་ཉམས་ལེན་གནང་རྒྱུ་གལ་ཆེན་པོ་ཆགས་ཡོད། ཅེས་སོགས་ཀྱི་གསུང་བཤད་གནང་ཡོད་པ་བཅས།།