༄༅། །ཕྱི་ལོ་ ༢༠༢༢ ཟླ་ ༢ ཚེས་ ༡༠ ཉིན་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་སྐུ་ཞབས་ཝ་རན་ (Warren Entsch) ལགས་དང་ལྕམ་སྐུ་སུ་སན་ཊམ་པལ་མན་(Susan Templeman) ལགས་རྣམ་གཉིས་ཀྱིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya) མཆོག་ལ་དགའ་བསུའི་གསུང་འཕྲིན་ཞིག་ཕུལ་ཏེ་ཨ་རིའི་སྲིད་འཛིན་སྐུ་ཞབས་ཇོ་བཱཡི་ཌེན་ (Joe Biden) མཆོག་གིས་དབུ་ཁྲིད་པའི་ཨ་རི་གཞུང་གིས་ལྕམ་སྐུ་ཨ་ཛི་རཱ་ཛེ་ཡ་མཆོག་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་བར་དགའ་བསུ་དང་། བོད་རྒྱའི་དཀའ་རྙོག་སེལ་ཐབས་སུ་མཐུན་ཕྱོགས་ཕྱག་སྦྲེལ་ཚོ་དང་ལྷན་དུ་མཉམ་རུབ་ཀྱིས་ཕྱག་ལས་གནང་དགོས་པའི་སྐོར་འཁོད་འདུག
དེ་ཡང་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོ་སྐུ་ཞབས་ཝ་རན་ལགས་དང་ལྕམ་སྐུ་སུ་སན་ཊམ་པལ་མན་ལགས་རྣམ་གཉིས་ཀྱིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་མཆོག་ལ་དགའ་བསུའི་གསུང་འཕྲིན་ཞིག་ཕུལ་བའི་ནང་འཁོད་དོན། ང་ཚོས་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོའི་ངོ་བོ་ཐོག་ནས་ལྕམ་སྐུ་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པའི་ལས་འགན་གསར་པ་སྒྲུབ་བཞིན་པར་དགའ་བསུ་ཞུ་བ་དང་ཆབས་ཅིག་ལྕམ་སྐུ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་ཡང་ན་མགོན་པོ་གང་ཉིད་མཆོག་གི་སྐུ་ཚབ་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་དབར་སྔོན་འགྲོ་ཆ་རྐྱེན་གང་ཡང་མེད་པའི་ཐོག་བོད་རྒྱ་གྲོས་མོལ་བསྐྱར་གསོ་གནང་རྒྱུའི་ཆོད་སེམས་བརྟན་པོ་ཡོད་པ་དེར་དགའ་བསུ་ཞུ་རྒྱུ་ཡིན།
ལྕམ་སྐུ་མཆོག་གིས་མཐུན་ཕྱོགས་ཕྱག་སྦྲེལ་དང་རྒྱལ་སྤྱིའི་གཞུང་ཁག་མཉམ་འབྲེལ་ཐོག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་། དེ་བཞིན་བོད་བརྒྱུད་ནང་བསྟན་གྱི་ཆོས་ལུགས་ཁག་གི་དབུ་ཁྲིད་རྣམ་པའི་ཡང་སྲིད་འདེམས་སྒྲུག་ལ་ཐེ་བྱུས་བྱེད་བཞིན་པ་མཚམས་འཇོག་བྱེད་དགོས་པ་མཚོན་པའི་བོད་དོན་སྐོར་ཕྱག་ལས་གནང་རྒྱུའི་ཐུགས་འདུན་ཡོད་པར་རྗེས་སུ་ཡི་རང་ཞུ་ཡི་ཡོད། ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ངོས་ནས་བོད་པས་རང་དབང་དང་། འགྲོ་བ་མིའི་ཐོབ་ཐང་། བོད་ཀྱི་ཐུན་མོང་མིན་པའི་ཆོས་དང་རིག་གཞུང་སོགས་ཀྱི་སླད་ཞི་བའི་སྒོ་ནས་འཐབ་རྩོད་གནང་བཞིན་པར་མཐའ་གཅིག་ཏུ་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད།
དེ་རིང་ཁ་སང་བོད་ནང་གི་གནས་སྟངས་ཧ་ཅང་ཛ་དྲག་ཅན་ཆགས་ཡོད་སྟབས་བོད་མིའི་དཀའ་ངལ་སེལ་ཐབས་བྱེད་དགོས་པའི་དུས་ལ་བབས་ཡོད། དེར་བརྟེན་མཐུན་ཕྱོགས་རྒྱལ་ཁབ་དང་ཕྱག་སྦྲེལ་རྣམ་པས་རྒྱ་ནག་གི་འགོ་ཁྲིད་ཚོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་ལྟར་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱའི་དཀའ་རྙོག་སེལ་ཐབས་གནང་དགོས་པའི་འབོད་སྐུལ་གནང་དགོས། ང་ཚོས་ལྷག་བསམ་རྣམ་དག་གིས་རྒྱ་ནག་གི་འགོ་ཁྲིད་ཚོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་བོད་རྒྱའི་དཀའ་རྙོག་སེལ་ཐབས་ཀྱི་ལྡེ་མིག་ཡིན་པ་ངོས་འཛིན་ཞུ་དགོས་པ་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྔར་ནས་རྒྱ་ནག་རི་བོ་རྩེ་ལྔར་གནས་མཇལ་དུ་ཕེབས་འདོད་ཀྱི་དགོངས་པ་ཡོད་པ་ལྟར་མགོན་པོ་གང་ཉིད་མཆོག་བོད་དང་རྒྱ་ནག་ལ་གནས་མཇལ་ཆེད་གདན་འདྲེན་ཞུ་དགོས་པའི་འབོད་སྐུལ་བྱེད་ཀྱི་ཡོད།
མཐའ་དོན་ལྕམ་སྐུ་མཆོག་གི་བོད་དོན་དང་འབྲེལ་བའི་ལས་དོན་རྣམས་ཚགས་ཚུད་ཡོང་བ་དང་། ང་ཚོའི་ཐུན་མོང་གི་གཞི་རྩའི་མང་གཙོ་དང་། རང་དབང་། འགྲོ་བ་མིའི་ཐོབ་ཐང་བཅས་ཀྱི་རིན་ཐང་གོང་མཐོར་སྤེལ་བའི་སྨོན་འདུན་ཞུ་རྒྱུ་ཡིན། ཞེས་འཁོད་ཡོད་པ་བཅས།།
