༄༅། །ཀུམ་རའོ་སྒ་པ་བོད་མིའི་ས་གནས་འགོ་འཛིན་འགོ་འཛིན་རབ་བརྟན་ཚེ་རིང་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་ངག་དབང་བློ་གྲོས་ལགས། སྒ་པ་བོད་མི་བདེ་དོན་ཚོགས་པའི་ཚོགས་གཙོ་གྲའུ་ཚེ་བརྟན་བུ་ཁྲིད་ལགས་ཀྱིས་གཙོས་ཀུམ་རའོ་སྒ་པ་བོད་མི་རྣམས་ཀྱིས་ཧི་མ་ཅཱལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཇེ་རཱམ་ཋ་ཀུར་མཆོག་ལ་སིར་མོར་རྫོང་གི་ཀ་ཕོ་ཏ་ས་གནས་སུ་ཕེབས་བསུ་ཞུས་ཡོད།

སྐབས་དེར་ས་གནས་འགོ་འཛིན་རབ་བརྟན་ཚེ་རིང་ལགས་ཀྱིས་སྤྱི་ཁྱབ་བློན་ཆེན་མཆོག་ལ་དཀར་གཙང་མཇལ་དར་དང་བཅས་ཧི་མ་ཅཱལ་གཞུང་ངོས་ནས་བོད་མིར་མཐུན་འགྱུར་རོགས་ཕན་གནང་བར་ཐུགས་རྗེ་ལེགས་འབུལ་ཞུས་ཡོད་པ་མ་ཟད། སྤྱི་ཁྱབ་བློན་ཆེན་མཆོག་ལ་ཀུམ་རའོ་བོད་མིའི་གཞིས་ཆགས་སྐོར་ཡང་ངོ་སྤྲོད་གནང་ཡོད་པ་རེད། 

ཕྱོགས་མཚུངས་འབྲེལ་ཡོད་ས་གནས་འགོ་འཛིན་གྱིས་རྒྱ་གར་དབུས་ས་གཞུང་དམངས་གཉིས་ནས་བོད་མིར་ལོ་ངོ་དྲུག་ཅུ་ལྷག་རིང་རྒྱབ་སྐྱོར་རོགས་རམ་གནང་བར་བཀའ་དྲིན་ཆེ་ཞུས་པའི་ཁར་སླད་མར་མུ་མཐུད་དེ་ལྟར་རོགས་ཕན་ཡོང་བའི་འབོད་སྐུལ་ཞུས་ཡོད་པ་བཅས།།