ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་རིག་གནས་སྐྱེད་ཚལ་ཁང་གཟའ་མཇུག་སློབ་གྲྭར་འཚམས་གཟིགས་གནང་བ།

གསར་ལས་ཁང་གི་གསར་འགོད་པས།

༢༠༢༢-༠༢-༡༣

༄༅། །འདི་གར་ཨོསྟྲེ་ལི་ཡཱ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༢ ཚེས་ ༡༢ ཉིན་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་སིཌ་ནི་བོད་རིགས་མཐུན་ཚོགས་ཀྱི་ཁྱབ་ཁོངས་རིག་གནས་སྐྱེད་ཚལ་ཁང་གཟའ་མཇུག་སློབ་གྲྭར་ཆེད་ཕེབས་ཀྱིས་འཚམས་གཟིགས་གནང་ཡོད།

དེ་ཡང་ཐོག་མར་སློབ་ཕྲུག་རྣམ་པས་ཞོགས་པའི་འདུ་འཛོམས་སྐབས་གང་བློ་མ་གསུང་འདོན་དང་། དེ་རྗེས་བོད་དང་ཨོསྟྲེ་ལི་ཡཱའི་རྒྱལ་གླུ་བཏང་སྟེ་སློབ་ཕྲུག་ཁག་གཅིག་ནས་ཀློག་རྩལ་བཅས་གཟིགས་འབུལ་ཞུས་གྲུབ་རྗེས་སློབ་ཕྲུག་རྣམས་ལ་བོད་ཀྱི་སྐད་ཡིག་ནི་བོད་མི་རིགས་ཀྱི་སྲོག་རྩ་ཡིན་པས་ངེས་པར་དུ་སྦྱང་སྤྱོད་སྤེལ་གསུམ་བྱ་རྒྱུ་གལ་ཆེ་ཡིན་སྐོར་དང་། དེ་བཞིན་དེང་བོད་ནང་ལ་རྒྱ་ནག་གཞུང་གིས་སྔར་ལྷག་འཆར་གཞི་ལྡན་པའི་སྒོ་ནས་བོད་ཀྱི་ཆོས་དང་། རིག་གཞུང་། སྐད་ཡིག་བཅས་པ་རྡོག་རོལ་རྩ་བརླག་དུ་གཏོང་བཞིན་ཡོད་པས་ཕྱི་རྒྱལ་རང་དབང་ལུང་པའི་ནང་གནས་སྡོད་བྱེད་བཞིན་པའི་བོད་པའི་མི་རབས་གསར་པ་ཚོས་བོད་མི་རིགས་ཀྱི་ཐུན་མོང་མ་ཡིན་ཆོས་དང་། རིག་གཞུང་། སྐད་ཡིག བོད་མིའི་གོམས་གཤིས་ཡ་རབས་སྤྱོད་བཟང་བཅས་མི་ཉམས་རྒྱུན་འཛིན་དང་སྲུང་སྐྱོབ་བྱ་རྒྱུ་འགན་ཁུར་དམིགས་བསལ་ཡོད་པས་རྒྱུན་དུ་སེམས་ལ་བཅངས་དགོས་པ་དང་། ལྷག་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རེ་ལམ་སྟོན་གནང་བ་ལྟར་བོད་པའི་སློབ་ཕྲུག་རྣམས་གནའ་དེང་ཤེས་ཡོན་ཟུང་དུ་སྦྲེལ་བའི་འདབ་ཤོག་གཉིས་ལྡན་ཞིག་དགོས་རྒྱུ་ཧ་ཅང་གལ་ཆེ་ཡིན་པ་བཅས་ལམ་སྟོན་གནང་།

དེ་རྗེས་དགེ་རྒན་ཕ་མའི་ཚོགས་འདུར་མཉམ་ཞུགས་ཀྱིས་ཕྲུག་གུའི་ཤེས་ཡོན་ཡར་རྒྱས་ཡོང་བར་ཕ་མའི་ངོས་ནས་ལམ་སྟོན་དང་མཐུན་འགྱུར་རོགས་འདེགས་གནང་དགོས་ཇི་ཡོད་ལམ་སྟོན་ཞིབ་རྒྱས་གནང་བ་དང་འབྲེལ་སྐུ་ཚབ་དོན་གཅོད་ལས་ཁུངས་ནས་བོད་མིའི་སྒྲིག་འཛུགས་ཤེས་རིག་ཁུངས་ལ་འབྲེལ་ལམ་གྱིས་སློབ་ཕྲུག་རྣམས་ལ་བོད་ཡིག་ཐོག་བྱིས་པའི་བརྙན་དེབ་དང་ཞོག་འདེགས་ཀློག་དེབ་སོགས་གང་མང་མཐུན་འགྱུར་བསྐྲུན་ཐབས་གནང་རྒྱུ་ཡིན་པ་དང་། མ་འོངས་པར་ཨོ་གླིང་ཁུལ་གྱི་སློབ་གྲྭའི་དབྱར་དུས་གུང་སེང་དང་བསྟུན་ཏེ་དོ་བདག་ཕ་མས་འདོད་མོས་དང་ཕྲུག་གུ་རང་ཉིད་ཀྱིས་དོ་དབྱིངས་ལ་བསྟུན་ཏེ་ལོ་ལྟར་སློབ་ཕྲུག་ཁག་གཅིག་རྒྱ་གར་དུ་ཟླ་བ་གཅིག་ཙམ་རིང་བོད་པའི་སློབ་གྲྭ་ཁག་ནང་བོད་ཀྱི་ཆོས་དང་རིག་གཞུང་སོགས་ངོ་སྤྲོད་དང་བོད་མིའི་སྒྲིག་འཛུགས་དང་བོད་ཀྱི་ཆོས་དང་རིག་གཞུང་གི་བསྟི་གནས་ཁག་ལ་ལྟ་སྐོར་ཆེད་བསྐོར་བསྐྱོད་ཀྱི་ལས་འཆར་ཞིག་ཀྱང་འབྲེལ་ཡོད་ཤེས་རིག་ལས་ཁུངས་དང་གོ་བསྡུར་གྱིས་མཐུན་འགྱུར་གོ་སྒྲིག་ཞུ་འཆར་ཡོད་པ་བཅས་ཀྱི་གསུང་བཤད་གནང་རྗེས་རིག་གནས་སྐྱེད་ཚལ་ཁངགི་དང་བླངས་དགེ་ལས་རྣམ་པ་དང་ཕ་མའི་འཐུས་ཚབ་རྣམས་ལ་ཐུགས་རྗེ་ལེགས་འབུལ་མཚོན་བྱེད་མཇལ་དར་སྒྲོན་ཏེ་ཚོགས་འདུ་ལེགས་གྲུབ་ངང་གྲོལ།

ཉིན་རྒྱབ་ (Australia Tibet Council) ཞེས་ཨོསྟྲེ་ལི་ཡཱ་ནང་གི་བོད་དོན་རྒྱབ་སྐྱོར་ཚོགས་པ་ཆེ་ཤོས་ཀྱི་ལོ་འཁོར་ཐབས་བྱུས་འཆར་བཀོད་ཚོགས་འདུར་ (Strategic planning session ) གདན་ཞུ་གནང་བ་ལྟར་མཉམ་ཞུགས་ཀྱིས་དོན་གཅོད་ལས་ཁུངས་དང་མཉམ་འབྲེལ་གྱིས་བོད་དོན་ལས་འགུལ་སྤེལ་ཕྱོགས་སྐོར་གོ་བསྡུར་ཞིབ་ལྷུག་གནང་ཡོད་པ་བཅས། །