༄༅། །བོད་ཀྱི་གྲོགས་པོ་རྙིང་གྲས་དང་བོད་དོན་རྒྱབ་སྐྱོར་བ་སྐུ་ཞབས་རི་ཅར་ཌི་ཅར་ལི་སི་བྷི་ལུམ་(Richard Charles Blum) མཆོག་སྐུ་ཚེའི་འཕེན་པ་རྫོགས་པར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དམ་པ་དེ་ཉིད་ཀྱི་སྐུ་ཟླ་ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཌ་ཡེན་ཧྥ་ཡེན་སི་ཊེན་(Dianne Feinstein) མཆོག་ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན།

སྐུ་ཉིད་ཀྱི་བརྩེ་བའི་སྐུ་ཟླ་དང་བོད་ཀྱི་གྲོགས་པོ་རྙིང་གྲས་སྐུ་ཞབས་རི་ཅར་ཌི་བྷི་ལུམ་མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་ཤེས་རྟོགས་བྱུང་བས་ཕྲན་རང་ཉིད་ཧ་ཅང་བློ་ཕམ་བྱུང་། ངས་དུས་ཚོད་ཁག་པོའི་སྐབས་འདིར་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཀྱིས་གཙོས་ནང་མི་ཡོངས་ལ་ཐུགས་གསོ་ཞུ་རྒྱུ་ཡིན། བོད་མི་རྣམས་ཀྱིས་སྐུ་ཉིད་དང་ལྷན་གདུང་སེམས་མཉམ་སྐྱེ་དང་། དམ་པ་དེ་ཉིད་ཀྱིས་བློས་བཏང་གིས་མི་མང་ཉམ་ཐག་རྣམས་སྲུང་སྐྱོབ་ཆེད་དུ་ཕྱག་ལས་གནང་བར་རྗེ་སུ་ཡི་རང་ཞུ་ཡི་ཡོད།

སྐུ་ཞབས་རི་ཅར་ཌི་བྷི་ལུམ་མཆོག་གིས་ཧི་མཱ་ལ་ཡ་ཐེབས་རྩ་ཁང་གསར་འཛུགས་གནང་སྟེ་ཧི་མཱ་ལ་ཡ་རི་རྒྱུད་ཀྱི་མི་མང་གི་འཚོ་བ་དང་། སྤྱི་ཚོགས་ཡར་རྒྱས་གོང་འཕེལ་སླད་དུ་ཞབས་འདེགས་རླབས་ཆེན་བསྒྲུབས་གནང་ཡོད། སྐུ་ཉིད་དང་སྐུ་ཉིད་ཀྱི་སྐུ་ཟླ་མཆོག་ཟུང་འབྲེལ་གྱིས་ལོ་ངོ་བཅུ་ཕྲང་མང་པོའི་རིང་བོད་དོན་ཆེད་དུ་ཞབས་འདེགས་བསྒྲུབས་གནང་བར་ང་ཚོས་ཐུགས་རྗེ་ཆེ་ཞུ་རྒྱུ་ཡིན། སྐུ་ཉིད་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐོག་མར་མཇལ་ཁ་ཞུས་པ་དང་། དེ་ནས་སེན་ཧྥི་རན་སེ་སི་ཀོ་གྲོང་སྡེའི་སྤྱི་ཁྱབ་གནང་བ་ནས་བཟུང་ད་བར་སྐུ་ཉིད་དང་སྐུ་ཉིད་ཀྱི་སྐུ་ཟླ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཆེད་གྲོགས་སུ་བརྩིས་ཏེ་བོད་དོན་སླད་གཡོ་བ་མེད་པར་རྒྱབ་སྐྱོར་གནང་བ་དེས་བོད་མི་ཡོངས་ལ་སེམས་ཤུགས་སྐྱེད་དུ་བཅུག་ཡོད། དམ་པ་དེ་ཉིད་སྐུ་ཚེའི་འཕེན་པ་རྫོགས་པ་དེས་བོད་མི་རྣམས་ཀྱི་སེམས་ཁུངས་སུ་སྟོང་ཆ་ཞིག་ལྷག་ཏུ་བཅུག་ཡོད། དམ་པ་ཁོང་སྐུ་ཚེའི་འཕེན་པ་རྫོགས་པ་ནི་ང་ཚོ་མི་མང་ཉམ་ཐག་དགོས་ངེས་ཅན་རྣམས་ལ་མཚོན་ན་བརྩེ་བའི་བློ་ཐུབ་ཀྱི་གྲོགས་པོ་ཞིག་མེད་པ་ཆགས་ཡོད། སྨོན་ལམ་དང་ཐུགས་གསོ་ཞུ་རྒྱུ་ཡིན། ཞེས་འཁོད་ཡོད་པ་བཅས།།