༄༅། །འདི་གར་ཀུ་ལླུ་མ་ནཱ་ལི་བོད་མིའི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༣ ཚེས་ ༡༦ ཉིན་ཀུ་ལླུ་མ་ནཱ་ལི་ས་གནས་དབུ་མའི་ལམ་གྱི་མི་མང་ལས་འགུལ་ཁང་གི་གོ་སྒྲིག་འོག་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་གཙོ་དགེ་བཤེས་བློ་བཟང་ཆོས་འཕེལ་ལགས་ཀྱིས་ཀུ་ལླུ་རྫོང་ཁོངས་བོད་མི་རྣམས་ལ་དབུ་མའི་ལམ་གྱི་རྒྱབ་ལྗོངས་དང་ད་ལྟའི་གནས་བབ། བྱུང་རིམ་གལ་གནད་དང་འབྲེལ་གོ་རྟོགས་སྤེལ་ཐུབ་པ་བྱུང་ཡོད།དེ་ཉིན་ས་གནས་འཐུས་ཚོགས་ཀྱི་ཚོགས་མི་དང་། གཞུང་དང་གཞུང་ཁོངས་མིན་པའི་ཚོགས་པ། དེ་བཞིན་ས་གནས་བོད་མི་བཅས་ཁྱོན་མི་གྲངས་ ༡༠༠ ཙམ་མཉམ་ཞུགས་གནང་ཡོད། དགེ་བཤེས་བློ་བཟང་ཆོས་འཕེལ་ལགས་ཀྱིས་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་བྱུང་རིམ། གྲུབ་འབྲས་བཅས་ཀྱི་སྐོར་དང་། བོད་རྒྱ་འབྲེལ་མོལ་གྱི་གནས་སྟངས་སྐོར་ངོ་སྤྲོད་དང་། དེ་བཞིན་བོད་མིའི་སྒྲིག་འཛུགས་ཀྱི་ལངས་ཕྱོགས་གཉིས་སྨན་དབུ་མའི་ལམ་གྱི་སྐོར་བགྲོ་གླེང་དང་། དོགས་འདྲི་ཁག་ལ་ལན་འདེབས་ཞིབ་ཕྲ་གནང་ཡོད། །