༄༅། །འདི་གར་ཧོན་སུར་རབ་རྒྱས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་ལམ་སྟོན་ཕེབས་དོན་བཞིན། བོད་མིའི་གཞིས་ཆགས་ཁག་ཏུ་ས་གནས་འགོ་འཛིན་ལས་ཁུངས་སམ་ནང་ཆོས་ངོ་སྤྲོད་ཚོགས་ཆུང་ནས་གཙོ་འགན་བཞེས་ཏེ་གཞིས་མི་མང་ཚོགས་ལ་ནང་ཆོས་ངོ་སྤྲོད་ཡང་ཡང་གོ་སྒྲིག་ཞུ་དགོས་ཀྱང་ཕྱི་ལོ་ ༢༠༢༠ ནས་ཏོག་དབྱིབས་ནད་ཡམས་ཀྱི་རྐྱེན་པས་གོ་སྒྲིག་ཞུ་ཐུབ་མེད་པ་དང་། ད་ཆ་ཏོག་དབྱིབས་ནད་ཡམས་ཅུང་དྲག་ཏུ་འགྲོ་བཞིན་ཡོད་སྟབས། ཕྱི་ལོ་ ༢༠༢༢ ཟླ་ ༣ ཚེས་ ༡༨ ཆོ་འཕྲུལ་ཟླ་བའི་ཚེས་ ༡༥ ཉིན་༸སྐྱབས་རྗེ་ཀུན་བདེ་གླིང་ཚག་སྐུ་ཕྲེང་བཅུ་གསུམ་པ་རྗེ་བཙུན་བསྟན་འཛིན་ཆོས་ཀྱི་རྒྱལ་མཚན་དཔལ་བཟང་པོ་མཆོག་དཔལ་ལྡན་སྨད་རྒྱུད་གྲྭ་ཚང་དུ་བཞུགས་ཡོད་པས་ས་གནས་འགོ་འཛིན་ལས་ཁུངས་ནས་རིན་པོ་ཆེ་མཆོག་ལ་ཡིག་ངག་གཉིས་ཐོག་ནས་གཞིས་མི་མང་ཚོགས་ལ་ནང་ཆོས་ངོ་སྤྲོད་གནང་སྐྱོང་ཡོང་བའི་སྐྱབས་འཇུག་ཞུ་དོན་བཞིན་ཞལ་བཞེས་གནང་སྟེ་གོང་ཚེས་ཉིན་དཔལ་ལྡན་སྨད་རྒྱུད་གྲྭ་ཚང་གི་ཆོས་རར་གོ་སྒྲིག་གིས་ཧོན་སུར་རབ་རྒྱས་གླིང་གི་གཞིས་མི་དང་། ཉེ་འགྲམ་བོད་མིའི་གཞིས་ཆགས་སྦེལ་ཀོབ། ཀོ་ལེ་གྷལ་སོགས་ནས་ཆེད་ཕེབས་བོད་མི་གྲངས་ ༡༥༠༠ ཙམ་ལ་ཆུ་ཚོད་ ༡༠ ནས་ ༡༢།༣༠ བར་ནང་ཆོས་ངོ་སྤྲོད་དང་སྒྲོལ་དཀར་གྱི་ཚེ་དབང་སོགས་ཞུ་རྒྱུའི་སྐལ་བཟང་གོ་སྐབས་བྱུང་ཡོད་པ་བཅས། །
