༄༅། །ཕྱི་ལོ་ ༢༠༢༢ ཟླ་ ༣ ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་བོན་གཞིས་ཌོ་ལན་ཇིར་རྟེན་གཞི་བྱས་པའི་གདན་ས་ཆེན་པོ་དཔལ་གཤེན་བསྟན་སྨན་རིའི་གླིང་གི་ཁོངས་གཏོགས་བཙུན་དགོན་རཏྣ་སྨན་གླིང་དུ་སྐབས་དང་པོ་དགེ་བཤེས་མའི་བཀྲ་ཤིས་ཁྲི་བཞེངས་ཀྱི་མཛད་སྒོའི་སྐུ་མགྲོན་གཙོ་བོར་ངོ་ཕེ
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ སྟེང་སྐབས་དང་པོའི་བཀའ་རམས་པ་རྣམས་བཀྲ་ཤིས་དམ་བཅར་བཞུགས་པ་དང་། འདུས་མང་བླ་གྲྭ་བསླབ་པ་རྒན་རིམ་ལྟར་བཀྲ་ཤིས་རྟགས་གསལ་གྱི་མཆོད་ཚིག་ཕུལ་རྗེས་འདུས་མང་ནས་བར་ཆད་ལམ་སེལ་གསུངས་ཏེ་ཚོགས་གྲོལ།
ཉིན་རྒྱབ་ཆུ་ཚོད་ ༡།༣༠ སྟེང་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་གིས་བཀའ་རམས་པ་རྣམས་ལ་དགེ་བའི་བཤེས་གཉེན་གྱི་མཚན་གསོལ་བ་དང་། ༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རི་བ་མཆོག་གིས་བསྔོ་བ་བདེ་ལེགས་མ་གསུངས་གྲུབ་རྗེས་བཀའ་རམས་པ་རྣམས་ལ་དགེ་བའི་བཤེས་གཉེན་གྱི་ཕྱག་འཁྱེར་དང་བྱིན་ཅན་སྲུང་མདུད་དྲི་མེད་ལྷ་དར་བཅས་གསོལ་སྩལ་དང་། ༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་དང་སྨན་རིའི་བཤད་སྒྲུབ་མཁན་སློབ་རྣམ་གཉིས་ནས་མགུལ་དར་གནང་།
སྐབས་དེར་སྐུ་མགྲོན་གཙོ་བོ་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་ཀྱིས་འཚམས་འདྲི་དང་འབྲེལ་གསུང་བཤད་གནང་དོན། གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་ནས་དུས་བསྟུན་རླབས་ཆེའི་མཛད་བཟང་གང་མང་བསྐྱངས་དང་སྐྱོང་བཞིན་ཡོད་པའི་ཁྲོད་ནས་དེ་རིང་འདིར་བཙུན་མའི་དགེ་བཤེས་ཀྱི་མཚན་རྟགས་སྩལ་རྒྱུའི་མཛད་སྟོན་གནང་བཞིན་ཡོད་པར་སོང་། ངས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ཚབ་ཞུས་ཏེ། གདན་ས་ཆེན་པོ་དཔལ་གཤེན་བསྟན་སྨན་རིའི་གླིང་དང་བཙུན་དགོན་རཏྣ་སྨན་གླིང་གཉིས་ཀྱི་མཁན་སློབ་ལས་སྣེ་རྣམ་པ་དང་། ད་རེས་བསླབ་པ་མཐར་སོན་གྱི་མཚན་རྟགས་བཞེས་མཁན་བཙུན་མ་རྣམ་པར་ལེགས་གསོལ་བསྔགས་བརྗོད་དང་དམིགས་བསལ་འཚམས་འདྲི་ཞུ་རྒྱུ་ཡིན།
