༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོ
དེ་ཡང་བགྲོ་གླེང་ཚོགས་འདུ་དེར་སློབ་གྲྭའི་ཕྱོགས་ནས་ཆེད་དུ་ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་གདན་འདྲེན་ཞུས་ཡོད་པ་དང་། ཞོན་ཙང་མཐོ་སློབ་ཀྱི་ཆོས་དང་རིག་གཞུང་སྡེ་ཚན་གྱི་འགན་འཛིན་ཆོས་དཔོན་ཆེ་མོ་ཧྲི་ཀྲའོ་ཧེ་ལགས་ཀྱི་ཚོགས་འདུ་གཙོ་སྐྱོང་གནང་ཡོད་ཅིང་། ཚོགས་འདུར་ཞོན་ཙང་མཐོ་སློབ་ཀྱི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཞོན་ལྕམ་ཁྲིན་མིང་རུབ་ལགས་དང་། ལག་བསྟར་འགན་འཛིན་སྐུ་ཞབས་ཁྲིན་ཐའེ་ཞོན་ལགས། སྐུ་ཚབ་དོན་གཅོད་ལས་ཁུངས་ཀྱི་ཆོས་དགེ་དགེ་བཤེས་འཇམ་དཔལ་ཆོས་འཛིན་ལགས། ཞོན་ཙང་མཐོ་སློབ་ཏུ་ཞིབ་འཇུག་སློབ་མར་སློབ་སྦྱོང་བྱེད་བཞིན་པ་དགེ་བཤེས་ཧ་ཤིང་རིན་པོ་ཆེ་དང་། དགེ་བཤེས་འཕྲིན་ལས་རྒྱ་མཚོ་ལགས། ཞོན་ཙང་མཐོ་སློབ་ཀྱི་སློབ་ཟུར་དགེ་བཤེས་དབང་ཕྱུག་ལགས། ཐའེ་ཀྲུང་སློབ་གསུམ་ཆོས་ཚོགས་ཀྱི་ཆོས་དགེ་དགེ་བཤེས་དར་རྒྱས་ལགས་དང་། ཚོགས་གཙོ་ལི་ཡན་སྦྲུང་ལགས། གངས་ལྗོངས་དཔེ་སྐྲུན་ཁང་གི་འགན་འཛིན་ལྕམ་ལའེ་ཡུན་ནིང་ལགས། དོན་གཅོད་ལས་ཁུངས་ཀྱི་རྒྱ་ཡིག་དྲུང་ཡིག་ལི་པི་ཀྲའོ་ལགས་བཅས་མཉམ་ཞུགས་ཞུས་ཡོད།
བགྲོ་གླེང་ཚོགས་འདུར་སློབ་གྲྭའི་ཕྱོགས་ཀྱི་འཆར་གཞི་ཡོད་པ་ལྟར་མ་འོངས་ཞིབ་འཇུག་སློབ་མའི་སློབ་ཚན་དུ་བོད་ཡིག་རྨང་གཞི་དང་། བོད་བརྒྱུད་ནང་བསྟན་གྱི་དཔེ་ཆ་ངོ་སྤྲོད། བོད་བརྒྱུད་ནང་བསྟན་དང་འབྲེལ་བའི་ཆེད་ཚན་བགློ་གླེང་ (དཔེར་ན་ཚད་མ་རིག་པ།) བཅས་སློབ་ཚན་གསུམ་འཇོག་ཐབས་དང་། དེའང་ཞིབ་འཇུག་སློབ་མ་དང་། ཟུར་སྦྱོང་ཞིབ་འཇུག་སློབ་མར་དུས་གཅིག་ཏུ་སློབ་ཚན་འཁྲིད་རྒྱུ་གནང་། གཞན་ཡང་བོད་ཀྱི་རིག་གཞུང་སློབ་ཚན་དང་བོད་བརྒྱུད་ནང་བསྟན་སློབ་ཚན་གཉིས་ཆེད་དུ་བོད་ཀྱི་དགེ་བཤེས་གདན་འདྲེན་ཞུ་སྟེ་སློབ་ཚན་འཁྲིད་རྒྱུའི་འཆར་གཞི་སྒྲིག་པ་ལྟར། ཐའེ་ཝན་ཤེས་རིག་ལས་ཁུངས་ཀྱི་དགེ་རྒན་དང་དམིགས་བསལ་གདན་འདྲེན་དགེ་རྒན་གྱི་ཆ་རྐྱེན་དུ་ངེས་པར་དུ་རྩོམ་དེབ་དགོས་སྟབས། ད་ལྟའི་ཆར་དོན་གཅོད་ལས་ཁུངས་ཀྱི་ཆོས་དགེ་དགེ་བཤེས་འཇམ་དཔལ་ཆོས་འཛིན་ལགས་ལ་རྒྱ་ཡིག་རྩོམ་དེབ་མང་པོ་ཡོད་པར་བརྟེན་ལས་རོགས་སློབ་དཔོན་ཆེ་མོའི་འོས་མིར་མིང་གཞུང་ཕུལ་པ་དང་། མ་འོངས་པར་ཆ་རྐྱེན་ཚང་རིམ་བཞིན་དགེ་བཤེས་གཞན་རྣམས་ཀྱང་ངོས་སྦྱོར་བྱ་རྒྱུའི་མོས་ཐག་གཅོད།
