༄༅། །བོད་རྒྱལ་ལོ་ ༢༡༤༩ རབ་གནས་ཆུ་སྟག་ལོའི་གནམ་ལོ་གསར་དུ་བཞེད་པའི་དགའ་སྟོན་གྱི་རྟེན་འབྲེལ་ལ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གཞིས་བྱེས་བོད་མི་ཡོངས་ལ་འཚམས་འདྲི་གནང་དོན། བོད་རྒྱལ་ལོ་ ༢༡༤༩ རབ་བྱུང་ ༡༧ པའི་ཆུ་སྟག་ལོའི་གནམ་ལོ་གསར་དུ་བཞེད་པའི་རྟེན་འབྱུང་དགའ་སྟོན་ལ་གཞིས་བྱེས་བོད་མི་ཡོངས་དང་། བོད་ཀྱི་གྲོགས་པོ་གྲོགས་མོ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
ལོ་གསར་པ་འདིའི་ནང་ཚང་མ་ནད་མེད་ཚེ་རིང་དང་བདེ་སྐྱིད་ཕུན་སུམ་ཚོགས་པ་ཡོང་བར་ཤོག་ཅེས་ཞུས་པ་དང་ཆབས་ཅིག་གནད་དོན་ཚིག་ཁ་ཤས་ཞུ་རྒྱུར། བོད་ཕྱི་ནང་གི་གནས་སྟངས་ཉག་ཕྲ་བའི་དུས་ཚོད་འདིར་ཚང་མས་རང་དོན་རང་གཅེས་ཀྱི་ཐོག་ནས་བོད་སྤྱི་པའི་བསོད་ནམས་གོང་མཐོར་གཏོང་ཐབས་དང་། ལྷག་པར་བོད་ཀྱི་ཆོས་དང་རིག་གཞུང་། སྐད་ཡིག གོམས་གཤིས་དེ་དག་མི་ཉམས་རྒྱུན་འཛིན་དང་། ཉམས་པ་སླར་གསོ་དང་མི་ཉམས་གོང་འཕེལ་གཏོང་བར་ཚང་མས་སྒོ་ཀུན་ནས་འབད་བརྩོན་གནང་རྒྱུ་གལ་ཆེན་པོ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གཞིར་བཟུང་བོད་ཀྱི་རྩ་དོན་འཐབ་རྩོད་སྤྱི་དང་། ལྷག་པར་བོད་མི་རྣམས་ནང་ཁུལ་རྡོག་རྩ་གཅིག་སྒྲིལ་གྱི་ཐོག་ནས་བོད་སྤྱི་པའི་ལས་དོན་ཐོག་ནུས་པ་མཉམ་སྤུངས་ཡོང་ཐུབ་ཆེད་ཚང་མས་སྒོ་ཀུན་ནས་འབད་བརྩོན་གནང་རོགས་གནང་ཞེས་ཞུ་རྒྱུ་ཡིན།
མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་རིས་སུ་མ་ཆད་པའི་བསྟན་འཛིན་གྱི་སྐྱེས་བུ་དམ་པ་རྣམས་༸སྐུ་ཚེ་ཞབས་པད་བསྐལ་བརྒྱར་བརྟན་པ་དང་ཐུགས་བཞེད་ལྷུན་གྱི་གྲུབ་པ། བོད་དོན་བདེན་མཐའ་མྱུར་དུ་གསལ་བའི་སྨོན་འདུན་ཞུ་རྒྱུ་ཡིན། བཀྲ་ཤིས་བདེ་ལེགས།།
