༄༅། །ཕྱི་ལོ་ ༢༠༢༢ ཟླ་ ༣ ཚེས་ ༡༠ ཉིན་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ལྕམ་སྐུ་ཀིམ་བྷར་ལེ་ཀིཊ་ཆིན་ (Kimberley Kitching) མཆོག་སྐུ་ཚེའི་འཕེན་པ་རྫོགས་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དམ་པ་དེ་ཉིད་ཀྱི་སྐུ་ཟླ་སྐུ་ཞབས་ཨན་ཌི་རེའོ་ལན་ཌར་ཡོ་ (Andrew Landeryou) ལགས་ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན། འགྲོ་བ་མིའི་ཐོབ་ཐང་དང་རང་དབང་གི་དོན་དུ་འཐབ་རྩོད་ཤུགས་ཆེ་གནང་མཁན་སྐུ་ཉིད་ཀྱི་སྐུ་ཟླ་ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་གློ་བུར་དུ་སྐུ་ཚེའི་འཕེན་པ་རྫོགས་པའི་ཡིད་སྐྱོ་བའི་གནས་ཚུལ་ཤེས་རྟོགས་བྱུང་བས་ཧ་ཅང་བློ་ཕམ་བྱུང་།

ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་ནི། བོད་མིའི་གྲོགས་པོ་ཡིན་པ་ཙམ་མ་ཟད། བཙན་གནོན་འོག་ཡོད་པའི་འཛམ་གླིང་གི་སྐྱེ་བོ་ཀུན་གྱི་གྲོགས་པོ་ཞིག་ཀྱང་ཆགས་ཡོད། ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ (IPAC) ཟུང་འབྲེལ་ཚོགས་གཙོ་ཡིན་པའི་ཆ་ནས་ལྕམ་སྐུ་མཆོག་གིས་བློས་བཏང་གིས་ཨོསྟྲེ་ལི་ཡཱའི་ནང་གི་མང་གཙོ་དང་འགྲོ་བ་མིའི་ཐོབ་ཐང་ཆེད་དུ་རྒྱབ་སྐྱོར་གནང་ཡོད་པ་མ་ཟད། རྒྱལ་སྤྱིའི་མང་གཙོ་དང་འགྲོ་བ་མིའི་ཐོབ་ཐང་ཆེད་དུའང་རྒྱབ་སྐྱོར་ཤུགས་ཆེ་གནང་ཡོད།

ཨོསྟྲེ་ལི་ཡཱའི་གྲོས་ཚོགས་གོང་མའི་འཐུས་མི་ལྕམ་སྐུ་ཀིམ་བྷར་ལེ་ཀིཊ་ཆིན་མཆོག་གིས་དེ་སྔ་ཨ་རིའི་གྲོས་ཚོགས་ནས་གཏན་འབེབས་གནང་བའི་རྒྱལ་སྤྱིའི་མེག་ནི་སི་ཀི་ཁྲིམས། (Global Magnitsky Act) ལ་རྒྱབ་སྐྱོར་དང་། དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་དང་། མང་གཙོ། རང་དབང་བཅས་ལ་རྒྱབ་སྐྱོར་ཤུགས་ཆེ་གནང་ཡོད། དམ་པ་ཁོང་གིས་ང་ཚོར་རྒྱལ་སྤྱིའི་དབུ་ཁྲིད་ཚོས་འགན་འཁུར་སྟངས་སྐོར་མིག་དཔེ་བཟང་པོ་ཞིག་བསྟན་གནང་ཡོད། ང་ཚོའི་བློ་ཐུབ་ཀྱི་གྲོགས་པོ་ཞིག་སྐུ་ཚེའི་འཕེན་པ་རྫོགས་ཡོད་སྟབས། ང་ཚོས་དམ་པ་དེ་ཉིད་ཀྱི་ནང་མི་དང་། དགའ་ཉེ་བློ་དཀར་གྱི་གྲོགས་པོ་གྲོགས་མོ། ཨོསྟྲེ་ལི་ཡཱའི་མི་མང་བཅས་ལ་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་དང་། སླར་ཡང་ང་ཚོས་སྨོན་ལམ་དང་ཐུགས་གསོ་ཞུ་རྒྱུ་ཡིན། ཞེས་འཁོད་ཡོད་པ་བཅས།།