སྤྱིར་ཐའེ་ཝན་མཐོ་སློབ་ཀྱི་འགྲོ་སྟངས་ལྟར། དགེ་བཤེས་ཀྱི་སློབ་ཚན་འཁྲིད་རྒྱུར་གཟའ་འཁོར་གཅིག་ལ་ཐེངས་བཞི་འཁྲིད་དགོས་པ་དང་། གཏན་འབེབས་བྱུང་བའི་དགེ་རྒན་དུས་ཁོམ་མ་བྱུང་ནའང་ཁོང་གི་ཚབ་ཏུ་དགེ་བཤེས་གཞན་ནམ་ཡང་ན་བོད་ཀྱི་ཆོས་དང་རིག་གཞུང་ལ་བྱང་ཆ་ཡོད་པ་སུ་ཡོད་གཏོང་ན་འཐུས་པ་ནང་མོལ་ལྷུག་པོ་བྱུང་བ་མ་ཟད། མ་འོངས་པར་གོང་གསལ་སློབ་ཚན་ཐོག་འབུམ་རམས་པའི་འཛིན་གྲྭ་འཛུགས་རྒྱུའི་འཆར་གཞིའང་བཏིང་ཡོད་པ་རེད།
ཐའེ་ཝན་ཞོན་ཙང་མཐོ་སློབ་ཏུ་ད་ལྟའི་ཆར་བོད་བརྒྱུད་ནང་བསྟན་གྱི་བསླབ་པ་སློབ་གཉེར་ལ་ངོས་ལེན་གནང་སྟེ་དགེ་འདུན་པ་གང་འཚམས་སློབ་གྲྭ་དེར་ཞིབ་འཇུག་སློབ་མའི་ལག་འཁྱེར་ཐོབ་བཞིན་པ་དང་། སློབ་གྲྭ་དེ་ནས་ཐོན་རྗེས་ཐའེ་ཝན་གྲགས་ཅན་མཐོ་སློབ་སློབ་ཏུ་འབུམ་རམས་པའི་ཡིག་རྒྱུགས་འཕྲོད་མཁན་ཡང་བྱུང་ཡོད་སྟབས། སློབ་གྲྭའི་ཁོར་ར་ཁོར་ཡུག་ཀུན་ཏུ་བོད་པའི་དགེ་འདུན་པ་ཚོར་མཐོང་སྣང་ཤིན་ཏུ་ལེགས་པོ་ཡོད། ད་ལྟའི་ཆར་སློབ་གྲྭར་འཛུལ་ཞུགས་ཐོ་འགོད་གནང་མཁན་ཇེ་མང་དང་སློབ་གྲྭའི་ཕྱོགས་ནས་ཀྱང་དགེ་འདུན་པའི་ལག་འཁྱེར་དང་འབྲེལ་གང་ཅིའི་ཐད་དབྱེ་འབྱེད་དཀའ་བ་ཆགས་ཀྱི་ཡོད་སྟབས། མ་འོངས་སློབ་གྲྭ་དེར་འཛུལ་ཞུགས་སློབ་མའི་ཆ་རྐྱེན་ཚང་མིན་དོན་གཅོད་ལས་ཁུངས་ནས་དཔྱད་བཤེར་བྱ་རྒྱུའི་ཐག་གཅོད་ཀྱང་གནང་ཡོད་པ་རེད།
དེ་རྗེས་ཚོགས་ཞུགས་པ་ཚང་མ་སློབ་སྤྱིའི་ཡིག་ཚང་དུ་བཅར་ཏེ་གོང་གསལ་གནས་ཚུལ་ཁག་སྙན་སྒྲོན་ཞུས་པ་དང་། སློབ་སྤྱི་མཆོག་གིས་ཀྱང་ཐུགས་དགྱེས་ཚོར་ཆེན་པོས་རྒྱབ་སྐྱོར་མཐའ་གཅིག་ཏུ་ཞུ་རྒྱུ་དང་། དེ་ནི་ཐའེ་ཝན་གྱི་མཐོ་སློབ་ཁག་ཏུ་ཐེངས་དང་པོ་ཆགས་ཀྱི་ཡོད་ཅེས་གསུངས།
དེ་རྗེས་ཚོགས་ཞུགས་པ་རྣམས་ཞོན་ཙང་མཐོ་སློབ་ཐོག་མ་བཙུགས་མཁན་དགེ་སློང་ཧྲང་ལེའོ་ཞྭ་ཀྲུང་གི་མྱ་ངན་འདུ་ཁང་དུ་མྱ་ངན་ཞུས་པར་བཅར་བ་དང་། དགེ་སློང་ཁོང་ནི་འཛམ་གླིང་དགེ་འདུན་པའི་ཚོགས་པའི་ཚོགས་གཙོ་དང་། ཐའེ་ཝན་ཧྲང་ཏའོ་དགོན་པའི་མཁན་པོའང་ཡིན་པ་རེད། ཁོང་ཕྱི་ཟླ་ ༣ ཚེས་ ༩ ཉིན་དགོངས་པ་རྫོགས་པའི་གནས་ཚུལ་དོན་གཅོད་ལས་ཁུངས་ནས་དཔལ་ལྡན་དགའ་ལྡན་ཕོ་བྲང་ཡིག་ཚང་ལ་ཞུས་པ་མ་ཟད་དོན་གཅོད་ཀྱི་མིང་ཐོག་ནས་མྱང་ངན་སྨོན་ཡིག་ཀྱང་ཕུལ་ཡོད་པ་བཅས། །