རང་ཅག་བཙན་བྱོལ་དུ་འབྱོར་འཕྲལ་བསྟན་པ་སྤྱི་དང་བྱེ་བྲག་སླར་གསོའི་ལས་དོན་ལ་འབད་འབུངས་བྱས་སྐབས། བོད་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་སྐབས་དང་མཐུན་པའི་ལམ་སྟོན་བཀའ་སློབ་སྣ་མང་བསྩལ་ཡོད་པའི་ཁོངས་སུ། བཙུན་མ་དང་བཙུན་དགོན་རྣམས་སྔ་མོའི་ལམ་ལུགས་ལྟར་ཆོ་ག་ཕྱག་ལེན་ཙམ་བྱེད་པ་མ་ཡིན་པར་བཙུན་པའི་གདན་ས་ཆེ་ཁག་ལྟར་ནང་དོན་རིག་པའི་གཞུང་ཆེན་ཁག་ལ་སློབ་གཉེར་ངེས་པར་བྱེད་དགོས་པའི་བཀའ་སློབ་ལན་མང་དང་ནན་ཆེར་ཕེབས་ཡོད་པ་དང་། དེ་རྗེས་བཙུན་དགོན་མང་པོར་མཚན་ཉིད་དང་གཞུང་ཆེན་སློབ་གཉེར་རྐང་ཚུགས་གང་ལེགས་གྱུར་པའི་གནས་སྐབས་སུ་གཞུང་ཆེན་སློབ་གཉེར་འགྲིམ་བཞིན་པའི་བཙུན་མ་དེ་དག་ལ་དགེ་བཤེས་མ་ལྟ་བུའི་མིང་རྟགས་ལག་འཁྱེར་སྤྲོད་སྲོལ་གཏོད་དགོས་པའི་བཀའ་སློབ་གསལ་ཕེབས་བྱུང་ཡོད་པ་སོགས་ལོ་རྒྱུས་དེབ་ཐེར་དུ་འཁོད་ཟིན་པ་ལྟར་རེད།
གོང་དུ་ཞུས་པའི་༸རྒྱལ་བའི་བཀའ་དགོངས་ཟབ་མོ་དེ་ལ་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན། ཇོ་ནང་བཅས་ཀྱི་བསྟན་བདག་བླ་ཆེན་རྣམས་ནས་ཐུགས་ཁུར་དང་གཞོགས་འདེགས་བླ་ན་མེད་པ་མཛད་པའི་སྒོ་ནས་སོ་སོའི་ཕྱག་སྲོལ་དང་མཐུན་པར་དགེ་བཤེས་མ་དང་། མཁན་མོ། བཀའ་བཅུ་མ་སོགས་ཀྱི་མིང་རྟགས་ཕྱག་འཁྱེར་ཁག་གཅིག་གནང་དང་གནང་བཞིན་ཡོད།
ད་རེས་གོ་སྐབས་འདི་བརྒྱུད་ནས་བོད་ཀྱི་ཆོས་བརྒྱུད་ཁག་དང་གཡུང་དྲུང་བོན་བཅས་ཀྱི་བསྟན་བདག་བླ་ཆེན་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གང་ཅིར་གཞོགས་འདེགས་དང་ཐུགས་ཁུར་མཉམ་བཞེས་ཧ་ཅང་བཟང་པོ་གནང་དང་གནང་བཞིན་ཡོད་པར་སྙིང་ནས་བཀའ་དྲིན་རྗེས་དྲན་དང་སྦྲགས་ཐུགས་རྗེ་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་ཡིན།
དེ་བཞིན་ད་རེས་སྐབས་སུ་བབས་པ་གཡུང་དྲུང་བོན་གྱི་བསྟན་བདག་ཁྲི་འཛིན་དང་དཔོན་སློབ་རིམ་པ། གདན་ས་ཆེན་པོ་སྨན་རིའི་གླིང་དང་ཁྲི་བརྟན་ནོར་བུ་རྩེ་བཅས་ཀྱི་ངོས་ནས་ཐོག་མཐའ་བར་གསུམ་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གང་ཅི་དང་། བོད་མིའི་སྒྲིག་འཛུགས་ཀྱི་མཛད་ཕྱོགས་ཁག་ལ་རྒྱབ་གཉེར་ཧ་ཅང་བརྟན་པོ་མཛད་ཡོད་པ་ལའང་ད་ལམ་གོ་སྐབས་འདི་བརྒྱུད་རྗེས་སུ་ཡི་རང་དང་སྦྲགས་བཀའ་དྲིན་བླ་མེད་དུ་ཆེ་ཆེ་ཞེས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་།
སྤྱིར་བོན་གཞིས་ཌོ་ལན་ཇིར་རྟེན་གཞི་བྱས་པའི་བཙུན་དགོན་རཏྣ་སྨན་གླིང་ནི་ཕྱི་ལོ་ ༢༠༠༡ ཕྱི་ཟླ་ ༤ ཚེས་ ༡༡ ཉིན་༧སྐྱབས་རྗེ་༧སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་དཔལ་བཟང་པོ་མཆོག་གིས་ཕྱག་བཏབས་གནང་ཡོད་པ་དང་བཙུན་དགོན་རཏྣ་སྨན་གླིང་གི་སྐབས་དང་པོ་དགེ་བཤེས་མའི་མཚན་རྟགས་བཞེས་མཁན་ཁོངས་བཙུན་མ་གྲངས་ལྔ་ཡོད་པ་བཅས། །
