༄༅། །ཉི་ཧོང་ཁུལ་གྱི་བོད་མི་རྣམས་ཀྱིས་ཕྱི་ལོ་ ༢༠༢༢ ཟླ་ ༠༣ ཚེས་ ༡༢ ཉིན་བོད་མིའི་རང་དབང་སྒེར་ལངས་ཐེངས་ ༦༣ སྲུང་བརྩི་ཞུས་འདུག

དེ་ཡང་ཉེ་ཧོང་ཁུལ་གྱི་བོད་མི་རྣམས་དང་བོད་རང་བཙན་སློབ་ཕྲུག་ཚོགས་པས་གོ་སྒྲིག་ཞུས་པའི་སྐད་འབོད་སྐབས་ངོ་རྒོལ་བ་རྣམས་རྒྱ་ནག་གཞུང་ཚབ་ཁང་གི་མདུན་དུ་འཛོམས་ཏེ་བོད་ལ་རང་དབང་དགོས་པ་དང་། རྒྱ་གཞུང་གིས་བོད་མི་རྣམས་ལ་སྡུག་སྦྱོང་མནར་གཅོད་གཏོང་མཚམས་འཇོག་དགོས་པའི་འབོད་སྒྲ་བསྒྲགས་པ་མ་ཟད། རྒྱ་ནག་གཞུང་ཚབ་ཁང་ལ་སྙན་ཞུ་ཡང་ཕུལ་ཡོད་འདུག ཉིན་རྒྱབ་ཏུ་བོད་མི་མཉམ་དུ་ཡུ་གུར་བ་དང་། ལྷོ་སོག་པོ། ཉི་ཧོང་བ་བཅས་ལྷན་ཞུགས་གནང་སྟེ་ཏའི་ཏོ་ཀུའི་ (Taitoku) ས་གནས་ཧ་ན་ཀ་བ་དོ་ཀོན་ (Hanakawado Koen) དུ་མཛད་སྒོ་ཚོགས་ཤིང་། དེ་ནས་ཞི་བའི་ཁྲོམ་སྐོར་དབུ་འཛུགས་གནང་། སྐབས་དེར་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བཀའ་ཤག་གི་གསུང་འཕྲིན་སྒྲོགས་སྦྱང་གནང་བ་དང་ལྷན། ད་བར་བོད་དོན་ཆེད་རྒྱབ་སྐྱོར་བསྟུད་མར་གནང་མཁན་ཡོངས་ལ་བཀའ་དྲིན་རྗེས་དྲན་ཞུས་ཡོད། 

སྐབས་དེར་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཟུར་པ་སྐུ་ཞབས་ན་ག་ཨོ་ཏ་ཀ་ཤི་ (Nagao Takashi) ལགས་ཀྱིས་གསུང་བཤད་གནང་ཞིང་། ཁོང་གིས་བོད་ཀྱི་དྲན་བདེན་གྱི་གནད་དོན་ལ་རྒྱབ་སྐྱོར་གནང་རྒྱུ་ནན་བརྗོད་གནང་བ་དང་། ཉེ་ལམ་བོད་ཀྱི་གཞས་པ་ཚེ་དབང་ནོར་བུ་ལགས་ཀྱིས་བོད་དོན་ཆེད་རང་ལུས་མེར་བསྲེགས་ཀྱིས་རྐྱེན་ལམ་དུ་ཕྱིན་པར་ཐུགས་ཕམ་གནང་བ་དང་འབྲེལ་རྒྱ་ནག་གི་འགོ་ཁྲིད་རྣམས་ཀྱིས་བོད་མིའི་དཀའ་སྡུག་ལ་ཉན་འཇོག་དགོས་པའི་རེ་འདུན་བཏོན་གནང་ཡོད། གྲོས་ཚོགས་འཐུས་མི་ཟུར་པ་དང་ཉི་ཧོང་བོད་སྐྱོབ་ཚོགས་པའི་ཚོགས་གཙོ་སྐུ་ཞབས་མ་ཀི་ནོ་སི་ཤུ་ (Makino Seishu) ལགས་ཀྱིས་གསུང་འཕྲིན་གནང་བ་དེ་བོད་རང་བཙན་སློབ་ཕྲུག་ཚོགས་པའི་སྐུ་ཞབས་ཀ་མི་ད་ (Kameda) ལགས་ཀྱིས་ལྗགས་ཀློག་གནང་ཞིང་། གསུང་འཕྲིན་ནང་དུ་སྐུ་ཞབས་མ་ཀི་ནོ་ལགས་ཀྱིས་བོད་མི་རྣམས་ཀྱི་ལྡོག་ཏུ་མེད་པའི་སྙིང་སྟོབས་ལ་མངགས་བརྗོད་གནང་བ་དང་འབྲེལ་བོད་རྒྱའི་དཀའ་རྙོག་སེལ་ཐབས་སུ་རྒྱ་ནག་གཞུང་ནས་བོད་མིའི་སྐུ་ཚབ་དང་ལྷན་དུ་གྲོས་མོལ་བསྐྱར་གསོ་གནང་དགོས་པའི་འབོད་སྐུལ་ཡང་ཞུས་ཡོད། 

མཐར་ཉི་ཧོང་ནང་གི་བོད་རིགས་ཚོགས་པའི་ཚོགས་གཙོ་སྐལ་ལྡན་ལགས་དང་། བོད་རང་བཙན་སློབ་ཕྲུག་ཚོགས་པའི་འཐུས་མི་ཚེ་རིང་རྡོ་རྗེ་ལགས་གཉིས་ནས་དུས་དྲན་གྱི་གལ་གནད་དང་བོད་མི་རྣམས་ལྡོག་ཏུ་མེད་པའི་རང་དབང་གི་མངོན་འདོད་སྐོར་ངོ་སྤྲོད་གནང་བ་མ་ཟད། ཁོང་རྣམ་གཉིས་ནས་ཉི་ཧོང་བ་དང་། ཡུ་གུར་བ། ལྷོ་སོག་པོ་སོགས་ཞི་བའི་ཁྲོམ་སྐོར་ལ་མཉམ་ཞུགས་གནང་མཁན་ཡོངས་ལ་ཐུགས་རྗེ་ཆེ་ཞུས་ཡོད། 

བོད་མི་རྣམས་ནས་བོད་རྒྱལ་ཁབ་ཆེན་པོའི་རྒྱལ་གླུ་དང་། མི་མང་ལང་གླུ། གསུམ་བཅུ་དྲན་གླུ་བཅས་བླངས་ཟིན་རྗེས་ཧ་ན་ཀ་བ་དོ་སྐྱེད་ཚལ་ནས་རྔམ་སྟོན་ཁྲོམ་སྐོར་དབུ་འཛུགས་ཀྱིས་ཨ་ས་ཀ་ས་ལམ་བརྒྱུད་ཕེབས། ལམ་བར་དུ་ངོ་རྒོལ་བ་རྣམས་ཀྱིས་བོད་ལ་རང་དབང་དགོས་པ་དང་། བོད་ནང་མི་གསོད་མཚམས་འཇོག་དགོས་པ་སོགས་ཀྱི་འབོད་སྒྲ་སྒྲོག་བཞིན་ཁྲོམ་སྐོར་གནང་ཡོད་པ་བཅས།།