༄༅། །ཕྱི་ལོ་ ༢༠༢༢ ཟླ་ ༣ ཚེས་ ༡༠ ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་ ༦༣ པའི་གཞུང་འབྲེལ་མཛད་སྒོར་སྐུ་མགྲོན་གཙོ་བོར་ཕེབས་པའི་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ཇི་རི་ཨོ་བྷར་ཧྥལ་ཛེར་ (Jiri Oberfalzer) མཆོག་གིས་གསར་འགོད་གསལ་བསྒྲགས་ཤིག་སྤེལ་བའི་སྐབས་གསུང་དོན། ང་ཚོའི་བརྡ་ལན་ནི་སྟབས་བདེ་པོ་ཡིན། བོད་མིའི་རང་དབང་ལ་རྒྱབ་སྐྱོར་མཚོན་ཆེད་དུ་ང་ཚོ་ཅེག་སྤྱི་མཐུན་རྒྱལ་ཁབ་ནས་འདིར་ཡོང་པ་ཡིན་ལ། ཅེག་སྤྱི་མཐུན་རྒྱལ་ཁབ་ཀྱི་གཞུང་མང་གཉིས་ནས་མུ་མཐུད་བོད་མིར་མཛའ་གྲོགས་ཀྱི་འདུ་ཤེས་འཛིན་རྒྱུ་ཡིན་པ་མ་ཟད། བོད་མིའི་རང་དབང་འཐབ་རྩོད་ལའང་མུ་མཐུད་རྒྱབ་སྐྱོར་བྱེད་རྒྱུའི་ཆོད་སེམས་བརྟན་པོ་ཡོད། ཅེས་དང་།
བོད་དང་ཅེག་སྤྱི་མཐུན་རྒྱལ་ཁབ་གཉིས་ལ་ལོ་རྒྱུས་ཀྱི་བྱུང་བ་གཅིག་མཚུངས་བྱུང་ཡོད་སྟབས། བོད་མི་རྣམས་ཀྱིས་དྲག་གནོན་འོག་དཀའ་སྡུག་མྱོང་བཞིན་པ་དེ་ང་ཚོས་རྟོགས་ཐུབ་ཀྱི་ཡོད། རྒྱ་ནག་གཞུང་གིས་བོད་ནང་དྲག་གནོན་བྱེད་བཞིན་ཡོད་པར་བརྟེན་བོད་མི་ཚོར་སྨྲ་བརྗོད་རང་དབང་མེད་ལ། སོ་སོའི་ལུང་པ་འཛིན་སྐྱོང་བྱེད་རྒྱུའི་རང་དབང་ཡང་མེད་པར་བརྟེན་ང་ཚོས་ཡོངས་གྲགས་སུ་བོད་དོན་ལ་རྒྱབ་སྐྱོར་བྱེད་རྒྱུའི་སྤོབས་པ་ཆེར་བསྐྱེད་བྱུང་། ཞེས་གསུངས།
གཞན་ཡང་ཁོང་གིས་གཞིས་བཞུགས་བོད་མི་ཚོས་ཀྱང་རེ་བ་མ་བརླག་པར་བྱེད་དགོས་པ་དང་། རྒྱ་ནག་གིས་ང་ཚོར་ཆབ་སྲིད་ཀྱིས་དབང་བསྒྱུར་བྱེད་སྲིད་ཀྱང་། ང་ཚོས་ཕར་རྒྱ་ནག་ལ་བོད་བརྒྱུད་ནང་བསྟན་སློབ་ཁྲིད་བྱས་ཏེ་དབང་བསྒྱུར་བྱེད་ཐུབ། ཅེས་གསུངས། ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་དང་པོ་སྐུ་ཞབས་ཝ་སི་ལབ་ཧ་ཝེལ་ (Vaclav Havel) མཆོག་གིས་ཕྱི་ལོ་ ༡༩༩༠ ལོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཅེག་གི་རྒྱལ་ས་པི་རག་ལ་གདན་ཞུས་པ་ནས་བཟུང་བོད་མིའི་སྒྲིག་འཛུགས་དང་། ཅེག་སྤྱི་མཐུན་རྒྱལ་ཁབ་དབར་འབྲེལ་བ་གཏིང་ཟབ་བྱུང་ཡོད། 
ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ཇི་རི་ཨོ་བྷར་ཧྥལ་ཛེར་མཆོག་གིས་དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་ཡོད་པ་དང་། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ཇི་རི་ཨོ་བྷར་ཧྥལ་ཛེར་མཆོག་ལ་གསུམ་བཅུའི་དུས་དྲན་གྱི་གལ་གནད་དང་། མགོན་པོ་གང་ཉིད་མཆོག་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་དགོས་བྱུང་བ། དེ་བཞིན་མགོན་པོ་གང་ཉིད་མཆོག་གིས་ཆོས་ལུགས་ནང་ཁུལ་མཐུན་སྒྲིལ་དང་། འཛམ་གླིང་ནང་བྱམས་བརྩེ་དང་ཞི་བདེ། འགྲོ་བ་མི་ཚང་མ་གཅིག་གྱུར་གྱི་འདུ་ཤེས་གོང་མཐོར་སྤེལ་བཞིན་པ་སོགས་ཀྱི་སྐོར་བཀའ་སློབ་སྩལ་ཡོད།
གསར་འགོད་གསལ་བསྒྲགས་མཇུག་སྡོམ་སྐབས་སྐུ་ཞབས་ཇི་རི་ཨོ་བྷར་ཧྥལ་ཛེར་མཆོག་གིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་རྣམ་པས་སྐུ་ངལ་འཛེམས་མེད་ཀྱིས་བོད་དོན་སླད་ཕྱག་ལས་གནང་བཞིན་པར་རྗེས་སུ་ཡི་རང་ཞུས་གནང་ཡོད། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་སྐུ་ཞབས་ཇི་རི་ཨོ་བྷར་ཧྥལ་ཛེར་མཆོག་གིས་སྣེ་ཁྲིད་དེ་ཅེག་སྤྱི་མཐུན་རྒྱལ་ཁབ་ཀྱི་སྐུ་མགྲོན་ཁག་གཅིག་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་ ༦༣ པའི་མཛད་སྒོར་ཕེབས་པ་དེས་འཛམ་གླིང་ས་ཕྱོགས་གང་སར་གནས་པའི་བོད་མི་ཡོངས་ལ་རེ་བ་བཟང་པོ་ཞིག་བསྐྲུན་ཡོད་སྐོར་སོགས་གསུངས་པ་དང་འབྲེལ་སྐུ་མགྲོན་རྣམ་པར་ཐུགས་རྗེ་ཆེ་ཞུས་གནང་ཡོད་པ་བཅས། །
